ល្អហួស ថា បើឈ្នះមកុដឆ្នាំនេះ នឹងយកការពិតទៅប្រាប់អន្តរជាតិឱ្យដឹងកាន់តែច្បាស់ពីល្បិចកលដ៏កខ្វក់ផ្ទះលេខ២

អតីតបវរកញ្ញាវ័យក្មេង ជូរី ល្អហួស បានអះអាងឆន្ទ:របស់ខ្លួនថា ប្រសិនបើឆ្នាំនេះខ្លួនឈ្នះមកុដក្នុងការប្រកួតវិស័យបវរកញ្ញាក្នុងស្រុកនោះគឺខ្លួននឹងយកចម្រៀង Original ចម្រៀងពិតយកទៅច្រៀងឱ្យអន្តរជាតិបានស្តាប់ល្បិតកលដ៏កខ្វក់របស់ចោរឈ្លានពាន។

ក្នុងន័យនេះ ជូរី ល្អហួស ចង់និយាយដោយសំដៅថា បើខ្លួនមានឱកាសតំណាងកម្ពុជាទៅប្រកួតនៅលើឆាកអន្តរជាតិខ្លួននឹងបង្ហាញឲ្យអន្តរជាតិបានដឹងនូវបញ្ហាសង្គ្រាមឈ្លានពានរបស់សៀម ដែលជាអ្នកចាប់ផ្តើមមកលើបូរណភាពទឹកដីកម្ពុជាមុន។ ការលើកឡើងរបស់ ជូរី ល្អហួសនេះ គឺក្រោយបវរកញ្ញាថៃម្នាក់បំភ្លៃការពិតបោកអន្តរជាតិតាមរយៈឆាកប្រកួតកម្មវិធី Miss Grand International កាលពីថ្មីៗនេះ។

ល្អហួស បានបញ្ជាក់ថាបើសិនជា ល្អហួស បានឈ្នះមកុដក្នុងស្រុកនៅក្នុងឆ្នាំនេះហើយតំណាងអោយក ម្ពុជាទៅប្រកួតនៅលើឆាកអន្តរជាតិជាង៤០ ប្រទេស នៅប្រទេសឥណ្ឌា កូនស្រីកម្ពុជាមួយរូបនេះនិងយកចម្រៀងOriginal ចម្រៀងពិត យកទៅច្រៀងអោយអន្តរជាតិបានស្តាប់ម្តង ។

ជូរី ល្អហួសបានបន្តថាចង់ដឹងថាតើមួយណាពិរោះជាបងមួយណារវាងចម្រៀង original ពិតប្រាកដដែលដិតដាមចង់ចាំនៅក្នុងខួរក្បាលនិងបេះដូងនិងចម្រៀង Copy ដែលអ្នកប្រឌិតឡើងសរសេរមកយ៉ាងកខ្វក់ ទន្ទេញយកមកច្រៀងកុហកមនុស្សពេញពិភពលោកនោះផ្ការំដួលកម្ពុជាមួយទងនេះ និងរកយុត្តិធម៌ និងភាពត្រឹមត្រូវជូនប្រទេសកម្ពុជាឱ្យទាល់តែបាន។

ទោះបីយ៉ាងណា មានមហាជនអ្នកគាំទ្រនិងអ្នកតាមដានវិស័យបវរកញ្ញានៅកម្ពុជាមួយចំនួនបានលើកទឹកចិត្ត និងជូនពរឲ្យល្អហួស សម្រេចបំណងក្នុងការប្រកួតវគ្គផ្តាច់ព្រ័ត្រ Miss Teen Cambodia 2025 ក្លាយជាម្ចាស់មកុដដើម្បីមានឱកាសឡើងទៅកាន់ឆាកអន្តរជាតិ៕ ចាន់រ៉ា