អ្នកស្រី ប៊ុនច័ន្ទ សោភា អតីតតារាភាពយន្តទសវត្សរ៍៦០-៧០ ទទួលមរណភាព

អតីតតារាភាពយន្តខ្មែរនាទសវត្ស៦០-៧០ អ្នកស្រី ប៊ុនច័ន្ទ សោភា មានឈ្មោះដើម ឆាន់ បូយីប បានទទួលមរណភាពហើយ កាលពីថ្មីៗនេះ។ នេះបើយោងតាមការបញ្ជាក់របស់ក្រុមព្រះសុរិយា ។

ប្រភពពីក្រុមព្រះសុរិយាបានឲ្យដឹងថា ក្រុមខ្លួនទើបតែរកឃើញអ្នកស្រីកាលពីដើមខែកក្កដា ឆ្នាំ២០២១ ដោយកន្លងទៅអ្នកស្រីបានរស់នៅយ៉ាងស្ងៀមស្ងាត់ លាក់ខ្លួនកសាងជីវភាពថ្មីឆ្ងាយពីវិស័យសិល្ប:ភាពយន្តខ្មែរ តាំងពីរបបខ្មែរក្រហមបញ្ចប់ទៅម្ល៉េះ។ អ្នកស្រី ប៊ុនច័ន្ទ ​សោភា​ បានប្រឡូកក្នុងវិស័យសិល្បៈភាពយន្តខ្មែរ តាមរយៈលោក​ យក់​ ប៊ុនឡេង​ សិល្បករល្ខោនបាសាក់​ និងជាតួសម្តែងភាពយន្តផងដែរ។

អ្នកស្រីបានចូលសម្តែងជាតួរងនាចុងសប្តាហ៍សម័យសង្គមរាស្រ្តនិយម រហូតបានទទួលតួនាទីជាតួឯកក្នុងសម័យសាធារណរដ្ឋខ្មែរដូចជារឿង ត្រពាំងពាយ រឿង ផ្កាថ្កុលមាស រឿង ផលកម្មខ្ញុំជាដើម។ ប្រវត្តិ និងសា្នដៃសំខាន់ៗរបស់អ្នកស្រី ប៊ុន ចន្ទសោភា ក្រុមព្រះសុរិយាកំពុងចងក្រងនិងផ្សព្វផ្សាយខ្លះៗរួចមកហើយ។

សូមបញ្ជាក់ថា អ្នកស្រីបានទទួលមរណ:ភាព នៅថ្ងៃទី៥ ខែឧសភា ឆ្នាំ២០២២ ​នាគេហដ្ឋានរបស់អ្នកស្រី ភូមិព្រែកស្វាយ ក្នុងសង្កាត់កោះរ៉ុង ខេត្តព្រះសីហនុ ក្នុងជន្មាយុ ៧៣ឆ្នាំ ដោយរោគាពាធ។

តាមរយ:ដំណឹងមរណ:ទុក្ខនេះមហាជនក៏ដូចជាអ្នកស្នេហាវិស័យសិល្បៈខ្មែរ មុនឆ្នាំ១៩៧៥ បានចូលរួមរំលែកទុក្ខដ៏ក្រៀមក្រំនេះជាមួយក្រុមគ្រួសារនៃសព និងសូមបួងសួងដល់ដួងវិញ្ញាណក្ខន្ធអ្នកស្រីសូមបានទៅកាន់សុគតិភព កុំបីឃ្លាងឃ្លាត៕

អត្ថបទ៖ ចាន់រ៉ា