សុខ សីឡាលីន៖ សុជីវធម៌ សីលធម៌ធ្លាក់ចុះខ្លាំងដោយសារបុគ្គលមួយចំនួនរិះគន់ជាន់ពន្លិច

តារាចម្រៀងកញ្ញា សុខ សីឡាលីន បានបញ្ចេញប្រតិកម្មដោយមិនសំចៃមាត់ចំពោះបុគ្គលមួយចំនួនដែលចូលចិត្តប្រើវប្បធម៌នៃការរិះគន់បែបជាន់ពន្លិច ឬមិនឲ្យតម្លៃលើកិត្តិយស និងសេចក្តីថ្លៃថ្នូររបស់អ្នកដទៃ។

ប្រតិកម្មរបស់តារាស្រី សុខ សីឡាលីន នេះគឺកើតឡើងបន្ទាប់ពីឃើញវីដេអូមួយដែលស្រ្តីម្នាក់កំពុងឡាយលក់ផលិតផលជាមួយស្វាមីរបស់ខ្លួនហើយត្រូវបានបុគ្គលម្នាក់ចូលទៅខមិនដោយពាក្យបង្អាប់ប្រៀបប្រដូចមុខមាត់ស្រ្តីរូបនោះទៅនឹង នាង កែវ ណាម៉ា ។ ដោយសារទង្វើរនេះទើប សុខ សីឡាលីន បានបញ្ចេញប្រតិកម្មហាក់មិនសប្បាយចិត្តព្រោះយល់ថាការយករូបរាង សម្រស់ មុខមាត់អ្នកដ៏ទៃទៅលេងសើចបែបនេះ ជារឿងមិនល្អទាល់តែសោះ ។

បង្ហោះភ្ជាប់ជាមួយវីដេអូដែលសរសេរថា “រូបកាយមិនស្អាត ជៀសមិនផុតពីការមេីលងាយពីអ្នកដទៃសួរថា អ្នកណាយល់អារម្មណ៍ខ្ញុំពេលនេះ” ក៏ត្រូវបានកញ្ញា សុខ សីឡាលីន លើកឡើងថា សុជីវធម៌សីលធម៌ធ្លាក់ចុះខ្លាំងនាបច្ចប្បន្នដោយសារបុគ្គមួយចំនួន មានតែទូរស័ព្ទក្នុងដៃ ចុចសរសេរខមិនដោយគ្មានឆ្លងកាត់ការគិតពិចារណាអោយបានវែងឆ្ងាយ។

ទង្វើរនេះត្រូវបានតារាចម្រៀង សុខ សីឡាលីន ចាត់ទុកថា ជារិះគន់ជាន់ពន្លិច ហើយមើលងាយគេ ដោយអត់សីលធម៌​(Bully)។ នាងថា មនុស្សមុខមាត់បែបណាសំខាន់លើចិត្តគំនិត សីលធម៌ និងគុណធម៌ បើខ្លួនអ្នកមិនល្អគ្រប់ទេយកល្អយកពេលមើលអំពីខ្លួនឯងវិញល្អជាង(អ្នកខមិនបែបនោះ)៕

អត្ថបទ៖ ចាន់រ៉ា