លោក អូន ព័ន្ធមុនីរ័ត្ន៖ កម្ពុជាត្រៀមខ្លួនរួចរាល់ក្នុងការចរចាពន្ធគយបដិការជាមួយអាមេរិក​ជុំទី២នៅសប្តាហ៍ក្រោយ

ឧបនាយករដ្ឋមន្ត្រី និង ជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកអូន ព័ន្ធមុនីរ័ត្ន  បានលើកឡើងថារាជរដ្ឋាភិបាលកម្ពុជាតាមរយៈក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគ ទ្វេភាគីកម្ពុជា-សហរដ្ឋអាមេរិក ដែលដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល នឹងធ្វើដំណើរទៅកាន់សហរដ្ឋអាមេរិកនៅសប្តាហ៍ក្រោយដើម្បីធ្វើការចរចាជាមួយមន្រ្តីពាណិជ្ជកម្មអាមេរិកដើម្បីរក្សាទំនាក់ទំនងពាណិជ្ជកម្ម និងវិនិយោគរវាងប្រទេសទាំងពីរ។

ការលើកឡើងរបស់លោកឧបនាយករដ្ឋមន្រ្តីធ្វើឡើងក្នុងជំនួបពិភាក្សាការងារជាមួយលោកស្រី Bridgette Walker ការៈធាវីស្តីទីនៃស្ថានទូតសហរដ្ឋអាមេរិកប្រចាំ​ក្រកម្ពុជា​ នៅទីស្តីការក្រសួងកាលពីថ្ងៃទី២៧ ខែ ឧសភានេះ។

​លោកឧបនាយករដ្ឋមន្ត្រី បានលើកឡើងថា សហអាមេរិក ជាដៃគូសហការដ៏ល្អប្រសើរ និងទីផ្សារដ៏ធំរបស់កម្ពុជា ដែលបានដើរតួនាទីយ៉ាងសំខាន់នៅក្នុង ការជួយបង្កើនកំណើនសេដ្ឋកិច្ច និងអភិវឌ្ឍន៍សង្គមកម្ពុជា  ខណៈកម្ពុជាបានដាក់គោលដៅក្នុងការចាកចេញពីប្រទេសដែលមានការអភិវឌ្ឍតិចតួចនៅឆ្នាំ ២០២៩ និងគោលដៅជាប្រទេសចំណូល មធ្យមកម្រិតខ្ពស់នៅឆ្នាំ ២០៣០។ លោកថា ដើម្បីសម្រេចគោលដៅនេះ, កម្ពុជាត្រូវការរក្សាឲ្យបាននូវ កំណើនសេដ្ឋកិច្ចខ្ពស់ ពិពិធកម្មសេដ្ឋកិច្ច និងស្ថានភាពម៉ាក្រូសេដ្ឋកិច្ច ពិសេសការទាញយកសក្តានុពលនៃ មូលធនឯកជនពីអ្នកវិនិយោគបរទេស និងដៃគូវិនិយោគឲ្យចូលមកកាន់ទីផ្សារប្រកបដោយថាមពលមួយនេះ ។

ពាក់ព័ន្ធនឹងករណីអត្រាពន្ធគយបដិការរវាងកម្ពុជា និងសហរដ្ឋអាមេរិក​ លោកឧបនាយករដ្ឋមន្ត្រីបានលើកថា​ កម្ពុជាបានខិតខំរៀបចំ និងដោះ ស្រាយកត្តាដែលមានឥទ្ធិពលអវិជ្ជមានចំពោះទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក ដូចជាបានបង្កើតក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគ ទ្វេភាគីកម្ពុជា-សហរដ្ឋអាមេរិក ដែលមាន លោកឧបនាយករដ្ឋមន្ត្រី ស៊ុន ចាន់ថុល ជាប្រធាន និងបាន ត្រៀមលក្ខណៈរួចរាល់ក្នុងការចូលរួមចរចាជាមួយភាគីពាក់ព័ន្ធរបស់សហរដ្ឋអាម៉េរិក អំពីការអនុវត្តពន្ធគយបដិការ (Reciprocal Tariffs) ជុំទី ២ នៅសហរដ្ឋអាមេរិក នៅសប្តាហ៍ក្រោយនេះ ។

លោកថា៖«រាជរដ្ឋាភិបាលកម្ពុជា ប្តេជ្ញាចិត្តខ្ពស់ក្នុងការពង្រឹងនីតិវិធីបង្ការ និងបង្ក្រាបបទល្មើស និងទប់ស្កាត់ការក្លែងបន្លំដើម កំណើតទំនិញ និងជំរុញការអនុវត្តច្បាប់ស្តីពីវិធានដើមកំណើតទំនិញ ប្រកបដោយតម្លាភាពសម្រាប់ការនាំ ចេញទំនិញទៅកាន់ទីផ្សារសហរដ្ឋអាមេរិក»។

