វៀតណាមគ្រោង​​បង្កើតការត្រួតពិនិត្យសុវត្ថិភាពចំណីអាហារ លើខ្សែច្រវ៉ាក់ផ្គត់ផ្គង់ទុរេន

ក្រសួងកសិកម្ម និងបរិស្ថានវៀតណាម កំពុងរៀបចំបង្កើតដំណើរការត្រួតពិនិត្យសុវត្ថិភាពចំណីអាហារ​លើខ្សែ​ច្រវ៉ាក់ផ្គត់ផ្គង់ទុរេនទាំងមូល ​ដើម្បីជួញសម្រួលដល់ការនាំចេញផ្លែឈើតម្លៃពាន់លានដុល្លារនៅទៅកាន់ទីផ្សារក្រៅប្រទេស។ នេះបើតាមការចុះផ្សាយរបស់កាសែត Thanh Niên កាលពីថ្ងៃអង្គារ។

ថ្លែងក្នុងសិក្ខាសាលា «ការអភិវឌ្ឍប្រកបដោយនិរន្តរភាពនៃឧស្សាហកម្មទុរេន» កាលពីថ្ងៃអង្គារ លោក Phan Van Duy អនុប្រធាននាយកដ្ឋានគុណភាព កែច្នៃ និងអភិវឌ្ឍន៍ទីផ្សារ ចំណុះឱ្យក្រសួងកសិកម្ម និងបរិស្ថានវៀតណាម បាន​មានប្រសាសន៍ថា ដើម្បីអភិវឌ្ឍឧស្សាហកម្មទុរេនតម្លៃរាប់ពាន់លានដុល្លារនេះប្រកបដោយនិរន្តរភាព បន្ថែមពីលើការលើកកម្ពស់ និងកំណត់ស្តង់ដារដំណើរការផលិត វៀតណាមចាំបាច់ត្រូវកសាងប្រព័ន្ធគ្រប់គ្រងសុវត្ថិភាពចំណីអាហារទូទាំង​ខ្សែច្រវ៉ាក់ផ្គត់ផ្គង់។

បើតាមលោក Duy ក្រសួងកសិកម្ម និងបរិស្ថានវៀតណាម កំពុងបង្កើត ហើយនឹងចេញដំណើរការត្រួតពិនិត្យសុវត្ថិភាពចំណីអាហារ​សម្រាប់ទុរេន ដាច់ដោយឡែកតែឯង។

លោកបន្តថា ​ដំណើរការនេះនឹងធ្វើបច្ចុប្បន្នភាពតម្រូវការបច្ចេកទេសស្របតាមការអនុវត្តអន្តរជាតិ ក្នុងគោលបំណងជួយសម្រួលដល់ការនាំចេញទុរេនវៀតណាម ដោយ​មិនត្រឹមតែបំពេញតាមតម្រូវការរបស់​ចិនប៉ុណ្ណោះទេ ថែមទាំង​ត្រូវតាមស្តង់ដារសុវត្ថិភាពចំណីអាហាររបស់ប្រទេសផ្សេងៗ ដូចជាជប៉ុន កូរ៉េខាងត្បូង និងសហភាពអឺរ៉ុបផងដែរ។

គួរគូសបញ្ជាក់ថា នៅដើមឆ្នាំនេះ អាជ្ញាធរចិន​បាន​បង្កើនការត្រួតពិនិត្យសុវត្ថិភាពទុរេននាំចូល ដើម្បីស្វែងរកសារធាតុគីមីកាដមីញ៉ូម (Cadmium) និង Auramine O ឬ Basic Yellow 2 ដែលបង្កជំងឺមហារីក។ ការណ៍នេះ បាន​បណ្ដាលឱ្យការនាំចេញទុរេនរបស់វៀតណាម ដែលពឹងផ្អែកខ្លាំងលើទីផ្សារចិន ធ្លាក់ចុះជាគំហុក ប្រមាណ ៧៤ ភាគរយ មកត្រឹម ១៣០ លាន​ដុល្លារ ក្នុងរយៈពេល ៤ ខែដើមឆ្នាំ ២០២៥​៕