ដេត ស្រីនាឌ ត្រៀមតំណាងកម្ពុជាចូលរួមកម្មពិធីលំដាប់អន្តរជាតិនៅវៀតណាម ខណ:ប្រកាសឆន្ទ:បែបនេះ

អតីតបវរកញ្ញា Miss Planet Cambodia 2024 កញ្ញា ដេត ស្រីនាឌ បានប្រកាសការតាំងចិត្តខ្ពស់ បង្ហាញឆន្ទ:របស់ខ្លួនដើម្បីនាំយកទង់ជាតិកម្ពុជាទៅកាន់ពិភពលោកម្តងទៀត ខណ:កំពុងត្រៀមតំណាងកម្ពុជា ចូលរួមកម្មពិធីលំដាប់អន្តរជាតិនៅវៀតណាម។

ការប្រកាសឆន្ទ:របស់កញ្ញា ដេត ស្រីនាឌ បន្ទាប់ពីនាងទទួលបានឱកាសជ្រើសរើសឱ្យក្លាយជាតារាតំណាងកម្ពុជា សម្រាប់ដើរបង្ហាញក្នុងវិធី Global Student Fashion Week ដែលប្រជុំទៅដោយតារាបង្ហាញម៉ូតលេចធ្លោជាច្រើនមកពីបណ្តាប្រទេសផ្សេងៗគ្នានៅជុំវិញពិភពលោក។

តាមការបញ្ជាក់ឱ្យដឹងពីកញ្ញាដេត ស្រីនាឌចំពោះកម្ម វិធីនេះគឺរៀបចំធ្វើឡើងរយៈពេល២ថ្ងៃ ដោយចាប់ថ្ងៃ ទី១៥ ដល់ថ្ងៃទី១៧ខែមីនាឆ្នាំ២០២៥ នៅទីក្រុងហា ណូយ ប្រទេសវៀតណាមខណ: ដេត ស្រីនាឌ បានប្តេជ្ញាចិត្តនឹងធ្វើឱ្យបានល្អបំផុតដើម្បីលើកមុខមាត់ ប្រទេសជាតិ។

អតីតបវរកញ្ញា Miss Planet 2024 រូបនេះ បានរៀបរាប់ថា ខ្លួននឹងលើកទង់ជាតិកម្ពុជាម្តងទៀត​ទៅកាន់ពិភពលោក។ កញ្ញាថា “នាងខ្ញុំពិតជារំភើបដែលត្រូវបានជ្រើសរើសជាតារាបង្ហាញម៉ូតតំណាងឱ្យកម្ពុជា នៅឯប្រទេសវៀតណាម ក្នុងចំណោមតារាបង្ហាញម៉ូតជុំវិញពិភពលោកនៅក្នុងកម្មវិធី Global Student Fashion Week ។

កញ្ញា ដេត ស្រីនាឌ បាននិយាយបន្ថែមថា សូមចូលរួមជាមួយនាង ដើម្បីបំពេញដំណើរនេះនៅទីក្រុងហាណូយប្រទេសវៀតណាម ចន្លោះថ្ងៃទី ១៥-១៧ ខែមីនា ឆ្នាំ២០២៥ ក្នុងកម្មវិធី Global Student Fashion Week៕ អត្ថបទ៖ ចាន់រ៉ា