លោកបានលើកឡើងថារាជរដ្ឋាភិបាលកម្ពុជា បានដាក់ចេញនូវប្រកាសអន្តរ ក្រសួងរវាងក្រសួងសេដ្ឋកិច្ច និងហិរញ្ញវត្ថុជាមួយក្រសួងពាណិជ្ជកម្ម ស្តីពីវិធានការសម្រាប់បង្ការ និងទប់ស្កាត់ ការក្លែង បន្លំដើមកំណើតទំនិញ សម្រាប់ការនាំចេញទំនិញមួយចំនួនទៅកាន់ទីផ្សារសហរដ្ឋអាមេរិក និង ប្រកាសរបស់ក្រសួងពាណិជ្ជកម្ម ស្តីពីនីតិវិធីក្នុងការស្នើសុំ និងការចេញលិខិតអនុញ្ញាតបញ្ជាក់ដើមកំណើត ទំនិញ សម្រាប់ការនាំចេញទំនិញមួយចំនួនទៅកាន់ទីផ្សារសហរដ្ឋអាមេរិក ដើម្បីជំរុញទាក់ទាញវិនិយោគិន បរទេសឱ្យមកបណ្តាក់ទុនវិនិយោគនៅកម្ពុជាបន្ថែមទៀត ជាដើម ។

លោកស្រី Bridgette Walker បានលើកឡើងអំពីវឌ្ឍនៈភាពដែលកម្ពុជាបានអភិវឌ្ឍន៍សង្គម-សេដ្ឋកិច្ច ពិសេសកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការធ្វើ ពិពិធកម្មប្រភពវិនិយោគឯកជន ។ លោកស្រី ក៏បានចែករំលែកនូវការព្រួយបារម្ភអំពីបទ ល្មើសឆបោកអនឡាញ (Scams), សន្តិសុខអ៊ីនធឺណែត (Cyber Security) និងហិរញ្ញវត្ថុតាមប្រព័ន្ធអ៊ីនធឺណែតដែលជះឥទ្ធិពលអវិជ្ជមានដល់បរិយាកាសវិនិយោគ និងសេដ្ឋកិច្ចនៅកម្ពុជា ក៏ដូចជានៅក្នុង តំបន់ ។

លោកស្រីថា៖« ក្រសួងរតនាគារសហរដ្ឋអាមេរិក បានបង្ហាញជំហរផ្តល់ការគាំទ្រជា ជំនួយបច្ចេកទេសដល់កម្ពុជាពាក់ព័ន្ធទៅនឹងការពង្រឹងសមត្ថភាពនៃការគ្រប់គ្រងហិរញ្ញវត្ថុសាធារណៈ ប្រកបដោយប្រសិទ្ធភាព តម្លាភាពនិងបង្កើនភាពធន់នៃវិស័យហិរញ្ញវត្ថុ»។

កាលពីថ្ងៃទី ១៣-១៥ ខែឧសភា ឆ្នាំ ២០២៥ លោកឧបនាយករដ្ឋមន្ត្រី ស៊ុន ចាន់ថុល និង​ជា​អនុ​ប្រ​ធានទី១ នៃក្រុមប្រឹក្សាអភិវឌ្ឍន៍កម្ពុជា បានដឹកនាំគណៈប្រតិភូជួបប្រជុំចរចាជុំទី១ ជា​មួយ​លោក​ស្រី Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិកទទួលបន្ទុក​តំបន់​​អាស៊ី​អាគ្នេយ៍ និងប៉ាស៊ីហ្វិក។

លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ថា ​ក្នុង​ចំណោមបណ្ដាប្រទេស ដែលបានសម្ដែងនូវសុឆន្ទៈ​របស់ខ្លួនមុនគេទៅ​កាន់សហរដ្ឋអាមេរិក​នោះ​គឺ កម្ពុជា។

លោកបន្តថា មានការកត់សម្គាល់ជាពិសេសចំ​ពោះការឆ្លើយតបយ៉ាង​រហ័សរបស់​សម្ដេច​មហា​បវរធិបតី ហ៊ុន ម៉ាណែត និងកាយវិការសុឆន្ទៈ ដែលកម្ពុជាបញ្ចុះពន្ធទំនិញអាមេរិក​នូវ​អត្រា​ពន្ធនាំចូលទំនិញ ១៩ ប្រភេទ ពីអត្រាអតិបរមា ៣៥% មកត្រឹមអត្រា ៥%។​

​លោកបានបញ្ជាក់ថា គណៈ​ប្រតិភូកម្ពុជានឹង​ទៅចរចាម្ដងទៀត នៅថ្ងៃទី ៤-៦ ខែមិថុនា ឆ្នាំ ២០២៥ ​ដោយលោកបានលើកឡើងថា ការចរចាជុំទី២ នេះ នឹងអាចមានលទ្ធផលមួយចំនួនទៀត ខណៈជុំទី១ រាជរដ្ឋាភិបាលក៏បានបង្ហាញតែត្រឹមលទ្ធផលជាវិជ្ជមានតែ មិនបង្ហាញ​លម្អិតថា បានលើកអ្វី ឬក៏ទទួលបានអ្វីខ្លះដែរ៕

​