ក្រុមហ៊ុនចុះបញ្ជីនៅផ្សារហ៊ុន២បង្កើនដើមទុនដើម្បីពង្រីកការវិនិយោគ

ក្រុមហ៊ុនសំណង់ ឌី ប៊ី ឌី  (DBD Engineering) និងរដ្ឋាករទឹកស្វយ័តក្រុងភ្នំពេញ (PPAP) ​ដែល​បាន​ចុះបញ្ជី​នៅ​​​ផ្សា​រមូល​ប​ត្រ​កម្ពុជា (CSX) បានបង្កើនដើមទុនរបស់ខ្លួនក្នុងការពង្រីកការវិនិយោគ ទោះបីជាស្ថានភាពសេដ្ឋកិច្ចសកល និងតំបន់រួមទាំងកម្ពុជានៅតែប្រឈមនឹងភាពមិនប្រាកដប្រជាខ្ពស់ក្តី។

យោងតាមសេចក្តីជូនដំណឹងរបស់ក្រុមហ៊ុនដែលបានផ្ញើរទៅកាន់ CSX កាលពីពេលថ្មីៗកន្លងទៅនេះ ក្រុមហ៊ុន DBD បានទទួលនូវទឹកប្រាក់កម្ចីចំនួន ១លានដុល្លារ ជាមួយនឹងអត្រាការ១%ក្នុង១ខែសម្រាប់សម្រាប់រយៈពេលកម្ចី១ខែគិតចាប់ពីថ្ងៃទី១ខែកក្កដា ដល់ដំណាច់ខែកក្កដា។​ ជាមួយទឹកប្រាក់កម្ចីនេះ ធ្វើឱ្យអនុបាតនៃកម្ចីធៀបនឹងមូលធនភាគហ៊ុនិកស្មើនឹង១១,៨៩%​ ឬ អនុបាតនៃបំណុលសរុបធៀបនឹងមូលធនភាគហ៊ុនិក ២០៤,៧៧%

យោងតាមសេចក្តីជូនដំណឹងរបស់ក្រុមហ៊ុន៖«ក្រុមហ៊ុន ឌី ប៊ី ឌី អ៊ិនជីនារីង ​ បានចុះកិច្ចសន្យាខ្ចីប្រាក់ បន្តលើកទី២ (2nd Extension Borrowing) ចំនួន ១.០០០.០០០ ដុល្លារអាមេរិកគត់ ជាមួយលោកស្រី ចេង សុភា។ ​ការចុះកិច្ចសន្យាលើប្រាក់កម្ចីនេះគឺសម្រាប់ចំណាយប្រតិបត្តិការរបស់ក្រុមហ៊ុន»។

​លោក នាង​​​​ វិធី ប្រធានក្រុមប្រឹក្សាភិបាល និងអគ្គនាយកក្រុមហ៊ុន DBD បានថ្លែងក្នុងរបាយការណ៍ហិរញ្ញវត្ថុរបស់ខ្លួនកន្លងមក ថា​សម្រាប់ត្រីមាសទី១ ឆ្នាំ២០២៥ ក្រុមហ៊ុនមប្រាក់ចំណូលជាង ៤៦ ពាន់លានរៀល ដែលកើនឡើងចំនួនជិត ៩៤% បើធៀប នឹងត្រីមាសដូចគ្នានៃឆ្នាំ២០២៤ ដែលមានចំនួនជាង ២៤​ ពាន់លានរៀល។

លោកថាសម្រាប់ប្រាក់ចំណូលមានចំនួនជាង ៤៦​ ពាន់លានរៀល គឺជា ចំណូលដែលបានពីគម្រោងសាងសង់ និងសេវាជួសជុល រីឯ ជាង៤៩​លានរៀល ជាចំណូលពីការលក់សម្ភារសំណង់។ ក្រុមហ៊ុនមានខាតលម្អិត ក្នុងការិយបរិច្ឆេទចំនួនជិត ៥៨៤​លានរៀល សម្រាប់ត្រីមាសនេះ។ ទ្រព្យសកម្មសរុបមានការកើនឡើងចំនួន ១១.៩៤% បើធៀបនឹងឆ្នាំ២០២៤ ដែលបានកើនឡើងពីចំនួនជិត ៩២ ពាន់លានរៀល ទៅ ១០២ពាន់លានរៀល ។

ជាមួយគ្នានេះដែរ ក្រុមហ៊ុន PPWSA ក៏បានឱ្យដឹងផងដែរថា រាយការណ៍ពីការបង្កើននូវការពង្រីកការវិនិយោគលើការសាងសង់នូវរោងចក្រផលិតទឹកស្អាតចំនួនពីរ​បន្ថែមទៀតផងដែរ។​

