ព័ត៌មានអន្ដរជាតិ

ឱនភាពពាណិជ្ជកម្មអាមេរិកធ្លាក់ចុះ ដោយសារពន្ធ ត្រាំ

បានផុស

១២ ខែ មុន

នៅ

ថ្ងៃពុធ ៦ សីហា ២០២៥

ដោយ

ទិន្នន័យពីក្រសួងពាណិជ្ជកម្មសហរដ្ឋអាមេរិកចេញផ្សាយកាលពីថ្ងៃអង្គារ បានបង្ហាញថា ឱនភាពពាណិជ្ជកម្មរបស់អាមេរិក បានធ្លាក់ចុះកាលពីខែមិថុនា ដោយសារតែការធ្លាក់ចុះនៃការនាំចូលទំនិញប្រើប្រាស់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឱនភាពពាណិជ្ជកម្ម ដែលឆ្លុះបញ្ចាំងពីការនាំចូលច្រើនជាងនាំចេញរបស់អាមេរិក បានធ្លាក់ចុះ ១៦ ភាគរយ មកត្រឹម ៦០,២ ប៊ីលានដុល្លារ នៅខែមិថុនា ដែលនេះជាកម្រិតទាបបំផុតរាប់តាំងពីខែកញ្ញា ឆ្នាំ ២០២៣។

ការណ៍គួរឱ្យកត់សម្គាល់គឺថា ទំហំឱនភាពពាណិជ្ជកម្មជាមួយចិន បានធ្លាក់ចុះដល់កម្រិតទាបបំផុតក្នុងរយៈពេលជាង ២១ ឆ្នាំ ខណៈអ្នកជំនាញចង្អុលបង្ហាញទៅលើគោលនយោបាយពន្ធខ្ពស់របស់ប្រធានាធិបតី ដូណាល់ ត្រាំ ដែលជះឥទ្ធិពលលើការនាំចូលទំនិញពីដៃគូពាណិជ្ជកម្មអាមេរិក។

មែនទែនទៅ ផលប៉ះពាល់នៃពន្ធគយបែបនេះ គ្របដណ្ដប់លើសពីពាណិជ្ជកម្មអន្តរជាតិ។ នៅខែកក្កដា សកម្មភាពក្នុងវិស័យសេវាកម្មរបស់អាមេរិកបានធ្លាក់ចុះ ដោយអាជីវកម្មបានបន្ទោសកំណើននៃការចំណាយ ខណៈត្រៀមផែនការដើម្បីប្រឈមមុខនឹងអត្រាពន្ធថ្មី។

គួរគូសបញ្ជាក់ថា នៅខែមិថុនា ការនាំចេញសរុបរបស់សហរដ្ឋអាមេរិកបានធ្លាក់ចុះបន្តិចមកត្រឹម ២៧៧,៣ ប៊ីលានដុល្លារ ខណៈការនាំចូលបានធ្លាក់ចុះយ៉ាងខ្លាំងមកត្រឹម ៣៣៧,៥ ប៊ីលានដុល្លារ។ ការនាំចូលទំនិញប្រើប្រាស់ និងការផ្គត់ផ្គង់ឧស្សាហកម្មមានកម្រិតទាបបំផុត ចាប់តាំងពីចំណុចកំពូលនៃវិបត្តិកូវីដ។

ចំណុចសំខាន់នៃរបាយការណ៍ពាណិជ្ជកម្មកាលពីថ្ងៃអង្គារនោះ គឺការធ្លាក់ចុះយ៉ាងខ្លាំងនៃឱនភាពពាណិជ្ជកម្មរបស់អាមេរិកជាមួយចិន។ ក្នុងខែមិថុនា ទំហំនេះបានធ្លាក់ចុះ ១/៣ មកនៅត្រឹម ៩,៥ ប៊ីលានដុល្លារ ពោលគឺតូចបំផុតរាប់តាំងពីខែកុម្ភៈ ឆ្នាំ ២០០៤៕