រំឭកស្នាដៃភាពយន្តពីររឿងរបស់កវី​ស្ទឹង​សង្កែ គង្គ ប៊ុនឈឿន នាអំឡុងឆ្នាំ ១៩៩១

ទស្សនិកជនបានដឹងហើយថា លោកគង្គ ប៊ុនឈឿន គឺជាកវីនិពន្ធខ្មែរជំនាន់ដើមដ៏ល្បីឈ្មោះមួយរូបនៅក្នុងទសវត្សរ៍​ទី​៥០ រហូតមក។ លោកមានរហ្សនាមថាជាកវីស្លាបបកាមាសនៃដងស្ទឹងសង្កែ។

លោកមានជំនាញខាងផ្នែកនិពន្ធ និងមានអាជីពនិពន្ធចម្រៀង និពន្ធអត្ថបទ និងដឹកនាំរឿង។ ស្នាដៃនិពន្ធមាននិពន្ធទំនុកច្រៀងនិងនិពន្ធរឿងប្រលោកលោកជាដើម។

តាម​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ឯកសារមួយចំនួនដែលបានស្រាវជ្រាវនិងរៀប រាប់ពីប្រវត្តិកវីជើងចាស់ដែលមានកេរ្តិ៍ឈ្មោះល្បីរន្ធឺនោះគឺលោក គង្គ ប៊ុនឈឿន បានឲ្យដឹងថា លោកគង្គ ប៊ុនឈឿន គឺជាបុគ្គលម្នាក់ដែរបានបន្សល់ទុកនូវស្នាដៃជាច្រើនឲ្យប្រជាជនខ្មែរចង់ចាំពុំភ្លេច ជាពិសេសបទចំរៀងពិរោះៗជាច្រើនរាប់រយបទផងដែរ។

ដោយឡែក បើយោងតាមការចែករំលែករបស់ចៅកម្ពុជា ក៏បានធ្វើការរំឭកអនុស្សាវរីយស្នាដៃរបស់លោក គង្គ ប៊ុនឈឿន នាអំឡុងឆ្នាំ១៩៩១ ដែលកាលនោះលោកបានផលិតនូវខ្សែភាពយន្តចំនួនពីររឿងរួមមាន៖

១.រឿង”កុលាបបាត់ដំបង”ដកស្រង់ចេញពីប្រលោមលោករឿង “ទឹកភ្នែកកុលាបបាត់ដំបង” ស្នាដៃដ៏ល្បីល្បាញរបស់លោក គង្គ ប៊ុនឈឿន ផ្ទាល់ដែលបានបោះពុម្ពផ្សាយនាអំឡុងឆ្នាំ១៩៧៣។ រឿងនេះ គឺរៀបរាប់អំពីបុរសជាអ្នកកាសែតម្នាក់ដែលចុះយកព័ត៌មាននៅជិតសមរភូមិក្ដៅមួយ ហេីយក៏ត្រូវរងគ្រោះបណ្តាលឲ្យពិការភ្នែកដោយត្រូវគ្រាប់រំសេវគ្រាប់​បែក​ខ្ទាតចូល ហេីយបុរសនោះត្រូវបានកូនក្រមុំអ្នកជនបទម្នាក់នាទឹកដីបាត់ដំបងជួយសង្គ្រោះឱ្យរួចជីវិត។

បុរសនោះត្រូវបែកពីនាងក្រមុំបាត់ដំបងទាំងអាល័យ នៅពេលដែលគេតាមរកឃេីញហេីយត្រូវទៅព្យាបាលនៅទីក្រុងវិញ​។ នៅក្នុងប្រលោមលោកនេះ បានបញ្ចូលនូវបទចម្រៀងដ៏សែនពីរោះលន្លង់លន្លោចចំនួនពីរបទរួមមាន៖ ១,ស្រណោះផ្កាក្ទម្ព: (លោក សុីន សុីសាមុត) និង២, ថ្ងៃដែលអូនចុកឈាម (លោកស្រី រស់ សេរីសុទ្ធា)។

២.រឿង “ស្លៀកខ្យល់ដណ្ដប់មេឃ” គឺលោក គង្គ ប៊ុនឈឿន បានយកលំនាំខ្លះពីខ្សែភាពយន្តមុនដែលលោកធ្លាប់ផលិតម្ដងរួចមកហេីយនាអំឡុងឆ្នាំ១៩៧៣។ រឿងនេះគឺរៀបរាប់អំពីទង្វេីកូនៗរួមគ្នាផ្ចាញ់ផ្ចាល់ ជាមួយឪពុកម្ដាយដែលរិះកំណាញ់​​ស្វិតដោយកូនៗទាំងនោះប្រេីឧបាយកលបេីកកន្លែងយកខ្យល់អាកាសបំភ័ន្តភ្នែក ដោយបោកយកលុយឪពុកម្ដាយខ្លួនទៅជួយផលប្រយោជន៍សង្គមជាដេីម។ 

រឿងទាំងពីរនេះ​ផលិតនៅក្នុងឆ្នាំ១៩៩១ គឺជាស្នាដៃដឹកនាំផ្ទាល់របស់ លោក គង្គ ប៊ុនឈឿន នៃផលិតកម្មឆពណ្ណរង្សីភាពយន្ត ដែលមានលោកស្រី តាត គីមលន ជាភរិយាគឺជាចាងហ្វាងផលិតកម្មផ្ទាល់។ ផលិតកម្មនេះគឺបាន​បេីក​ដំណេីរការ​​នាអំឡុងឆ្នាំ ១៩៨៩៕

អត្ថបទ៖ ចាន់រ៉ា