រឿងអីឥណ្ឌាមិនឆ្លងខ្លាំង បើប្រជាជនចេះពាក់ម៉ាសត្រឹមត្រូវបានតែ១៤ភាគរយប៉ុណ្ណោះ

តាមរយៈការសិក្សាស្រាវជ្រាវដែលធ្វើឡើងទៅលើទីក្រុងចំនួន ២៥ នៅក្នុងប្រទេសបានរកឃើញថា មានប្រជាជនឥណ្ឌាតែ ១៤ ភាគរយប៉ុណ្ណោះដែលពាក់ម៉ាសបានត្រឹមត្រូវ។ នេះបើតាមការដកស្រង់សម្ដីពីក្រសួងសុខាភិបាលឥណ្ឌា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយថា ប្រជាជនឥណ្ឌាពាក់កណ្ដាលបានពាក់ម៉ាសពិតមែន ប៉ុន្តែក្នុងនោះមានប្រមាណ ៦៤ ភាគរយពាក់តែត្រឹមមាត់ប៉ុណ្ណោះ ចំណែក ២០ ភាគរយនៃពួកគេពាក់ម៉ាសត្រឹមតែចង្កា ហើយ ២ ភាគរយទៀតពាក់លើកញ្ចឹងក និងមានតែ ១៤ ភាគរយទេដែលពាក់បានត្រឹមត្រូវបិទរហូតដល់ច្រមុះ។ ចំណែក ពលរដ្ឋពាក់កណ្តាលដែលនៅសល់មិនបានពាក់ម៉ាសទាល់តែសោះ។

ពេលនេះ រដ្ឋាភិបាលឥណ្ឌាកាន់តែមានក្ដីព្រួយបារម្ភខ្លាំងឡើង នូវការធ្វេសប្រហែសរបស់ពលរដ្ឋ ខណៈអ្នកជំងឺកូវីដ-១៩នៅក្នុងប្រទេស ពុំទាន់មានសញ្ញាថមថយនៅឡើយ។

ដោយមើលឃើញនូវកំហុសឆ្គងពេលពាក់ម៉ាស រដ្ឋាភិបាលបានចុះផ្សព្វផ្សាយនិងណែនាំប្រជាជនឥណ្ឌាឱ្យពាក់ម៉ាសខ្ជាប់ខ្ជួននិងត្រឹមត្រូវតាមវេជ្ជសាស្ត្រ ទើបចៀសបាននូវការឆ្លងរោគ។

ការណែនាំបានបន្ថែមថា ម៉ាសពេទ្យគួរពាក់តែម្តងបានហើយ បើយកល្អគួរពាក់ម៉ាសក្រណាត់ដែលអាចប្រើរហូតដល់ទៅ ៥ ដង បើសិនបោកសម្អាត និងទុកនៅកន្លែងស្ងួត។

គួរំឭកថា កាលពីថ្ងៃព្រហស្បតិ៍ ប្រទេសឥណ្ឌាបានរាយការណ៍អ្នកឆ្លងកូវីដ-១៩ ចំនួន ២៧៦,១១០ នាក់ និងស្លាប់ ៣,៨៧៤ នាក់ ក្នុងរយៈពេល ២៤ ម៉ោងចុងក្រោយ៕

ប្រែសម្រួល៖ សន្យា

ប្រភព៖ Hindustan Times

ចុចអាន៖ អ្នកជំនាញព្រមានអំពីគ្រោះថ្នាក់ចំពោះអ្នកខ្ជិលពាក់ម៉ាស

ចុចអាន៖ តើអ្នកនិយមចាក់ Botox រងផលប៉ះពាល់ដែរទេ ក្រោយពេលចាក់វ៉ាក់សាំងកូវីដ-១៩?