ជីវិតកម្សាន្ដ

ទីបំផុត ! សាពូន មីដាដា ព្រមធ្វើតាមបំណងកូនស្រី

បានផុស

២ years មុន

នៅ

ថ្ងៃអង្គារ ២០ ធ្នូ ២០២២

ដោយ

ទស្សនិកជនបានដឹងហើយថា កាលពីថ្មីៗកន្លងទៅនេះ អតីតតារាចម្រៀងលោក សាពូន មីដាដា បានបង្ហាញជំហរដោយមិនចង់ឲ្យកូនស្រីច្បងដើរតាមគន្លងសិល្បៈដូចរូបលោក និងអតីតភរិយាទេ។ ប៉ុន្តែបន្ទាប់ពីមានការសំណូមពរមួយចំនួនពីអ្នកគាំទ្រ ស្រាប់តែពេលនេះលោកបានផ្លាស់ប្ដូរគំនិតដោយប្រកាសបើកផ្លូវឲ្យកូនស្រីវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេចាំបានថាការប្រកាសរបស់លោក សាពូន មីដាដា កាលណោះគឺស្របពេលដែលអ្នកដឹកនាំសម្ដែងលោក កៅ សីហា បានបង្ហើបថា ខ្លួននឹងជួយបើកផ្លូវដល់កូនស្រីច្បងលោក សាពូន មីដាដា គឺកុមារី ដា រ៉ាភិមាន ឲ្យចូលក្នុងវិស័យសិល្បៈតាមគន្លងលោកឪពុក និងអ្នកម្ដាយ។ ដោយឡែកក្រោយការប្រកាសនេះ មួយរយៈខ្លី អតីតតារាចម្រៀងលោក សាពូន មីដាដា មុននេះ បានបញ្ជាក់ជាថ្មីថា ពេលនេះលោកយល់ព្រមធ្វើតាមបំណងកូនស្រីហើយ។

ម្ចាស់បទ”ពុកអើយ ម៉ែអើយ” លោក សាពូន មីដាដា បានបង្ហោះរូបភាពកូនស្រីភ្ជាប់សំណេរខ្លីថា កូនសិស្សថ្មី ចាប់ផ្ដើមរៀនពីពេលនេះទៅហើយ។ ក្នុងនោះលោក សាពូន មីដាដា ក៏បានឆ្លើយតបអ្នកគាំទ្របន្ថែមទៀតថា កូនក្មួយដុកដាន់ចង់រៀនភ្លេងពេកលោកជំទាវ អ៊ីចឹងមានតែបំពេញបណ្ដោយតាមលទ្ធភាពដែលខ្ញុំអាចធ្វើទៅបានតែប៉ុណ្ណោះ។ ដំណឹងនេះបានធ្វើឲ្យទស្សនិកជន និងអ្នកប្រើប្រាស់បណ្ដាញសង្គមជាច្រើនសម្ដែងការគាំទ្រគ្រប់គ្នា។

គួររម្លឹកថា តារាប្រុសលោក សាពូន មីដាដា កាលពីថ្មីៗកន្លងមកនេះធ្លាប់បានសរសេររៀបរាប់ភ្ជាប់វីដេអូចម្រៀងរបស់កូនស្រីច្បងដូច្នេះថា កូនស្រីមាសឪពុក ច្រៀងចម្រៀងផ្ញើមកពុកឲ្យពុកសណ្ដាប់សម្រាន្តលក់ស្រួល។ កូនស្រីដ៏កម្សត់របស់ពុក ឆាកជីវិតគឺកម្សត់យ៉ាងនេះ ហើយគ្រប់រសជាតិជីវិតនឹងជំរុញឲ្យកូនកាន់តែរឹងមាំ តែរឿងមួយដែលពុកសុំ បើអាចគឺមិនចង់ឲ្យកូនដើរលើផ្លូវសិល្បៈដូចឪពុកទេ ៩ ឆ្នាំហើយ ដែលពុកចាកចេញពីវិថីសិល្បៈដោយគ្មានស្ដាយស្រណោះបន្តិចឡើយ។

លោក សាពូន មីដាដា បានបន្តទៀតថា ចូរកូនរស់ក្នុងជីវភាពដ៏សាមញ្ញមួយ ដោយយកព្រះពុទ្ធ ព្រះធម៌ ព្រះសង្ឃ ជាទីពឹងទីរលឹក រលាស់ខ្លួនចេញពីលោកីយ៍នេះទៅរកនិព្វានជាត្រើយសុខចុះកូន។