ជីវិតកម្សាន្ដ

សាពូន មីដាដា ចង់ឲ្យកូនប្រុសបួសក្នុងវ័យ ៦ ឆ្នាំ

បានផុស

៣ years មុន

នៅ

ថ្ងៃចន្ទ ២ មករា ២០២៣

ដោយ

កន្លងមកគេនៅចាំបានថា តារាចម្រៀង សាពូន មីដាដា ក៏ធ្លាប់បានបង្ហើបនូវបំណងដោយមិនចង់ឲ្យកូនស្រីជាទីស្រលាញ់ឈ្មោះ សាពូន ដារ៉ាភិមាន ដើរតាមគន្លងរបស់ខ្លួនក្នុងវិថីសិល្បៈទេ ពោលគឺចង់ឲ្យរស់នៅក្នុងជីវភាពដ៏សាមញ្ញមួយ ដោយយកព្រះពុទ្ធ ព្រះធម៌ ព្រះសង្ឃ ជាទីពឹងទីរលឹក។

ប៉ុន្តែក្រោយមកដោយមានការសំណូមពរមួយចំនួនពីអ្នកគាំទ្រ ស្រាប់តែលោកក៏បានផ្លាស់ប្ដូរគំនិត ដោយប្រកាសបើកផ្លូវឲ្យកូនស្រីចូលក្នុងវិស័យសិល្បៈវិញ។

ដោយឡែកងាកមកចាប់អារម្មណ៍ចំពោះកូនប្រុសទី ២ ជាទីស្រលាញ់ឯណោះវិញ នាឱកាសថ្ងៃខួបកំណើតទី ០១ ខែមករា ឆ្នាំ ២០២៣ ស្រាប់តែលោក សាពូន មីដាដា បានបង្ហាញបំណងចង់ឲ្យកូនប្រុសបួសក្នុងវ័យ ៦ ឆ្នាំ។

បង្ហោះភ្ជាប់ជាមួយរូបថតកូនប្រុសពៅ កាលពីថ្ងៃទី ១ ខែមករា ឆ្នាំ ២០២៣ លោក សាពូន មីដាដា បានរៀបរាប់ថា «ថ្ងៃនេះគម្រប់ ៥ ឆ្នាំហើយ កូនប្រុសពុកចេះលុតជង្គង់ជូននំពុក ឆ្នាំក្រោយគម្រប់ ៦ ឆ្នាំ ពុកឲ្យកូនបួស ដូចកាលព្រះពុទ្ធសម័យព្រះពុទ្ធអង្គបានឲ្យព្រះរាហុលបួស កាលនោះព្រះរាហុលក៏ជន្មាយុ ៦ ព្រះវស្សាដែរ»។

គួររម្លឹកថា តារាចម្រៀងលោក សាពូន មីដាដា បានរៀបការបញ្ចប់ភាពនៅលីវជាមួយអ្នកនាង សឿ សុធារ៉ា កាលពីថ្ងៃទី ០៩ ខែកញ្ញា ឆ្នាំ ២០០៩ ដោយគិតរហូតមកដល់ពេលនេះមានរយៈពេលជាង ១០ ឆ្នាំហើយ។ ប៉ុន្តែក្រោយមកចំណងស្នេហារបស់អ្នកទាំងពីរក៏បានប្រកាសដំណឹង នៃការបែកបាក់គ្នា ដោយបន្សល់ទុកនូវកូនប្រុសស្រីចំនួន ២ នាក់, ទី ១-ឈ្មោះ សាពូន ដារ៉ាភិមាន និងកូនទី ២-ឈ្មោះ សាពូន ដារ៉ាបុរស៕

អត្ថបទ ៖ ចាន់រ៉ា