សម្តេចតេជោបង្ហើបថា អត់បានបោះឆ្នោតឲ្យបេក្ខជនណាទេកាលពីយប់មិញនេះ ព្រោះសម្តេច អព្យាក្រឹត្យ

យប់មិញនេះ កម្មវិធីប្រឡងចម្រៀងលំដាប់ពិភពលោក Cambodian Idol របស់ទូរទស្សន៍ហង្សមាស បានរកឃើញម្ចាស់ពានជ័យលាភីហើយ គឺយុវជន លីម តិចម៉េង មកពីខេត្តកំពង់ចាម។ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចេញសារអបអរសាទរយុវជន លីម តិចម៉េង ដោយបានពោលពាក្យថា ទីបំផុត ជោគជ័យត្រូវបានទៅលើអ្នកឈ្នះ។ តែទោះជាបែបនេះក្តី សម្តេចតេជោ បានបង្ហើបឲ្យដឹងថា សម្តេចមិនបានបោះឆ្នោតឲ្យយុវជនរូបនេះ និងអ្នកណាឡើយ ព្រោះសម្តេចមានជំហរអព្យាក្រឹត្យ។

តាមរយៈទំព័រហ្វេសប៊ុកដោយឆ្លើយតបនឹងខមិនប្រជាពលរដ្ឋកាលពីយប់មិញនេះ សម្តេចតេជោ ហ៊ុន សែន បានសរសេរថា៖«ពុកអព្យាក្រឹត្យអត់បោះឆ្នោតឱ្យអ្នកណាទេតែគាំទ្រនិងកោតសរសើរអ្នកឈ្នះ»។ ជាមួយគ្នានេះ សម្តេចក៏បានឆ្លើយនឹងសំណួរថា សម្តេចក៏ទស្សនាការប្រឡងចម្រៀងដែរថា ស្រុកទេសរីកចម្រើនរហូតមានការចាត់តាំងប្រឡងចម្រៀងលំដាប់ពិភពលោក មានពេលមើល គួរតែមើលដើម្បីជាការលើកទឹកចិត្ត។

សូមបញ្ជាក់ថា កម្មវិធីប្រឡងចម្រៀងលំដាប់ពិភពលោក Cambodian Idol បានបិទបញ្ចប់ហើយកាលពីយប់ថ្ងៃអាទិត្យ ដោយរើសបានបេក្ខជនឆ្នើមជ័យលាភីមួយរូប គឺលីម តិចម៉េង។ ម្ចាស់ជ័យលាភីនេះ គឺធ្វើឡើងតាមរយៈការផ្ញើសារបោះឆ្នោតពីសំណាក់ប្រជាពលរដ្ឋនៅទូទាំងប្រទេស។ នៅយប់មិញនេះដែរ កម្មវិធីប្រឡងចម្រៀងលំដាប់ពិភពលោក Cambodian Idolនេះ បានបំបែកកំណត់ត្រាមួយ គឺមានអ្នកទស្សនាដល់ទៅជាងកន្លះលាននាក់នៅទំព័រហ្វេសប៊ុករបស់ខ្លួន៕

ដោយ៖ វណ្ណ សុគន្ធា