២ប្រទេសនៅអាស៊ីអាគ្នេយ៍ ហាមបញ្ចាំងខ្សែភាពយន្ត Uncharted ដោយសារផែនទី សមុទ្រចិនខាងត្បូង

ប្រទេសហ្វីលីពីន បានហាមឃាត់ការបញ្ចាំងខ្សែភាពយន្តហូលីវូដ “Uncharted” ដោយសារតែមានឈុតមួយ បង្ហាញពីផែនទីសមុទ្រចិនខាងត្បូងដែលមានជម្លោះ។ នេះបើយោងតាមការលើកឡើងពីក្រសួងការបរទេសហ្វីលីពីន នៅថ្ងៃពុធ ទី២៧ ខែមេសា។

បម្រាមនេះកើតឡើងភ្លាមៗ បន្ទាប់ពីប្រទេសវៀតណាម ដែលជាភាគីមានជម្លោះពាក់ព័ន្ធសមុទ្រចិនខាងត្បូងផងដែរនោះ ក៏បានហាមឃាត់ខ្សែភាពយន្តបែប Action របស់ផលិតកម្ម Sony Pictures ដែលសម្តែងដោយ Tom Holland និង Mark Wahlberg ដូចគ្នា។

ឈុតរយៈពេល២វិនាទី នៅក្នុងខ្សែភាពយន្តនេះ មានបង្ហាញរូបភាពនៃអ្វីដែលគេហៅថាជា ខ្សែបន្ទាត់ប្រាំបួនឆ្នូត ដែលសម្គាល់ការទាមទាររបស់ចិននៅក្នុងសមុទ្រចិនខាងត្បូង។

ខ្សែបន្ទាត់រាងអក្សរ U នេះគឺជាលក្ខណៈពិសេសមួយ ដែលត្រូវបានប្រើប្រាស់នៅលើផែនទីរបស់ចិន ដើម្បីបង្ហាញពីដែនសមុទ្ររបស់ខ្លួននៅក្នុងតំបន់ដែលតៃវ៉ាន់ វៀតណាម ព្រុយណេ ម៉ាឡេស៊ី ហ្វីលីពីន សុទ្ធតែប្រជែងទាមទារ។

សេចក្តីសម្រេចឆ្នាំ២០១៦ ដោយតុលាការមជ្ឈត្តកម្មនៅទីក្រុងឡាអេ បានច្រានចោលការទាមទាររបស់ប្រទេសចិនចំពោះផ្លូវទឹកស្ទើរតែទាំងមូល។ ទោះបីជាយ៉ាងណាក៏ដោយ ក្រុងប៉េកាំងមិនបានចូលរួមក្នុងដំណើរការរបស់តុលាការ និងមិនទទួលស្គាល់សេចក្តីសម្រេចនេះទេ៕

ប្រែសម្រួល៖ សន្យា

ប្រភព៖ Bangkok Post

ចុចអាន៖ អារ៉ាប៊ីសាអូឌីត ហាមបញ្ចាំងរឿង Doctor Strange ក្រោមហេតុផលដ៏រសើបមួយ