ត្រាំ ​​ពន្យារពេលចាប់ផ្ដើមអនុវត្ត «ពន្ធបដិការ» ដល់ថ្ងៃ ១ សីហា

ប្រធានាធិបតីអាមេរិក លោក ដូណាល់ ត្រាំ បាន​ឱ្យដឹងកាលពីថ្ងៃអាទិត្យថា សហរដ្ឋអាមេរិក​នឹង​ពន្យារពេល​​ចាប់ផ្ដើម​អនុវត្ត «ពន្ធគយបដិការ​» រហូតដល់ថ្ងៃទី ១ សីហា ខណៈមន្រ្តីជាន់ខ្ពស់របស់លោកអះអាងថា វាជាការទុកពេលសម្រាប់ចរចាបន្ថែម​ បើមិនដូច្នោះទេ ប្រទេសនានាដែលមិនសម្រេចបានកិច្ចព្រមព្រៀងជាមួយ​អាមេរិក នឹង​ជាប់ពន្ធក្នុងអត្រាចាស់ ដែលប្រកាសឡើងនៅដើមខែមេសា។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ការប្រកាសយ៉ាងដូច្នេះរបស់លោក ត្រាំ ធ្វើឡើងប្រហែល ៣ ថ្ងៃប៉ុណ្ណោះ មុនពេលពន្ធគយបដិការ ដែលសំដៅលើពន្ធមាន​អត្រាខ្ពស់ជាង ១០ ភាគរយ​ គ្រោង​​ចូលជាធរមាននៅថ្ងៃពុធ ៩ កក្កដា ខាន​ស្អែក​នេះ។

ប្រធានាធិបតីអាមេរិកដដែល បាន​ឱ្យដឹងទៀតថា សហរដ្ឋអាមេរិក​ជិតសម្រេចបាន​​​​កិច្ចព្រមព្រៀងពាណិជ្ជកម្មជាមួយ​ប្រទេសជាច្រើន ​ហើយនឹងជូនដំណឹងដល់ប្រទេសផ្សេងៗទៀតអំពីអត្រាពន្ធខ្ពស់ ត្រឹមថ្ងៃទី ៩ ខែកក្កដា។

ពេលសាកសួរដើម្បីបញ្ជាក់ពីអ្វីដែលលោក ត្រាំ ប្រកាស ​លេខាធិការពាណិជ្ជកម្មអាមេរិក លោក Howard Lutnick បានប្រាប់អ្នកយកព័ត៌មានថា ពន្ធខ្ពស់នឹងចូលជាធរមាននៅថ្ងៃទី ១ ខែសីហា ប៉ុន្តែលោក ត្រាំ កំពុង «កំណត់អត្រាពន្ធ​ និងកិច្ចព្រមព្រៀងនានានៅពេលនេះ»។ ​

គួររំឭកថា លោក ត្រាំ ប្រកាសពន្ធបដិការ (ដែលមាន​អត្រាខ្ពស់ជាង ១០ ភាគរយ ដល់ ៥០ ភាគរយ) និងពន្ធមូលដ្ឋាន (ត្រឹម ១០ ភាគរយ) នៅថ្ងៃទី ២ មេសា។ ពន្ធមូលដ្ឋានបាន​ចូលជាធរមាននៅថ្ងៃ ៥ មេសា រហូតមក ខណៈពន្ធបដិការចូលជាធរមាននៅថ្ងៃ ៩ មេសា មុនពេលលោក ត្រាំ ប្រកាសពន្យារពេលអនុវត្ត ៩០ ថ្ងៃ ដើម្បីចរចា។

មាន​តែវៀតណាម និងអង់គ្លេសប៉ុណ្ណោះ ដែលសម្រេចបាន​កិច្ចព្រមព្រៀងពាណិជ្ជកម្មអចិន្ត្រៃយ៍ជាមួយអាមេរិក ខណៈ​វិធានការពន្ធខ្ពស់កប់ពពកជាមួយ​ចិន ត្រូវបាន​ព្រមព្រៀងបញ្ចុះមកអត្រាទាបរយៈពេល ៩០ ថ្ងៃ គិតពីពាក់កណ្ដាលខែឧសភា។ ការកំណត់ពេលចូលជាធរមានជាថ្មីនៃពន្ធបដិការត្រឹម ១ សីហា មាន​ន័យថា ប្រទេសនានាដែលមាន​ពន្ធខ្ពស់ជាង ១០ ភាគរយ មាន​ពេល ៣ សប្ដាហ៍ទៀត​ ដើម្បីចរចា។

ជុំវិញបញ្ហានេះ រដ្ឋមន្ត្រីក្រសួងរតនាគារលោក Scott Bessent បានបញ្ជាក់ប្រាប់កម្មវិធី State of the Union របស់បណ្ដាញទូរទស្សន៍ CNN កាលពីថ្ងៃអាទិត្យថា ​ពន្ធគយដែល​ប្រកាសនៅ​ខែមេសា នឹងចូលជាធរមាននៅថ្ងៃទី ១ ខែសីហា សម្រាប់ប្រទេសដែលមិនទាន់​សម្រេច​បាន​កិច្ចព្រមព្រៀងជាមួយរដ្ឋបាល​ ត្រាំ។ ​លោក​ Bessent បានពន្យល់ថា ​ប្រធានាធិបតី ត្រាំ នឹងផ្ញើលិខិតទៅដៃគូពាណិជ្ជកម្ម ដោយ​ព្រមានពួកគេថា «ប្រសិនបើគ្មានការព្រមព្រៀងគ្នាទេ ពន្ធនឹងត្រឡប់ទៅកម្រិតថ្ងៃ ២ ខែមេសា ចាប់ផ្តើម​ពីថ្ងៃទី ១ ខែសីហា តទៅ»។

លោក Bessent បានបដិសេធថាថ្ងៃទី ១ ខែសីហា គឺជាថ្ងៃកំណត់ថ្មី ប៉ុន្តែបានទទួលស្គាល់ថា វាជាកាលបរិច្ឆេទផ្តល់ឱ្យប្រទេសនានានូវពេលវេលាបន្ថែមទៀត ដើម្បីចរចាឡើងវិញនូវលក្ខខណ្ឌពន្ធ។

ឆ្លៀតក្នុងឱកាសនេះ ប្រធានក្រុមប្រឹក្សាសេតវិមានលោក Stephen Miran បានប្រាប់ ABC America ថា ប្រទេសនានាចាំបាច់ត្រូវធ្វើសម្បទាន ដើម្បីទទួលបានអត្រាពន្ធទាប។

គួរគូសបញ្ជាក់ថា ក្រោមកិច្ចព្រមព្រៀងពាណិជ្ជកម្មវៀតណាម-សហរដ្ឋអាមេរិក ដែលប្រកាសឡើងកាល​ពី​សប្ដាហ៍មុន វៀតណាម​ ដែលរងអត្រាចាស់ ៤៦ ភាគរយ នឹង​ជាប់ពន្ធ ២០ ភាគរយ សម្រាប់ទំនិញទូទៅរបស់វៀតណាម និង ៤០ ភាគរយ សម្រាប់ «ទំនិញឆ្លងកាត់» (Transshipping goods)។ ជាថ្នូរនឹង​នោះ វៀតណាមនឹងបើកទីផ្សារសេរីសម្រាប់ទំនិញអាមេរិក ហើយអាមេរិកអាចនាំចូលទំនិញទៅវៀតណាម ដោយ​មិនជាប់ពន្ធ៕