តម្លៃមាសបានធ្លាក់ចុះបន្តិច បន្ទាប់ពីកើនឡើងកាលពីសប្ដាហ៍មុន

តម្លៃហាងឆេងមាសបានធ្លាក់ចុះបន្តិចនៅថ្ងៃច័ន្ទសប្ដាហ៍នេះ បន្ទាប់ពីបានកើន​ឡើងខ្ពស់កាល​ពីសប្ដាហ៍​មុន ដោយ​សារ​ពាក់​ព័ន្ធនឹងអត្រាពន្ធរបស់សហរដ្ឋអាមេរិក ជាមួយបណ្ដាប្រទេសមួយចំនួន។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បាន​ឱ្យ​ដឹងនៅថ្ងៃទីច័ន្ទ ១១ ខែសីហា ឆ្នាំ ២០២៥ ថា តម្លៃមាសបានកើនឡើងពេញមូយសប្ដាហ៍មុន ទោះ​បី​ថ្ងៃនេះ ធ្លាក់ចុះបន្តិច ប៉ុន្តែមាសនៅតម្លៃមួយដែលខ្ពស់ដដែល ប៉ុន្តែទំនោរអាចបន្តធ្លាក់ទៀត។

លោក ឡុង សំណាង បញ្ជាក់ថា តម្លៃមាសបានកើនឡើងកាលពីសប្ដាហ៍មុន ដោយ​សារពាក់​ព័ន្ធ​នឹង​អត្រាពន្ធរបស់​សហ​​រដ្ឋអាមេរិក និងបណ្ដាប្រទេសមួយចំនួន នៅពេលដែល​ប្រកាស​ពន្ធ តម្លៃ​មាស​មានការងើបឡើង ជាពិសេសគឺពន្ធ​ដែលកើន​ឡើង​នៅ​បណ្ដា​ប្រទេស​នីមួយ​ៗ។

បើតាមលោក ឡុង សំណាង បញ្ហាពន្ធគឺជាសម្ពាធនៃសេដ្ឋកិច្ច ដែលធ្វើឱ្យមាសមាន​ការកើនឡើង ហើយវា​ក៏ជាសម្ពាធនៃការដាក់គំនាបទៅលើប្រាក់ដុល្លារផងដែរ ដែលធ្វើឱ្យដុល្លារ​ធ្លាក់ថ្លៃ រុញ​ច្រាន​​ឱ្យមាសកើនឡើង។

នៅថ្ងៃទី ១១ ខែសីហា ឆ្នាំ ២០២៥ តម្លៃមាសបានបើកផ្សារនៅក្នុងតម្លៃ ៤០៩៨ ដុល្លារ​ក្នុង​មួយតម្លឹង គិតត្រឹមម៉ោង ៩៖៣០ មាសកំពុងជួញដូរនៅតម្លៃ ៤០៧០ ដុល្លារ ក្នុងមួយតម្លឹង។ សម្រាប់ហាងឆេងមាសក្នុងស្រុកតាមបណ្ដាហាងនានានៅរាជធានីភ្នំពេញ លក់ចេញ​ក្នុងតម្លៃ ៤០៦ ដុល្លារក្នុងមួយជី៕

អត្ថបទ៖ ឡេង ដេត