ក្រោយការឆ្លងកើនលើស២០លានករណី អ្នកជំនាញកំពូលព្រមានថា ប៉ុន្មានសប្តាហ៍ទៀត ឥណ្ឌានឹងជួបស្ថានភាពកាន់តែរន្ធត់

ករណីឆ្លងនិងស្លាប់ដោយសារជំងឺកូវីដ-១៩ កំពុងកើនឡើងក្នុងល្បឿនប្រកាសអាសន្ននៅក្នុងប្រទេសឥណ្ឌា ដោយមិនមានមើលឃើញសញ្ញានៃភាពធូរស្រាលនោះទេ ខណៈអ្នកជំនាញកំពូលៗបានព្រមានថា រយៈពេលប៉ុន្មានសប្តាហ៍ខាងមុខ ប្រទេសដែលមានប្រជាជនជិត១.៤ពាន់លាននាក់មួយនេះ នឹងជួបស្ថានភាពកាន់តែរន្ធត់។

ចំនួនករណីឆ្លងវីរុសកូវីដ-១៩ផ្លូវការរបស់ប្រទេសឥណ្ឌា បានកើនឡើងដល់២០,២៨២,៨៣៣នាក់គិតត្រឹមថ្ងៃអង្គារ ពោលគឺកើនឡើងសឹងទ្វេដងក្នុងរយៈពេលបីខែកន្លងមកនេះ ខណៈការស្លាប់បានកើនដល់២២២,៤០៨នាក់។

ទោះបីជាយ៉ាងណាក៏ដោយ តួលេខពិតប្រាកដត្រូវបានគេជឿថា ខ្ពស់ជាងនេះឆ្ងាយណាស់ ខណៈតួលេខមិនច្បាស់លាស់នេះ បានឆ្លុះបញ្ចាំងពីបញ្ហានៅក្នុងប្រព័ន្ធថែទាំសុខភាពរបស់ឥណ្ឌា។

ការឆ្លងបានកើនឡើងយ៉ាងគំហុកនៅក្នុងប្រទេសឥណ្ឌាចាប់តាំងពីខែកុម្ភៈមក ដោយមានការស្តីបន្ទោសទៅលើវីរុសបំប្លែងខ្លួនដែលឆ្លងសាហាវ ក៏ដូចជាការសម្រេចចិត្តរបស់រដ្ឋាភិបាលក្នុងការអនុញ្ញាតឲ្យហ្វូងមនុស្សទ្រង់ទ្រាយធំប្រមូលផ្តុំគ្នាសម្រាប់ពិធីបុណ្យសាសនាហិណ្ឌូ និងការជួបជុំនយោបាយមុនពេលបោះឆ្នោតរដ្ឋផងដែរ៕

ប្រែសម្រួលដោយ៖ Vann Vann

ប្រភព៖ AP

ចុចអាន៖ កូវីដផ្ទុះខ្លាំងនៅឥណ្ឌា តែប្រទេសមួយជាប់នោះ មានការឆ្លងកើនឡើងដល់ទៅ១,២០០ភាគរយ