ម្ចាស់ស្នា​ដៃរឿង ​«ថាម៉េច យើងស្រលាញ់គ្នា» ​ស្នើអ្នកអានកុំ​ម៉ៃរឿង​ប្រលោមលោក​បែបស្នេហា​​មិនល្អទាំងអស់

អ្នកនិពន្ធរឿងប្រលោមលោកកញ្ញា គឹម ឌីណា បានសំណូមពរឲ្យពលរដ្ឋខ្មែរ បង្កើនការអានឲ្យបានច្រើន និងស្នើកុំឲ្យមានការវាយតម្លៃបែបអវិជ្ជមាន​ចំពោះគ្រប់អ្នកនិពន្ធរឿងប្រលោម​លោក​បែប​ស្នេហាទាំងអស់នៅកម្ពុជា។ កញ្ញាថា ប្រសិនបើបានអានសៀវភៅរឿងណាដែលមិនល្អ សូមបន្ត​ស្វែង​រកអានស្នាដៃរបស់អ្នកនិពន្ធណាមួយផ្សេងទៀត ដោយចៀសវាងនូវការលើកឡើងថា ត្រីមួយកន្ត្រកស្អុយមួយស្អុយទាំងអស់។

លើកឡើងនៅក្នុងពិធីសម្ពោធសៀវភៅរឿងប្រលោមលោកដែលជាស្នាដៃថ្មីមានចំណងជើងថា «ថាម៉េច យើងស្រលាញ់គ្នា?» រួមជាមួយនឹងបទចម្រៀងថ្មី៣បទទៀត កាលពីថ្ងៃសៅរ៍ ទី ១១ ខែមិថុនា កន្លងទៅថ្មីៗនេះ កញ្ញា គឹម ឌីណា បានឲ្យដឹងថា គិតមកដល់ពេលនេះកញ្ញានិពន្ធសៀវ​ភៅបែបប្រលោមលោកចំនួន៦ក្បាលរួចមកហើយ។ ក្រៅតែពីរឿងបែបប្រលោមលោក កញ្ញាក៏បាននិពន្ធរឿងអប់រំខ្លីៗ ល្ខោននិយាយ និងបទចម្រៀងសម័យបែបយុវវ័យមួយចំនួនផងដែរ។

អ្នកនិពន្ធរូបនេះអះអាងថា សៀវភៅរឿងប្រលោមលោក​បែបមនោសញ្ចេត​នាដែល​ជាស្នាដៃរបស់​ខ្លួន​មួយចំនួន បានឆក់​យកបេះដូងរបស់យុវវ័យដែលនិយមការអាន។ កញ្ញា គឹម ឌីណា សង្កត់ធ្ងន់ថា ក្រៅពីការអានកម្សាន្តអារម្មណ៍ កញ្ញាចង់ឲ្យអ្នកដែលនិយមគាំទ្រ​ស្នាដៃនិពន្ធទាំង​អស់របស់​កញ្ញា ពិសេសយុវវ័យរៀនស្វែងយល់អំពីការសំរេចចិត្តរបស់តួអង្គក្នុងរឿង ឬមនុស្សម្នាក់ៗ​ដែលរស់​នៅក្នុងសង្គមជាក់ស្ដែង។

ងាកទៅសៀវភៅរឿងដែលជាស្នាដៃថ្មីក្រោមចំណងជើងថា «ថាម៉េចយើងស្រលាញ់គ្នា?»ដែលមានកម្រាស់ជិត២០០​ទំព័រឯនេះវិញ អ្នកនិពន្ធគឹម ឌីណា អះអាងថា បានសរសេរចប់តាំងពីឆ្នាំ២០២០មកម្លេះ ប៉ុន្តែដោយសារបញ្ហាកូវីដ១៩​ទើបធ្វើឲ្យមាន​ការយឺតយ៉ាវក្នុងការបោះពុម្ភផ្សាយ ខណៈដែលការកែសម្រួល និង​បោះពុម្ភបានចាប់​ផ្ដើមនៅ​ដើមឆ្នាំ២០២២។

អ្នកនិពន្ធដដែល ក៏បានបង្ហាញការរំពឹងទុកថា ស្នាដៃថ្មីទី៦នេះ នឹងទទួលបានការ​គាំទ្រ​លើស​ស្នាដៃ​មុនៗ ដោយសាររឿងនេះបង្កប់នូវតម្លៃអប់រំច្រើន និងផ្ដល់នូវភាពសប្បាយរីករាយដល់អ្នកអាន ដែល​ភាគ​ច្រើនជាយុវជន។

​ផ្ដើមចេញពីបញ្ហាផ្លូវចិត្តកញ្ញា គឹម ឌីណា ​បានសម្រេចចិត្តចែករំលែក​បទពិសោធន៍ដល់មនុស្ស​ទូទៅ​​ក្នុងសង្គមពិសេសយុវជនតាមរយៈអត្ថបទសំណេរ​ ដែលមានលក្ខណៈផ្ដល់ការគាំទ្រការឲ្យតម្លៃ និងការលើកទឹកចិត្ត។

ជាងនេះទៅទៀត ការផ្ដល់ជាគន្លឹះខ្លះៗក្នុងការដោះស្រាយបញ្ហា ការកម្សាន្ត​អារម្មណ៍ ឬរំសាយអារម្មណ៍ និងការស្វែងយល់អំពីការសម្រេចចិត្តរបស់​តួអង្គណាមួយនៅក្នុង​សាច់រឿងក៏ដូចជានៅក្នុងសង្គម គឺជាអ្វីដែលកញ្ញាចង់ផ្ដល់ឲ្យអ្នកអាន ក្នុងគោលបំណងមិនឲ្យ​មានការ​វាយ​តម្លៃទៅលើតួអង្គ ឬបុគ្គលណាម្នាក់នៅក្នុងសង្គម និងចូលរួមផ្ដល់ភាពយុត្តិធម៌​សម្រាប់​បុគ្គលទាំងនោះ។

កញ្ញាបញ្ជាក់ថា៖ «តាមរយៈស្នាដៃប្រលោមលោករបស់ខ្ញុំៗព្យាយាមបញ្រ្ជាបឲ្យមនុស្សក្នុងសង្គមរៀនយល់ពីគ្នាឲ្យបានច្រើន ឬឲ្យយើងចេះយកចិត្តគេមកដាក់ចិត្តយើង ប៉ុន្តែយើងមិនសរសេរត្រង់ទេ ព្រោះប្រលោម​លោក​កាលណាសរសេរត្រង់គឺអត់មានអ្នកអាន ​ហើយយើងខ្លួនឯងក៏មិនជក់ចិត្តដែរ»។

គួរកត់សម្គាល់ដែរថា បន្ទាប់ពីរាជរដ្ឋាភិបាលសម្រេចបើកប្រទេសឡើងវិញ វិស័យភាពយន្ត និងការតែងនិពន្ធចាប់ផ្ដើមកក្រើកឡើងវិញ ដោយក្នុងនោះអ្នកនិពន្ធនិងផលិតករជាច្រើនបានបញ្ចញស្នាដៃដែលខ្លួនបានផលិត ក្នុងទម្រង់ជាសៀវភៅ និងជាទម្រង់ភាពយន្ត ខណៈដែលចំនួននៃការគាំទ្រ និងការចូលទស្សនាហាក់មិនអំណោយផល ដូចការរំពឹងទុក៕

អត្ថបទ៖ លន់ សេនី