ថៃបិទធនាគារតាមបណ្ដោយព្រំដែន ក្រោយ​ជម្លោះប្រដាប់អាវុធជាមួយ​កម្ពុជាផ្ទុះឡើង

សមាគមធនាគារថៃ (TBA) បាន​បញ្ជាក់ថា សាខាធនាគារ​ចំនួន ៣៥ កន្លែង នៅទូទាំងខេត្តចំនួន ៧ ដែល​នៅតាមបណ្ដោយព្រំដែនកម្ពុជា ត្រូវបាន​បិទជាបណ្ដោះអាសន្នក្រោមហេតុផលសុវត្ថិភាពសាធារណៈ និងបុគ្គលិក ​ខណៈ​ជំរុញឱ្យអតិថិជនប្រើប្រាស់សេវាធនាគារឌីជីថល។

តាមការចុះផ្សាយរបស់កាសែត The Nation ការបិទធនាគារនេះធ្វើឡើងក្រោយ​ពេល​ដែល​ជម្លោះប្រដាប់អាវុធជាមួយ​កម្ពុជាផ្ទុះឡើងនៅតាមព្រំដែន ដោយ​កម្ពុជាអះអាងច្បាស់ៗ​ថា ថៃជាអ្នកផ្ដើមការវាយប្រហារ។ ភាពតានតឹងកើនឡើង ដោយ​ថៃប្រើយន្តហោះទម្លាក់គ្រាប់បែកលើដែនអធិបតេយ្យភាព​របស់កម្ពុជា ​​ខណៈការប្រយុទ្ធនៅសមរភូមិបន្តដោយការបាញ់ប្រហារគ្នាទាំងកាំភ្លើងធំ និងទ័ពថ្មើរជើង។ កម្ពុជាបាន​ច្រានចោលការចោទប្រកាន់ដែលថា ខ្លួនកំណត់គោលដៅលើទីតាំង ឬជនស៊ីវិល។

ប្រធាន​ TBA លោក Payong Srivanich បាន​និយាយថា៖ «យើងមានការព្រួយបារម្ភយ៉ាងខ្លាំងចំពោះភាពចលាចលនៅតាមព្រំដែនកម្ពុជា-ថៃ ដែលបានបណ្តាលឱ្យបាត់បង់អាយុជីវិត និងទ្រព្យសម្បត្តិ ព្រមទាំងប៉ះពាល់យ៉ាងខ្លាំងដល់ជីវភាពរស់នៅរបស់អ្នកស្រុក»។ លោក​បន្តថា TBA និងធនាគារសមាជិករបស់ខ្លួនបាននឹងកំពុងតាមដានស្ថានការណ៍យ៉ាងដិតដល់ និងបានអនុវត្តវិធានការឆ្លើយតបបន្ទាន់។

ជាមួយ​គ្នា​នោះ TBA បាន​ណែនាំ​ថា អតិថិជន​អាចបន្តធ្វើប្រតិបត្តិការហិរញ្ញវត្ថុតាមរយៈបណ្តាញជំនួស រួមទាំងធនាគារចល័ត និងធនាគារតាមអ៊ិនធឺណិត ដែលនៅតែដំណើរការពេញលេញ៕