កូវីដ-១៩

រដ្ឋបាលរាជធានី សម្រេចបន្ថែមទីតាំងចាក់វាក់សាំងបង្ការជំងឺកូវីដ-១៩ ជូនកុមារ និងយុវវ័យ នៅមន្ទីរសម្រាកព្យាបាល អូឡាំព្យា មេឌីខល ដោយឥតគិតថ្លៃ

បានផុស

៥ years មុន

នៅ

ថ្ងៃពុធ ៤ សីហា ២០២១

ដោយ

ភ្នំពេញ ៖ រដ្ឋបាលរាជធានីភ្នំពេញ បានសម្រេចបន្ថែមទីតាំងចាក់វ៉ាក់សាំងបង្ការជំងឺកូវីដ-១៩ ជូនកុមារ និងយុវវ័យ ដែលមានអាយុចាប់ពី ១២ ដល់ក្រោម ១៨ឆ្នាំទៅ មន្ទីរសម្រាកព្យាបាល អូឡាំព្យា មេឌីខល ដែលបានស្ម័គ្រចិត្តចូលរួម ផ្តល់សេវាចាក់វាក់សាំងបង្ការជំងឺកូវីដ-១៩ សម្រាប់កុមារ និងយុវវ័យខាងលើដោយឥតគិតថ្លៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើយោងតាមសេចក្តីជូនដំណឹង របស់រដ្ឋបាលរាជធានីភ្នំពេញ នៅល្ងាចថ្ងៃទី០៤សីហានេះ ដែលក្នុងសេចក្តីជូនដំណឹងនេះមានន័យថា រដ្ឋបាលរាជធានីភ្នំពេញ មានកិត្តិយសសូមជម្រាបជូនបងប្អូនប្រជាពលរដ្ឋដែលជាមាតាបិតា និងអាណាព្យាបាល ព្រមទាំងសាធារណជនទាំងអស់មេត្តាជ្រាបថា កន្លងមករដ្ឋបាលរាជធានីភ្នំពេញធ្លាប់បានជូនដំណឹងអំពីយុទ្ធនាការចាក់វ៉ាក់សាំង សម្រាប់កុមារ និងយុវវ័យដែលមានអាយុចាប់ពី ១២ឆ្នាំ ដល់ក្រោម ១៨ឆ្នាំ នៅតាមមណ្ឌលសុខភាព និងមន្ទីរ ពេទ្យបង្អែក សរុបចំនួន ៣៩ទីតាំង នៅក្នុងភូមិសាស្ត្រខណ្ឌទាំង១៤ នៃរាជធានីភ្នំពេញចាប់ពីថ្ងៃទី០១ រហូតដល់ថ្ងៃទី១៤ ខែសីហា ឆ្នាំ២០២១ សម្រាប់ដូសទី១។ បន្ទាប់ពីការប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ – សម្រាប់ កុមារ និងយុវវ័យដោយប្រមុខរាជរដ្ឋាភិបាលកម្ពុជា និងក្រោយពីទទួលបានការជូនដំណឹងរបស់ក្រសួងស្ថាប័នមានសមត្ថកិច្ចពាក់ព័ន្ធ រដ្ឋបាលរាជធានីភ្នំពេញ សង្កេតឃើញថា មានមាតាបិតា និងអាណាព្យាបាលជាច្រើនបាននាំបុត្រធីតា និងសាច់ញាតិរបស់ខ្លួនមកទទូលវ៉ាក់សាំងបង្ការជំងឺកូវីដ-១៩មានចំនួនយ៉ាងច្រើនកុះករ ដែលកាយវិការនេះបានបង្ហាញ ឱ្យឃើញពីការរួមចំណែករបស់ប្រជាពលរដ្ឋក្នុងការទប់ស្កាត់ការរីករាលដាលនៃជំងឺកូវីដ-១៩ ជាពិសេសការចាក់វ៉ាក់សាំង ដើម្បីបង្កើតភាពស៊ាំក្នុងសហគមន៍ ដើម្បីជំរុញឱ្យការចាក់វ៉ាក់សាំងប្រព្រឹត្តទៅបានលឿន និងឆាប់រហ័សស្របតាម ផែនការកំណត់ រដ្ឋបាលរាជធានីភ្នំពេញ អនុញ្ញាតជូន មន្ទីរសម្រាកព្យាបាល អូឡាំព្យាមេឌីខល ដែលបានស្ម័គ្រចិត្តចូលរួម ផ្តល់សេវាចាក់វ៉ាក់សាំងបង្ការជំងឺកូវីដ-១៩ សម្រាប់កុមារ និងយុវវ័យដែលមានអាយុចាប់ពី ១២ឆ្នាំ ដល់ក្រោម ១៨ឆ្នាំ ដោយឥតគិតថ្លៃ។

