ចូលរួមរំលែកទុក្ខ! ព្រឹទ្ធាចារ្យរបាំ សរ សារឿន ទទួលមរណភាព ក្នុងវ័យ ៨៨ ឆ្នាំ

វិរ:សិល្បការិនីជើងចាស់ គឺព្រឹទ្ធាចារ្យរបាំ សរ សារឿន បានទទួលមរណភាពហើយនៅថ្ងៃទី១៣ ខែកញ្ញា ឆ្នាំ២០២២នេះដោយជរាពាធក្នុងជន្មាយុ៨៨ឆ្នាំ។ នេះបើយោងតាមការបញ្ជាក់នៅលើផេកសិល្បៈនិងសង្គម។

តាមរយ:ដំណឹងមរណភាពរបស់តារាជើងចាស់ល្បីឈ្មោះព្រឹទ្ធាចារ្យរបាំ សរ សារឿន នេះ គេឃើញមានអ្នកគាំទ្រព្រមទាំង​សិល្បករ-សិល្បការិនីជាច្រើនបានសម្តែងក្តីរន្ធត់ស្លុតចិត្តខ្លាំងចំពោះការបាត់បង់ធនធានវិរ:សិល្បករដ៏មានតម្លៃ និងទេពកោសល្យផ្នែកវិស័យសិល្ប:ខ្មែរ។ ក្នុងនោះក៏មានការផ្ញើសារចូលរួមរំលែកទុក្ខគ្រប់ៗគ្នាជាមួយក្រុមគ្រួសារផងដែរ ។

បើតាមការបង្ហោះនៅលើទំព័រហ្វេសប៊ុកឈ្មោះ សិល្បៈនិងសង្គម បានរៀបរាប់ថា លោកយាយ សរ សារឿន អតីតនាក់របាំក្បាច់បុរាណ(ល្ខោន ឬរបាំព្រះរាជទ្រព្យ) បានធ្វើមរណៈកាលទៅហើយ។ លោកយាយជាអ្នកម្តាយដ៏ល្អប្រកបដោយព្រហ្មវិហារធម៌ ជាជីដូនដ៏ប្រពៃ ជាជីដូនទួតដ៏ថ្លៃថ្លា ពីថ្ងៃនេះទៅ កូនចៅលែងបានឃើញភ័ក្ត្រលោកយាយទៀតហើយ ។

ប្រភពបានបន្តទៀតថា សូមអ្នកម្តាយ លោកយាយ យាយទួត អណ្តែតទៅកាន់ឋានសុគតិភពកុំបីឃ្លៀងឃ្លៀត ហើយសូមបញ្ជាក់ថា លោកយាយគឺជាលោកយាយគ្រូធំដែលសល់ចុងក្រោយគេក្នុងចំណោមលោកយាយគ្រូធំដែលបានទទួលមរណ:ភាពកន្លងទៅ។

ចំពោះដំណឹងមរណទុក្ខដ៏ក្រៀមក្រំ និងសោកសៅរបស់ព្រឹទ្ធាចារ្យរបាំ សរ សារឿន នេះគឺបានធ្វើឲ្យអ្នកសិល្ប: និងមហាជនបានសម្តែងការចូលរួមសោកស្តាយយ៉ាងខ្លាំងជាមួយក្រុមគ្រួសារសព។ ម្យ៉ាងទៀតនេះក៏ជាការបាត់បង់ធនធានវីរ:សិល្បករដ៏មានតម្លៃក្នុងសង្គមខ្មែរផងដែរ៕

អត្ថបទ៖ ចាន់រ៉ា