អត្ថាធិប្បាយ៖ វ៉ាក់សាំង និងអ្នកនយោបាយរវើរវាយ

នយោបាយ ជាសិល្បៈ នៃការដឹកនាំ ឬជាទេពពកោសល្យ នៃការដឹកនាំ របស់មេដឹកនាំប្រទេសគ្រប់រូប ប៉ុន្តែនៅកម្ពុជា មានអ្នកនយោបាយបោកប្រាស់ អ្នកនយោបាយអុជអាល និងអ្នកនយោបាយរវើរវាយ។

គេនៅចាំថា នៅប៉ុ​ន្មានខែមុននេះ ខណៈពេលប្រមុខរាជរដ្ឋាភិបាលប្រកាសបញ្ជាទិញវ៉ាក់សាំង ដើម្បីចាក់ជូន​ប្រជា​ពលរដ្ឋ ដោយឥតគិតថ្លៃ  គេក៏ឃើញអ្នកនយោបាយបោកប្រាស់ អុជអាល និងរវើរវាយ ដែលជាអតីតប្រធាន​បក្សមួយផង បានសរសេរសារលើហ្វេសប៊ុករបស់ខ្លួនថា ការទិញវ៉ាក់សាំងរបស់រាជរដ្ឋាភិបាលធ្វើឡើងតាមរបៀបទិញត្រកួនតាមផ្សារ ឬថា ការទិញវ៉ាក់សាំងរបស់រាជរដ្ឋាភិបាល មិនត្រឹមត្រូវតាមស្តង់ដារអន្តរជាតិ។

ក្រោយមក នៅពេលរាជរដ្ឋាភិបាល នៅតែបន្តការបញ្ជាទិញវ៉ាក់សាំង ដើម្បីចាក់ជូនប្រជាពលរដ្ឋ អ្នកនយោបាយរវើរវាយរូបនេះ មានទាំងអ្នកហែហមប៉ុន្មាននាក់ផង បានអំពាវនាវ តាមបែបញុះញង់អុជអាលកុំឱ្យប្រជាពលរដ្ឋទៅចាក់វ៉ាក់សាំង ដោយគេបំពុលព័ត៌មានថា វ៉ាក់សាំងនេះ គ្រាន់តែជាការយកពលរដ្ឋកម្ពុជា ធ្វើតេស្តវ៉ាក់សាំងប៉ុណ្ណោះ។

លុះក្រោយមកទៀត នៅពេលរាជរដ្ឋាភិបាល បញ្ជាទិញ វ៉ាក់សាំងបាន១,៥ លានដូស គេថាវ៉ាក់សាំងតែប៉ុណ្ណឹងចាក់ជូន ប្រជាពលរដ្ឋតែជាង២០ម៉ឺននាក់ ក្រុមអ្នកនយោបាយរវើរវាយ បាននិយាយរិះគន់ក្តែងៗថា វ៉ាក់សាំង១លានដូស ចាក់​បា​នប៉ុន្មាននាក់ទៅ? ដោយពួកគេនៅតែអំពាវនាវ រារាំងមិនឱ្យប្រជាពលរដ្ឋទៅចាក់វ៉ាក់សាំងដដែល ទោះបី​រាជ​រដ្ឋាភិបាល ប្រកាស បញ្ជាក់ជាញឹកញាប់ថា រាល់ការចាក់វ៉ាក់សាំង គឺធ្វើឡើងក្នុងលក្ខខណ្ឌ ស្ម័គ្រចិត្តក្តី។​

ពួក​អ្នកនយោបាយរវើរវាយ នៅតែព្យាយាមបង្កើតព័ត៌មានបំពុល ដើម្បីកេងចំណេញផ្នែកនយោបាយ ដ៏អាក្រក់របស់​ពួក​គេ។

 អ្វី ដែលគួរឱ្យកត់សម្គាល់ខ្លាំងបន្ថែមទៀតនោះ នៅពេលវ៉ាក់សាំងនេះ ត្រូវចាប់ផ្តើមអនុវត្តន៍ការចាក់​ទៅ​លើមន្រ្តីជួរមុខ គ្រូពេទ្យជួរមុខ ទាហាន នគរបាល ក្រុមអ្នកនយោបាយរវើរវាយ បានបំពុលព័ត៌មានបន្ថែមទៀតថា នោះឃើញទេ គេយកវ៉ាក់សាំង ដែលជាថវិកា ជាតិមកចាក់ឱ្យតែគ្នាគេទេ។ ចំណែកប្រជាពលរដ្ឋ ដែលជា​ម្ចាស់​ឆ្នោត ម្ចាស់ថវិកា ពួកគេមិនបានគិតគូរទៅវិញ។

