ការនាំចេញរបស់វៀតណាមទៅអាមេរិកបន្តកើនឡើងខ្ពស់ ទោះរងពន្ធ ត្រាំ

ការនាំចេញរបស់វៀតណាមទៅសហរដ្ឋអាមេរិកបន្តកើនឡើងខ្ពស់គួរឱ្យកត់សម្គាល់នៅខែសីហា ទោះបីជា «ពន្ធបដិការ» ២០ ភាគរយ​ លើទំនិញវៀតណាម​ របស់ប្រធានាធិបតីអាមេរិក ដូណាល់ ត្រាំ ចូលជាធរមានហើយក្ដី។

ទិន្នន័យគយវៀតណាមដែលចេញផ្សាយកាលពីចុងសប្ដាហ៍កន្លងទៅ បានបង្ហាញថា ​វៀតណាមបាន​នាំចេញទំនិញក្នុងទំហំ ១៣,៩៤ ប៊ីលាន​ដុល្លារទៅសហរដ្ឋអាមេរិកនៅខែសីហា ដោយ​ធ្លាក់ចុះ ២ ភាគរយ ធៀបនឹង​ខែកក្កដា ប៉ុន្តែកើនឡើងរហូតដល់ ១៨,៣៣ ភាគរយ បើធៀបនឹង​រយៈពេលដូចគ្នានៅឆ្នាំមុន។

​របាយការណ៍ទិន្នន័យបង្ហាញផងដែរថា ​​សម្រាប់រយៈពេល ៨ ខែ​ដើមឆ្នាំ ការនាំចេញរបស់វៀតណាមទៅ​អាមេរិក បានកើនឡើង ២៦,៤ ភាគរយ ​ធៀបនឹងឆ្នាំមុន ដល់ ៩៩,០៥ ប៊ីលាន​ដុល្លារ ដែលធ្វើឱ្យអាមេរិកបន្តជា​ទីផ្សារទំនិញវៀតណាមដ៏ធំបំផុត។ ចិនឯណោះវិញ បន្តជាអ្នកផ្គត់ផ្គង់ទំនិញកំពូលសម្រាប់វៀតណាម ដោយនាំ​ទំនិញជាង ១១៧,៩ ប៊ីលា​នដុល្លារ មកប្រទេសអាស៊ីអាគ្មេយ៍មួយនេះ ក្នុងរយៈពេល ៨ ខែដូចគ្នា។ ​

គួរគូសបញ្ជាក់ថា អាមេរិកបាន​ដាក់ពន្ធ ២០ ភាគរយ លើទំនិញនាំចូលពីវៀតណាម ដោយចូលជាធរមាន​នៅថ្ងៃទី ៧ ខែសីហា។ អ្នកជំនាញលើកឡើងថា ការធ្លាក់ចុះការនាំចេញទៅអាមេរិកក្នុងខែសីហា ធៀបនឹងខែកក្កដា អាចជាសញ្ញាមួយបង្ហាញពីផលប៉ះពាល់នៃពន្ធរបស់ ត្រាំ។

ថ្មីៗនេះ ធនាគារពិភពលោកបានបន្ថយការព្យាករកំណើនសេដ្ឋកិច្ចវៀតណាមពី ៦,៨ ភាគរយ មកត្រឹម ៦,៦ ភាគរយ ដោយលើកឡើងពីហានិភ័យសម្រាប់ការនាំចេញ ខណៈរដ្ឋាភិបាល​វៀតណាម កំណត់គោលដៅ ៨,៣-៨,៥ ភាគរយ សម្រាប់ឆ្នាំនេះ៕