អ្នកដំណើរចេញពីឥណ្ឌា ៥២នាក់រកឃើញឆ្លងកូវីដ ពេលទៅដល់ហុងកុង ទោះតេស្តអវិជ្ជមាន មុនពេលឡើងយន្តហោះ

អ្នកដំណើររាប់សិបនាក់នៅលើជើងហោះហើរមួយមកពីប្រទេសឥណ្ឌា បានធ្វើតេស្តវិជ្ជមានជំងឺកូវីដ-១៩ នៅពេលពួកគេមកដល់ទីក្រុង ហុងកុង។

ក្រុមមន្រ្តីបាននិយាយថា យ៉ាងហោចណាស់មនុស្ស៥២នាក់ ដែលជិះក្នុងយន្តហោះមកពីទីក្រុង ដែលី ទទួលបានលទ្ធផលអវិជ្ជមាន ក្នុងការធ្វើតេស្តមុនពេលហោះហើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី Rashida Fathima ដែលជិះយន្តហោះជាមួយប្តីនិងកូនពីរនាក់របស់នាង ជឿជាក់ថា នាងបានឆ្លងមេរោគនៅលើយន្ដហោះ បើទោះបីជាពាក់ម៉ាស សម្រាប់ការធ្វើដំណើរកាលពីថ្ងៃទី៣ខែមេសាក៏ដោយ។

និយាយពីមន្ទីរពេទ្យ នាងបានប្រាប់កាសែត Wall Street Journal ថា មានអ្នកដំណើរខ្លះក្អកខ្លាំង ក្នុងអំឡុងពេលធ្វើដំណើររយៈពេល៦ម៉ោង ខណៈអ្នកផ្សេងទៀតបានដោះម៉ាសរបស់ពួកគេចេញ ដើម្បីទទួលទានអាហារ។

ឥណ្ឌា កំពុងដោះស្រាយជាមួយការកើនឡើងយ៉ាងគំហុក នៃចំនួនអ្នកឆ្លងជំងឺកូវីដ-១៩ខណៈជំនួយអន្ដរជាតិបានទៅដល់ប្រទេសនេះហើយ ដើម្បីជួយដល់ការប្រយុទ្ធយ៉ាងស្វិតស្វាញ។

អ្នកដំណើរ ត្រូវបានអនុញ្ញាតឲ្យឡើងជិះយន្ដហោះដែលគ្រប់គ្រងដោយក្រុមហ៊ុនអាកាសចរណ៍ឥណ្ឌា Vistara លុះត្រាណាពួកគេ ធ្វើតេស្តអវិជ្ជមាន មុនពេលយន្តហោះចេញដំណើរ។

លទ្ធផលវិជ្ជមាននេះ បានលេចចេញមកក្នុងអំឡុងពេលធ្វើចត្តាឡីស័ករយៈពេល៣សប្តាហ៍ តាមវិធានការដែលត្រូវបានអនុវត្តនៅទីក្រុង ហុងកុង។

ទោះបីជាយ៉ាងណាក៏ដោយ អាជ្ញាធរហុងកុង មិនបានបង្ហាញពីចំនួនមនុស្សសរុបដែលជិះក្នុងយន្តហោះនោះទេ ប៉ុន្តែគេគិតថា អ្នកដំណើររហូតដល់ទៅ១៨៨នាក់ អាចស្ថិតនៅក្នុងយន្តហោះនោះ។

នាយកក្រុមហ៊ុន Nanda Travel ដែលមានមូលដ្ឋាននៅទីក្រុងហុងកុង បាននិយាយថា ពួកគេភ្ញាក់ផ្អើលយ៉ាងខ្លាំង ចំពោះស្ថានភាពនេះ។

អ្នកជំនាញផ្នែកសុខភាពនិយាយថា អាចមានការពន្យល់ជាច្រើនអំពីលទ្ធផលវិជ្ជមាន ចំពោះអ្នកដំណើរដែលមកដល់។

ពួកគេអាចឆ្លងរោគនៅក្នុងប្រទេសឥណ្ឌា បន្ទាប់ពីការធ្វើតេស្តមុនពេលហោះហើរ ឬលទ្ធផលអាចចេញមកខុស។

អ្នកវិទ្យាសាស្ត្រក៏លើកឡើងផងដែរថា អ្នកនៅលើយន្តហោះអាចឆ្លងកូវីដពេលធ្វើចត្តាឡីស័កនៅសណ្ឋាគារ ឬឆ្លងវីរុសបំប្លែងខ្លួន ដែលអាចរាលដាលក្នុងពេលហោះហើរ៕

ប្រែសម្រួលដោយ៖ Vann Vann

ប្រភព៖ Daily Star

ចុចអាន៖ ២សប្តាហ៍ទៀត ប្រទេសឥណ្ឌា នឹងក្លាយជា “ឋាននរក”