រាល់ការលើកឡើងរបស់ក្រុមអ្នកនយោបាយរវើរវាយ ប្រសិនបើអ្នកតាមដាន តាមមិនទាន់ទេ ប្រាកដជា​ជឿស្ល៊ុប តែម្តង ព្រោះពួកគេមានភាពប៉ិនប្រសប់ ក្នុងការបត់បែន ក្រឡិចក្រឡុច ក្រឡាស់សម្តីម្តងទៅឆ្វេង ម្តងទៅ​ស្តាំ តាមមិនទាន់។

ដោយឡែកនៅប៉ុន្មានថ្ងៃនេះ ក្រុមអ្នកនយោបាយរវើរវាយ មានចលនាពីរដើរតួខុសគ្នា ដែលជាចេតនាផង អចេត​នាផង។ មានមួយក្រុម ប្រកាសកុំឱ្យប្រជាពលរដ្ឋទៅចាក់វ៉ាក់សាំង និងមានមួយក្រុមទៀត ធ្វើជារិះគន់ថា វ៉ាក់សាំងទិញមកម្តង១លានដូស តើប្រជាជនជាង១៦លាននាក់ ពេលណាទើបបានចាក់គ្រប់គ្នា?

និយាយជារួម ក្រុមអ្នកនយោបាយរវើរវាយទាំងនេះ គិតយូរៗទៅមិនដឹងថា ពួកគេធ្វើនយោបាយដើម្បីអ្វីឱ្យ​ពិត​ប្រាកដ? ដើម្បីផលប្រយោជន៍ជាតិ ប្រជាជន ឬដើម្បីផលប្រយោជន៍ផ្ទាល់ខ្លួនឯងតែប៉ុន្មាននាក់នោះ?

អ្នកនយោបាយរវើរវាយទាំងនេះ ខុសពីអ្នកនយោបាយនៃប្រទេសដទៃទៀតឆ្ងាយណាស់ ដោយសារ អ្នកនយោបាយរវើរវាយ តែងតែអំពាវនាវឱ្យបរទេសដាក់ការគាបសង្កត់ លើរាជរដ្ឋាភិបាល ឬផ្តាច់ជំនួយជាដើម ដូចជា កាលពីឆ្នាំ២០១៧កន្លងទៅ ពួកគេអំពាវនាវឱ្យសហគមន៍អឺរ៉ុប ដកប្រព័ន្ធអនុគ្រោះពន្ធពីកម្ពុជា ដើម្បីបំពេញមហិច្ឆ​តារបស់ពួកគេ ក្នុងការផ្តួលរំលំរដ្ឋាភិបាល  រហូតនៅថ្ងៃទី២០ ខែកុម្ភៈ ឆ្នាំ២០២០ សហ​គមន៍អឺរ៉ុប ក៏សម្រេចទាំង​អមនុស្សធម៌បែបនោះតាមការស្នើរបស់ពួកគេ។

សហគមន៍អឺរ៉ុប បានធ្វើរឿងដ៏ឈឺចាប់ម្តង​ទៀតមកលើប្រជាជន​កម្ពុជា ខណៈប្រជាជនកម្ពុជា ក៏ដូចជាពិភពលោកកំពុង ប្រយុទ្ធប្រឆាំង ជំងឺកូវីដ១៩ ដ៏កាចសាហាវ។ 

អ្នកនយោ​បាយរវើរវាយរបស់កម្ពុជា មិនដែលអៀនខ្មាស់ដល់អ្នកនយោបាយ នៃប្រទេសជិត​ខាង​ទេ ដែលតាំងពីដើមរៀងមក​អ្នកនយោបាយប្រ​ទេសមួយចំនួន ដួចជាថៃ មីយ៉ាន់ម៉ា ទោះបីត្រូវនិរទេសទៅ​ក្រៅប្រ​ទេស ក៏គេមិនបានអំពាវនាវ ឱ្យអន្តរជាតិ ធ្វើបាប​ប្រជាជាតិខ្លួនឯងដែរ។ បែបនេះហើយ នៅតែក្រុមអ្នកនយោ​បាយ​រវើរវាយ ដើរអួតក្តែងៗ​​ថាខ្លួន​ជាអ្នក​ស្នេហា​ជាតិទៀត។

គេនៅរង់ចាំមើល ថាតើទៅថ្ងៃខាងមុខក្រុមអ្នកនយោបាយរវើរវាយ ស្រមើស្រមៃ ដើរបំផ្លាញខ្មែរដល់ណា និងតាមរបៀប​ណាទៀត?

សំណេរយុវជន