លទ្ធផលចរចាពន្ធបដិការ កម្ពុជា-អាមេរិក អាចនឹងចេញថ្ងៃនេះ ឬស្អែក

លទ្ធផលនៃការចរចាពន្ធបដិការវាងកម្ពុជា និងសហរដ្ឋអាមេរិក អាចនឹងចេញផ្សាយនៅថ្ងៃទី ០៧ ខែ ឬថ្ងៃទី ០៨ ខែកក្កដាស្អែកនេះ បន្ទាប់ពីភាគីទាំងពីរ (កម្ពុជា-អាមេរិក) បានឯកភាពគ្នាលើ​សេច​ក្ដី​ព្រាង​សេចក្ដីថ្លែងការណ៍រួម ស្ដីពីកិច្ចព្រមព្រៀងក្របខណ្ឌលើពន្ធគយបដិការ កាលពីថ្ងៃ​សុក្រ​សប្ដាហ៍មុន។

គណៈប្រតិភូកម្ពុជាបានទៅចរចាផ្ទាល់ជាមួយភាគីអាមេរិកចំនួន ២ ដង និងបានពិភាក្សា​តាម​អនឡាញ ពិនិត្យនូវសេចក្ដីថ្លែងការណ៍រួម កាលពីថ្ងៃទី៤ ខែកក្កដា កន្លងទៅនេះ​ហើយបាន​ឯកភាពគ្នាលើសេចក្ដីថ្លែងការណ៍រួម ដែលនឹងចេញឆាប់ៗនេះ។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានប្រាប់​អ្នកសារព័ត៌មាននៅថ្ងៃទី ០៧ ខែកក្កដានេះថា៖ «​យើងកំពុងរង់ចាំសហរដ្ឋអាមេរិក យើងរៀប​ចំថ្ងៃឱ្យសមស្រប ប្រកាសរួមគ្នាតែម្ដង សេចក្ដីថ្លែងការណ៍អាចនឹងចេញនៅថ្ងៃនេះ ឬស្អែក តាម​មើលអាចចេញបាន ឥឡូវយើងរង់ចាំពេលវេលា គាត់ចង់ឱ្យយើងប្រកាសពេលណា ត្រូវចេញ​ព្រម​គ្នា»។

លោក ស៊ុន ចាន់ថុល បញ្ជាក់ថា៖ «ដោយសារយើងបានឯកភាពគ្នា ចរចាដោយស្មោះត្រង់ ទើបថ្ងៃ ០៩ ខែកក្កដានេះ ពន្ធយើងមិនមែន ៤៩% ទៀតទេ អត់មានទេ គឺកម្ពុជាជាប្រទេស​មួយក្នុងចំណោម ១៨ ប្រទេស ដែលបានចរចារជាមួយសហរដ្ឋអាមេរិក ក្រៅពីហ្នឹងអត់​មានទៅ​ចរចាទេ ក្នុងចំណោម ១៨ ប្រទេស យើងក្នុងចំណោម ១០ ទៀត ដែលបានចេញសេចក្ដីថ្លែង​ការណ៍រួមហើយ អញ្ចឹងថ្ងៃ ០៩ អត់មានអត្រាពន្ធឡើង ៤៩% ទេ យើងរួចខ្លួនមួយដំណាក់កាល ប៉ុន្តែសួរថា តើអត្រាពន្ធបដិការប៉ុន្មាន អត់ទាន់ដឹងទេ គាត់កំពុងសុំការឯកភាពពីប្រធានាធិបតី ដូណាល់ ត្រាំ ទើបអាចប្រកាសបាន យើងរង់ចាំដូចគ្នា»។

ជុំវិញការចរចា កម្ពុជាបានប្រាប់ទៅអាមេរិកថា ឆ្នាំនេះ គឺជាខួបទំនាក់ទំនងកាទូតរវាងកម្ពុជា-អាមេរិក ៧៥ ឆ្នាំ។ ឆ្នាំនេះ រហូតដល់ឆ្នាំ ២០២៧ កម្ពុជាជាប្រទេសសម្របសម្រួលអាស៊ាន និងសហរដ្ឋអាមេរិក។

លោក ស៊ុន ចាន់ថុល បានលើកឡើងថា នៅកម្ពុជា​រោងចក្រកាត់ដេរ ខោអាវ ស្បែកជើង កាបូប មានប្រជាពលរដ្ឋធ្វើការ ១ លាននាក់ ម្នាក់ចិញ្ចឹមគ្រួសារ ៤ ទៅ ៥ នាក់ ដូច្នេះ ឱ្យសហរដ្ឋអា​មេរិកយល់ច្បាស់ បើអត្រាដាក់ពន្ធខ្ពស់ គឺយើងមានបញ្ហា ដូច្នេះត្រូវតែជួយការពារការងារ ១ លាននាក់ បូកទៅចង់ ៥ លាននាក់ បើចិញ្ចឹមបងប្អូនផង។

លោក ស៊ុន ចាន់ថុល បន្ថែមថា៖ «យើងលើកហើយលើកទៀត ឱ្យគាត់យល់ អំពីតម្រូវការ​របស់យើង ដើម្បីឱ្យអត្រាពន្ធទាប ដើម្បីយើងអាចប្រកួតប្រជែង និងទាក់ទាញអ្នកវិនិយោ​គបន្ថែមទៀត មកបណ្ដាក់ទុននៅកម្ពុជា»។

លោក ស៊ុន ចាន់ថុល បញ្ជាក់ថា អត្រាពន្ធយើងអត់ទាន់ដឹង ប៉ុន្តែយើងបានបញ្ជាក់ គាត់​បានទទួលស្គាល់ គាត់សួរយើងថា តើវិស័យណាខ្លះយើងចង់ការពារ? ចឹងយើងខ្ញុំ​បានបញ្ជូន​ទៅហើយ លេខ ពន្ធគយ បញ្ជូនទៅអស់ហើយឱ្យគាត់ពិនិត្យទៅ ៧ មុខ ដែលយើងខ្ញុំ​បញ្ជូនទៅគាត់ គឺការពារបាន ៨៦% នូវទំនិញដែលយើងនាំទៅសហរដ្ឋអាមេរិក។

លោក ស៊ុន ចាន់ថុល សង្ឃឹមថា សហរដ្ឋអាមេរិក នឹងផ្ដល់នូវអត្រាពន្ធបដិការ សមរម្យជូនកម្ពុជា ដោយ​សារកម្ពុជាជាប្រទេសមុនគេដែលបង្ហាញឆន្ទៈស្មោះត្រង់ក្នុងការចរចា៕

អត្ថបទ៖ ឡេង ដេត