អាស្រ័យហេតុនេះ សូមមាតាបិតា នឹងអាណាព្យាបាល ដែលមានទីលំនៅបច្ចុប្បន្ន ស្ថិតក្នុងខណ្ឌ៧មករា អញ្ជើញយកបុត្រធីតា និងសាច់ញាតិរបស់ខ្លួនទៅទទួលយកសេវាចាក់វ៉ាក់សាំងដោយឥតគិតថ្លៃនៅ មន្ទីរសម្រាកព្យាបាល អូឡាំព្យា មេឌីខល ដែលមានទីតាំងនៅអូឡាំព្យាស៊ីធី អតារស៊ី៥ ផ្លូវ១៦១ សង្កាត់វាលវង់ ខណ្ឌ៧មករា។

ទន្ទឹមនឹងនេះ រដ្ឋបាលរាជធានីភ្នំពេញ សូមអំពាវនាវ និងលើកទឹកចិត្តដល់មន្ទីរសម្រាកព្យាបាលឯកជនទាំងអស់ ដែលមានបំណងចង់ចូលរួមផ្តល់សេវាចាក់វ៉ាក់សាំងដើម្បីការពារខឿនសុខុមាលភាពសាធារណៈ ដោយឥតគិតថ្លៃជូនដល់ កុមារ និងយុវវ័យដែលមានអាយុចាប់ពី ១២ឆ្នាំ ដល់ក្រោម ១៨ឆ្នាំ អាចធ្វើការស្នើសុំដោយភ្ជាប់មកជាមួយនូវឯកសារគតិយុត្តិ និងលិខិតបញ្ជាក់ផ្សេងៗចេញដោយស្ថាប័នមានសមត្ថកិច្ច មក រដ្ឋបាលរាជធានីភ្នំពេញ ដើម្បីជាមូលដ្ឋានក្នុងការពិនិត្យ សម្រេចជូន។

ជាថ្មីម្តងទៀត រដ្ឋបាលរាជធានីភ្នំពេញ សូមក្រើនរំលឹកដល់មាតាបិតា និងអាណាព្យាបាលដែលត្រូវនាំបុត្រធីតា ឬសាច់ញាតិ មកទទូលវ៉ាក់សាំងបង្ការជំងឺកូវីដ-១៩ ត្រូវប្រកាន់ខ្ជាប់ឲ្យបានជាដាច់ខាតនូវការរក្សាគម្លាតសុវត្ថិភាព ការពាក់ ម៉ាស តម្រង់ជួរជៀសវាងការឈរប្រជ្រៀតគ្នា កៀកគ្នា ណែនណាន់តាន់តាប់ ហើយត្រូវប្រកាន់ខ្ជាប់ការចូលរួមអនុវត្តនូវ វិធានការសុខាភិបាល និងវិធានការ “៣ ការពារ និង ៣កុំ” របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឈរលើស្មារតីស្រឡាញ់ជាតិ សហគមន៍ អាយុជីវិតផ្ទាល់ខ្លួននិងក្រុមគ្រួសារ ក្នុងឆន្ទៈរួមគ្នាជាធ្លុងមួយ ដើម្បីឈានទៅលុបបំបាត់ និងកាត់ផ្ដាច់ការឆ្លងរាលដាលជំងឺកូវីដ-១៩ ក្នុង “ព្រឹត្តិការណ៍សហគមន៍ ២០កុម្ភៈ ២០២១- ឱ្យបានឆាប់នាពេលខាងមុខនេះ។

ខ្លឹមសារដូចបានជម្រាបជូនខាងលើនេះ សូមបងប្អូនប្រជាពលរដ្ឋក្នុងភូមិសាស្ត្ររាជធានីភ្នំពេញដែលជាមាតា បិតា និងអាណាព្យាបាល ព្រមទាំងសាធារណជនទាំងអស់ មេត្តាជ្រាបជាព័ត៌មាន និងចូលរួមសហការអនុវត្តការងារនេះ ឲ្យមានប្រសិទ្ធភាព និងប្រកបដោយស្មារតីទទួលខុសត្រូវខ្ពស់៕

ដោយ ៖ ស្រីរ័ត្ន

Kampuchea Thmey Daily

កូវីដ-១៩

ព័ត៌មានពេញនិយម

Kampuchea Thmey Daily

You may like

ព័ត៌មានពេញនិយម