“Kung Fu Hustle” វគ្គ២ ត្រៀមបង្ហាញវត្តមានឆាប់ៗ ក្រោយវគ្គ១ បញ្ចាំងចប់ជិត ២០ឆ្នាំ

បន្ទាប់​ពីវគ្គ១ ​​បញ្ចាំងចប់​អស់​រយៈពេល​ជិត ២ទស្សវត្សរ៍​ ផ្ទាំង​ផ្សព្វផ្សាយ​ភាពយន្ត Kung Fu 2 ​បានចេញ​ជា​ផ្លូវ​ការហើយ ធ្វើឱ្យអ្នកគាំទ្ររង់ចាំយ៉ាងអន្ទះសារ ចំពោះការត្រឡប់មកវិញនៃខ្សែភាពយន្តនេះ។

ថ្មីៗនេះ អ្នកដឹកនាំរឿង ទិនហ្វី (Stephen Chow) បានបង្ហាញ Poster ផ្លូវការអំពីភាគទី២ នៃភាពយន្តរឿង Kung Fu’s Hustle ដោយបានធ្វើឲ្យបណ្ដាញសង្គមអាស៊ីភ្ញាក់មិនស្ទើរ ​ព្រោះភាពយន្តនេះចប់ការបញ្ចាំងអស់ពេល ១៨ឆ្នាំមកហើយ។

Kung Fu’s Hustle ជាភាពយន្តបែបកំប្លែង និងក្បាច់គុនបុរាណចិន ដែលសម្ដែងដោយអ្នកដឹកនាំរឿងផ្ទាល់តែម្ដង។ វាធ្លាប់បានវាយលុកលើអេក្រង់ហុងកុង កំលុងឆ្នាំ២០០៤ ហើយស្នាដៃមួយនេះអាចរកប្រាក់ចំណូលឱ្យទិនហ្វីសរុបជាង ១០២លានដុល្លារ បន្ទាប់ពីការបញ្ចាំងលើកដំបូង។

ភាពយន្ត Kung Fu Hustle ត្រូវបានគេចាត់ទុកជាភាពយន្តដ៏ជោគជ័យអំឡុងឆ្នាំនោះ មិនថានៅប្រទេសចិន និងនៅលើទីផ្សារអន្តរជាតិនោះទេ។ រហូតមកដល់បច្ចុប្បន្ន វានៅតែជាភាពយន្តដែលមានឥទ្ធិពលបំផុត ក្នុងអាជីពផលិតភាពយន្តហុងកុង។

បន្ទាប់ពីជោគជ័យយ៉ាងត្រចះត្រចង់ ទិនហ្វីដែលជាអ្នកដឹកនាំរឿងផង និងជាតួសម្ដែងផង ត្រៀមថតវគ្គ២ នៅក្នុងឆ្នាំ២០០៥ ប៉ុន្តែដោយសាមានបញ្ហាស្មុគស្មាញជាច្រើន ទើបលោកប្រកាសផ្អាកថតតាំងពីពេលនោះមក។

យ៉ាងណាមិញ ឆ្នាំ២០២២នេះ វគ្គបន្តរបស់ Kung Fu Hustle នឹងបង្ហាញវត្តមានជូនទស្សនិកជនទស្សនាម្ដងទៀត ដែលវាមានសាច់រឿង និងខ្លឹមសារខុសគ្នាពីភាគដំបូង ប៉ុន្តែនឹងនៅតែមានភាពស្រដៀងគ្នា ដែលវិលជុំវិញប្រធានបទសិល្បៈក្បាច់គុនដដែល ដើម្បីកុំឱ្យបាត់បង់ខ្លឹមសារដើមនៃភាពយន្ត។ ការរៀបចំវគ្គបន្តនេះនឹងថតនៅក្រៅប្រទេស ដោយមានការចូលរួមពីតួអង្គថ្មីៗជាច្រើន។ ក្នុងនោះអ្នកគាំទ្រ សង្ឃឹមថាតួអង្គលោក ទិនហ្វី នឹងត្រឡប់មកសម្តែងក្នុងរឿង Kung Fu 2 វិញផងដែរ។

Kung Fu Hustle ​ជា​ភាពយន្ត​ដែលល្បីល្បាញជាច្រើន​ជំនាន់មក​ហើយ។ ភាពយន្តនេះបានបន្សល់ទុកនូវចំណាប់អារម្មណ៍យ៉ាងជ្រាលជ្រៅនៅក្នុងបេះដូងរបស់ទស្សនិកជនទាំងកំលុងនិងក្រោយពេលចាក់ផ្សាយ។ គេសង្ឃឹមថា វគ្គបន្តរបស់ Kung Fu Hustle នឹងផ្ទុះឡើងម្តងទៀតនៅលើកញ្ចក់អេក្រង់អន្តរជាតិ បន្ទាប់ការទន្ទឹងរង់ចាំរបស់អ្នកគាំទ្រអស់រយៈពេលជិត ២០ឆ្នាំកន្លងមក៕

ប្រែសម្រួល៖ សន្យា

ចុចអាន៖ រំលឹកអតីកាលភាពយន្ត ចិន-ហុងកុង ពីតារាកំប្លែង​វោហារសព្ទ​ ទិនហ្វី ធ្លាប់កក្រើកនៅ កម្ពុជា

ចុចអាន៖ ប្រវត្តិសិល្បៈជិត ៣០ឆ្នាំ របស់កំពូលតារាសម្ដែងចិន ត្រចៀកកាំ (Zhao Wei)