សម្តេចតេជោ ហ៊ុន សែន ឧបត្ថម្ភថវិកា ៥០០០ ដុល្លារ​ដល់បេក្ខជន ទុំ រដ្ឋា ថែម​ឲ្យសិក្សា​ចូល​ក្របខណ្ឌ​​មន្រ្តីយោធា

សម្តេចតេជោហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ឧបត្ថម្ភថវិកា ៥ ០០០ដុល្លារ ដល់បេក្ខជន ទុំ រដ្ឋា ហៅ ទុំ សុវត្ថិ ដែលប្រឡងធ្លាក់នៅក្នុងកម្មវិធី Cambodian Idol ព្រមទាំងស្នើឲ្យបញ្ចប់ការឆ្លងឆ្លើយគ្នាពាក់ព័ន្ធការប្រឡងច្រៀងនៅលើបណ្តាញសង្គមផ្សេងៗ។ នេះបើយោងតាមការបង្ហោះនៅលើបណ្តាញសង្គមរបស់លោក អ៊ឹម ជីវ៉ា ។

លោក អ៊ឹម ជីវ៉ា បានលើកឡើងទៀតថា ក្រៅពីការឧបត្ថម្ភថវិកា ៥០០០ ដុល្លារសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតក៏បានឧបត្ថម្ភនូវថវិកា ២លានរៀលជូនជីដូនរបស់លោក ទុំ រដ្ឋា ផងដែរ។ ចំពោះថវិកាឧបត្ថម្ភបានប្រគល់ជូនលោក ទុំ រដ្ឋា និងជីដូនរួចកាលពីថ្ងៃទី០៣ខែមិថុនា ឆ្នាំ២០២២ ម្សិលមិញ តាមរយៈកាកបាទក្រហមកម្ពុជា។

លើសពីនោះសម្តេចតេជោ ហ៊ុន សែន បានមានប្រសាសន៍ថា សម្តេចបាននឹងកំពុងពិនិត្យសិក្សាឲ្យលោក ទុំ រដ្ឋា ចូល​ក្រ​ប​ខណ្ឌមន្រ្តីយោធានៅកងយោធពលខេមរភូមិន្ទ និងអាចច្រៀងនៅក្នុងក្រុមតន្រ្តីនៃកងអង្គរក្សទៀតផង។

ជិត ១ សប្ដាហ៍ហើយដែលអ្នកលេងបណ្ដាញសង្គមព្យាយាមវែកញែករកខុសត្រូវលើបេក្ខជន ទុំ សុវត្ថិ ជាមួយគណៈកម្មការទាំង ៤ រូបរបស់កម្មវិធី«Cambodian Idol» រដូវកាលទី៤វគ្គ Judge Audition។ បន្ទាប់ពីគណៈកម្ម ការសម្រេចជម្រុះបេក្ខជន ទុំ រដ្ឋា ហៅទុំ សុវត្ថិ ចេញពីកម្មវិធីនៅក្នុងវគ្គនេះ ដោយសំឡេងគាំទ្រ ២ និងមិនគាំទ្រ ២ ក៏ស្រាប់តែផ្ទុះការរិះគន់កម្មវិធីនេះចំពោះគណៈកម្មការ ឆន សុវណ្ណរាជ និង ឱក សុគន្ធកញ្ញា ដែលមិនបានផ្ដល់សំឡេងគាំទ្រ៕

អត្ថបទ៖ ចាន់រ៉ា