តួកគី ជំរុញឱ្យអាមេរិក និងអ៊ីរ៉ង់ វិលត្រឡប់ទៅរកកិច្ចព្រមព្រៀងការទូតវិញ

រដ្ឋមន្ត្រីការបរទេសតួកគី លោក Hakan Fidan បានអំពាវនាវឱ្យមានការស្តារឡើងវិញនូវអនុស្សរណៈនៃការយោគយល់គ្នា រវាងសហរដ្ឋអាមេរិក និងប្រទេសអ៊ីរ៉ង់ ដើម្បីដោះស្រាយវិបត្តិដែលកំពុងកើតមានឡើង។

យោងតាម​សារព័ត៌មាន TRT World ក្នុងអំឡុងពេលទស្សនកិច្ចទៅកាន់ប្រទេសកាតា កាលពីថ្ងៃអាទិត្យ ទី​១៩ ខែ​កក្កដា ឆ្នាំ​២០២៦ លោក Fidan បានបញ្ជាក់ថា តួកគី កំពុងសម្របសម្រួលយ៉ាងជិតស្និទ្ធជាមួយទីក្រុងដូហា ដើម្បីប្រើប្រាស់គ្រប់បណ្តាញការទូតទាំងអស់ ក្នុងការបន្ធូរបន្ថយភាពតានតឹង។

លោក Fidan បានសម្តែងការព្រួយបារម្ភថា អរិភាពរវាងទីក្រុងវ៉ាស៊ីនតោន និងទីក្រុងតេហេរ៉ង់ កំពុងជះឥទ្ធិពលអវិជ្ជមានយ៉ាងខ្លាំងដល់សេដ្ឋកិច្ចក្នុងតំបន់ ព្រមទាំងបង្កើនហានិភ័យនៃជម្លោះដែលកាន់តែរីកធំ ដែលអាចនាំឱ្យមានអស្ថិរភាពកាន់តែខ្លាំង។

លោកបានរំលឹកឡើងវិញថា កាលពីពេលកន្លងទៅ ក្រោមការសម្របសម្រួលពីប៉ាគីស្ថាន ព្រមទាំងការចូលរួមយ៉ាងសកម្មពីកាតា និងការគាំទ្រពីតួកគី ភាគីពាក់ព័ន្ធធ្លាប់បានរៀបចំអនុស្សរណៈនៃការយោគយល់គ្នាមួយ ប៉ុន្តែចាប់តាំងពីពេលនោះមក ដំណើរការការទូតនេះត្រូវបានបោះបង់ចោល។ លោកបានសង្កត់ធ្ងន់ថា គ្រប់ភាគីចាំបាច់ត្រូវវិលត្រឡប់ទៅរកចំណុចនោះវិញជាបន្ទាន់៕

ប្រែសម្រួល៖ ឈាង