ព័ត៌មានអន្ដរជាតិ

តម្លៃប្រេងអន្តរជាតិកើនឡើងថ្ងៃបើកការជួញដូរប្រចាំសប្ដាហ៍

បានផុស

៧ ខែ មុន

នៅ

ថ្ងៃចន្ទ ៦ តុលា ២០២៥

ដោយ

តម្លៃប្រេងអន្តរជាតិបានកើនឡើងជាង ១ ភាគរយ សម្រាប់ការជួញដូរលើទីផ្សារអាស៊ីនាព្រឹកថ្ងៃចន្ទនេះ ដែលជាថ្ងៃបើកការជួញដូរប្រចាំសប្ដាហ៍ ក្រោយកង្វល់ពាក់ព័ន្ធនឹងការផ្គត់ផ្គង់លើសតម្រូវការបានស្រាកស្រាន្ត។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងនាពេលអនាគត ម៉ាក Brent បានកើនឡើង ៩២ សេន ឬ ១,៤៣ ភាគរយ ដោយជួញដូរនៅតម្លៃ ៦៥,៤៥ ដុល្លារ/បារ៉ែល គិតត្រឹមម៉ោង ១០ ព្រឹក នៅទីក្រុងហុងកុង។ តម្លៃប្រេងអាមេរិក WTI ឯណោះវិញ បានកើនឡើង ៨៩ សេនេឬ ១,៤៦ ភាគរយ ដល់ ៦១,៧៧ ដុល្លារ/បារ៉ែល។

យ៉ាងណាមិញ តម្លៃប្រេង Brent បានធ្លាក់ចុះ ៨,១ ភាគរយ ខណៈ WTI ធ្លាក់ចុះ ៧,៤ ភាគរយ ក្នុងអត្រាប្រចាំសប្ដាហ៍មុន ដោយសារតែកង្វល់ពាក់ព័ន្ធនឹងកំណើននៃការផ្គត់ផ្គង់ ពេលវិនិយោគិនរំពឹងការបង្កើនផលិតកម្មប្រេងរបស់អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) ហើយអ៊ីរ៉ាក់បើកការនាំចេញប្រេងពីតំបន់កួដទៅទីផ្សារអន្តរជាតិជាថ្មី។

តម្លៃប្រេងថ្ងៃចន្ទនេះ បានស្ទុះឡើងវិញ ក្រោយ OPEC+ បានសម្រេចកាលពីថ្ងៃអាទិត្យលើការបង្កើនផលិតកម្ម ប៉ុន្តែតិចជាងការរំពឹងទុក ត្រឹម ១៣៧ ០០០ បារ៉ែល/ថ្ងៃ នៅខែវិច្ឆិកា ប្រហាក់ប្រហែលនឹងខែតុលា ដែរ។

កំណើនដដែលក៏ជំរុញផងដែរ ដោយភាពតានតឹងនៃជម្លោះអ៊ុយក្រែន ដែលបន្តកំណត់គោលដៅហេដ្ឋារចនាសម្ព័ន្ធថាមពលរុស្ស៊ី ដើម្បីប្រឆាំងនឹងការឈ្លានពានរបស់ប្រទេសនេះ៕