PPWSA បានលើកឡើងថា៖«រាជរដ្ឋាភិបាលកម្ពុជាបានប្រទានកម្មដីចំនួន ២កន្លែង ​មក PPWSA សម្រាប់រៀបចំទីតាំងសាងសង់រោងចក្រផលិតទឹកស្អាត៖ដីរោងចក្រផលិតទឹកស្អាតម្លេច ខេត្តកំពត និង ដីរោងចក្រផលិតទឹកស្អាតបឹងធំ រាជធានីភ្នំពេញ»។

លោក ​ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុក​ជា​អគ្គនាយក​នៃរដ្ឋាករទឹក​ស្វយ័ត​ក្រុង​ភ្នំពេញ​បាន​ឲ្យ​ដឹង​ថា បច្ចុប្បន្ននេះ​នៅរាជធានីភ្នំពេញ មាន​រោងចក្រ​ផលិតទឹកស្អាតចំនួន ៦ ដែល​មាន​សមត្ថភាព​ផលិតទឹកស្អាត​បាន​ប្រមាណ ១ លានម៉ែត្រគូបក្នុងមួយថ្ងៃ។ នៅ​ត្រឹម​ឆ្នាំ ២០២៧ រដ្ឋាករ​ទឹក​​ភ្នំពេញ គ្រោងនឹង​​ពង្រីក​ការ​ផ្គត់ផ្គង់​ទឹក​ស្អាត​​គ្រប​ដណ្ដប់​ឲ្យបាន ១០០% នៅ​រាជធានី​ភ្នំពេញ។

បើតាមលោក ណារ៉ូ បាន​ថ្លែង​បញ្ជាក់​ថា ខណ្ឌ​ពោធិ៍សែន​ជ័យ​កំពុង​ពង្រីក និង​ខណ្ឌ​ដង្កោ​ក៏​កំពុង​ពង្រីក ខណៈ​ខណ្ឌ​កំបូល​បាន​ពង្រីក​គ្រប​ដណ្តប់​ស្ទើរ ១០០% ក្រោយ​ដំណើរការ​រោងចក្រ​បឹង​ធំ​កាលពី​ខែ​ ១១ ឆ្នាំ ២០២៤ ដែល​ធ្វើ​ឲ្យ​ខណ្ឌ​កំបូល​ដោះស្រាយ​បាន​លឿន​ការ​ផ្គត់ផ្គង់​ទឹកស្អាត។ នៅ​រាជធានី​​ភ្នំពេញ​ការ​ផ្គត់ផ្គង់​ទឹក​ស្អាត​ដល់​ប្រជាជន​បាន​ជាង ៩០% នៅ​សល់​ជាង ៧% ទៀត​ដែល​ត្រូវ​ការ​ដោះស្រាយ​ហើយ​ក៏​​មិន​ស្រួល​ដែរ​ ដោយសារ​រប៉ាយ​ប្រជាជន​រស់នៅ​ឆ្ងាយ​ៗ​ពី​គ្នា។ លោក ឡុង ណារ៉ូ បញ្ជាក់បន្ថែម។

តាម​ផែនការ​ក្នុង​ឆ្នាំ ២០២៧ រដ្ឋាករ​ទឹក​គ្រោង​ពង្រីកសេវា​ផ្គត់ផ្កង់​​ឲ្យបាន​ ១០០% ដល់​​ប្រជាជន​រស់នៅ​រាជធានី​​ភ្នំពេញ​ដែល​នឹង​ទទួល​ទឹក​ស្អាត​ប្រើប្រាស់​ពី​រដ្ឋាករ​ទឹក​ភ្នំពេញ លើក​លែង​តែ​ទីតាំង​ដែល​ទទួល​បាន​​សេវា​ពី​ប្រតិបត្តិករ​ឯកជន។

រដ្ឋាករទឹក​រាជធានី​ភ្នំពេញ កំពុង​សាងសង់​រោងចក្រ​ប្រព្រឹត្តកម្មទឹកស្អាត​បាក់ខែងជំហានទី៣ ដែល​មាន​សមត្ថភាព​ផលិត​ទឹកស្អាត ១៩៥ ០០០ ម៉ែត្រ​គូបក្នុង​មួយ​ថ្ងៃ ដែល​បច្ចុប្បន្ន​នេះ​សាងសង់​សម្រេច​បាន​​ប្រមាណ ២៥%។

តាម​ផែនការ​រោងចក្រនេះ នឹង​បញ្ចប់ការសាងសង់​ទាំងស្រុងនៅឆ្នាំ២០២៧ ដើម្បី​បង្កើន​ការផលិត​ទឹក​ស្អាត​ក្នុង​រាជធានី​ភ្នំពេញ​ឱ្យ​បាន ១.២លានម៉ែត្រគូបក្នុងមួយថ្ងៃ ឆ្លើយតប​ទៅ​នឹង​តម្រូវការ​ប្រចាំថ្ងៃ​របស់​ប្រជាពលរដ្ឋ​ទាំង​នៅ​ក្នុង​រាជធានី​ភ្នំពេញ និង​នៅ​ក្រុង​តាខ្មៅ៕