អ្នកគាំទ្របារម្ភក្រោយតារាកំប្លែង ប៉េងប៉ោង ចូលពេទ្យវះកាត់ភ្នែក ជាលើកទី២

តារាកំប្លែងអ្នកនាង មឿន និមល ហៅ ប៉េង ប៉ោង ថ្មីៗមុននេះ បានធ្វើឲ្យមហាជនអ្នកគាំទ្រមានការភ្ញាក់ផ្អើល និងចាប់អារម្មណ៍គ្រប់គ្នាបន្ទាប់ពីតារាកំប្លែងរូបនេះ ទម្លាយពីអាការ:ជំងឺភ្នែកដោយត្រូវចូលវះកាត់ជាលើកទី២ នៅមន្ទីពេទ្យ។

តាមការកត់សម្គាល់តារាកំប្លែងអ្នកនាង មឿន និមលហៅ ប៉េងប៉ោង បច្ចុប្បន្នកំពុងមានជំងឺប្រចាំកាយត្រូវព្យាបាលយកចិត្តទុកដាក់បំផុតនោះជារឿយៗអ្នកនាងតែងតែចេញមកបញ្ជាក់ពីអាការ:ជំងឺប្រាប់ដល់មហាជនអ្នកគាំទ្រ ខណ:រាល់ថ្ងៃអ្នកនាងក៏មានស្វាមីដ៏ល្អចាំមើលថែផ្តល់កម្លាំងចិត្តផងដែរ។

ជាក់ស្តែង កាលពីថ្ងៃទី១៧ ខែតុលា ឆ្នាំ២០២៥ តារាកំប្លែងអ្នកនាង ប៉េងប៉ោង បានបង្ហោះរូបភាពដែលកំពុងស្ថិតនៅមន្ទីពេទ្យត្រៀមក្នុងការវះកាត់ភ្នែកធ្វើឱ្យមហាជនអ្នកគាំទ្រ និងមិត្តសិល្ប:បង្ហាញការព្រួយបារម្ភសួរនាំគ្រប់គ្នា។ អ្នកនាង ប៉េងប៉ោង បានបញ្ជាក់ថា មានតែពាក្យជូនពរខ្លួនឯងវះកាត់ភ្នែកស្ដាំជាលើកទីពីរបានជោគជ័យ។ តាមរយ:ដំណឹងនេះដែរ ក៏មានការជូនពរពីសំណាក់អ្នកគាំទ្រ និងអ្នកប្រើប្រាស់បណ្តាញសង្គមហ្វេសប៊ុកមួយចំនួន ទៅកាន់តារាកំប្លែង ប៉េងប៉ោង ផងដែរ។

តារាកំប្លែងអ្នកនាង ប៉េង ប៉ោង កាលពីថ្មីៗកន្លងទៅ ក៏ធ្លាប់បានធ្វើឲ្យមហាជនអ្នកគាំទ្រមានការភ្ញាក់ផ្អើលនិងចាប់អារម្មណ៍ផងដែរបន្ទាប់ពីទម្លាមយនូវអាការ:ជំងឺទឹកនោមប្រៃកាន់តែធ្វើទុក្ខខ្លាំងលើរូបនាង។ កាលណោះជំងឺទឹកនោមប្រៃនេះគឺបានទុក្ខមកលើអ្នកនាង ប៉េងប៉ោង ដូចជា មានសភាពហើមជើង និងធ្វើទុក្ខនៅក្នុងខ្លួនប្រាណយ៉ាងពិបាកទៀតផង៕ ចាន់រ៉ា