ព័ត៌មានអន្ដរជាតិ

ឥណ្ឌូណេស៊ីបើកផ្លូវឱ្យអាមេរិកចូលរួមវិនិយោគលើរ៉ែសំខាន់ៗ ជាផ្នែកមួយនៃការចរចាពន្ធ

បានផុស

១ year មុន

នៅ

ថ្ងៃចន្ទ ៣០ មិថុនា ២០២៥

ដោយ

ឥណ្ឌូណេស៊ី បានផ្តល់ឱកាសដល់សហរដ្ឋអាមេរិក ក្នុងការវិនិយោគរួមគ្នានៅក្នុងគម្រោងរ៉ែសំខាន់ៗ ដើម្បីជាផ្នែកមួយនៃការចរចាពន្ធបដិការ ដែលរដ្ឋបាលប្រធានាធិបតី ដូណាល់ ត្រាំ ដាក់លើទំនិញឥណ្ឌូណេស៊ី ៣២ ភាគរយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ប្រធានាធិបតីសហរដ្ឋអាមេរិក លោក ដូណាល់ ត្រាំ និងប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងកិច្ចការសេដ្ឋកិច្ចឥណ្ឌូណេស៊ី លោក Airlangga Hartarto បានឱ្យដឹងយ៉ាងដូច្នេះនៅថ្ងៃចន្ទនេះ ដោយបន្ថែមថា មូលនិធិវិនិយោគរដ្ឋ Danantara Indonesia នឹងចូលរួមក្នុងគម្រោងដែលត្រូវបានផ្តល់ជូនទៅសហរដ្ឋអាមេរិក។

គេមើលឃើញ រ៉ែសំខាន់របស់ឥណ្ឌូណេស៊ី អាចជួញសហរដ្ឋអាមេរិកមួយផ្នែក លើការកាត់បន្ថយការពឹងផ្អែកលើរ៉ែសំខាន់ៗ និងរ៉ែកម្ររបស់ចិន ទោះបីជាពិពិធកម្មប្រភពផ្គត់ផ្គង់មានកម្រិតក៏ដោយ។

លោក Airlangga មិនបានលើកឡើងថាតើសហរដ្ឋអាមេរិកបានទទួលយកបែបណាទេ ចំពោះការផ្ដល់ជូននេះ ខណៈដំណើរការនៃការចរចាពន្ធបដិការកំពុងបន្ត ចំពេលពន្ធបដិការ គ្រោងនឹងចូលជាធរមានជាថ្មីនៅថ្ងៃទី ៩ កក្កដា។

កាលពីសប្ដាហ៍មុន លោក Airlangga បានឱ្យដឹងថា លោកបានជួបប្រជុំគ្នាជាមួយរដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent នៅយប់ថ្ងៃពុធ ដោយលោក Bessent បាន «ស្វាគមចំពោះសំណើរបស់ឥណ្ឌូណេស៊ី ក្នុងការជំរុញពាណិជ្ជកម្មទ្វេភាគីដែលប្រកបដោយភាពស្មើភាពគ្នា»។

*រដ្ឋមន្ត្រីក្រសួងកិច្ចការសេដ្ឋកិច្ចឥណ្ឌូណេស៊ី លោក Airlangga Hartarto*

មកទល់ពេលនេះ មិនទាន់មានការបញ្ជាក់ណាមួយពីការសម្រេចបានណាមួយទេចំពោះការចរចាពន្ធឥណ្ឌូណេស៊ី-អាមេរិក។ រាប់តាំងពីការចរចាចាប់ផ្ដើមនៅខែមេសា ឥណ្ឌូណេស៊ីដែលមានអតិរេកពាណិជ្ជកម្មជាមួយអាមេរិក ១៧,៩ ប៊ីលានដុល្លារ កាលពីឆ្នាំមុន បានបង្ហាញនូវចេតនានៃការបង្កើនការនាំចូលទំនិញអាមេរិក ជាពិសេសថាមពល និងទំនិញកសិកម្ម។

យ៉ាងណាមិញ ខណៈការចរចាកំពុងបន្ត ទំហំអតិរេកពាណិជ្ជកម្មកំពុងកើនឡើងខ្លាំង។ ចន្លោះពីមករាដល់ខែមេសាឆ្នាំ ២០២៥ ឥណ្ឌូណេស៊ីមានអតិរេកពាណិជ្ជកម្មជាមួយអាមេរិក ៥,៤ ប៊ីលានដុល្លារ ខ្ពស់ជាង ២០ ភាគរយ ធៀបនឹងរយៈពេលដូចគ្នាឆ្នាំមុន ដែលមានត្រឹម ៤,៤ ប៊ីលានដុល្លារ៕