ក្រុមហ៊ុនហ្គាឡាក់ស៊ី ណាវាត្រា ស្វាគមន៍វត្តមាន​កំពូលតារាចម្រៀង ឧកញ៉ា ខេមរៈ សិរីមន្ត មកកាន់គ្រួសារហ្គាឡាក់ស៊ី និងរៀបចំអាហារសាមគ្គីជួបជុំ​បុគ្គលិកប្រចាំឆ្នាំ

រាជធានីភ្នំពេញ៖ កាលពីល្ងាចថ្ងៃទី១៣ ខែមករា ឆ្នាំ២០២៣ នេះ អ្នកឧកញ៉ា ឡេង ណាវ៉ាត្រា អគ្គនាយកក្រុម​ហ៊ុនហ្គាឡាក់ស៊ី ណាវាត្រា គ្រុប ឯ.ក. និងថ្នាក់ដឹកនាំក្រុមហ៊ុនហ្គាឡាក់ស៊ី ណាវាត្រា គ្រុប ឯក និងផលិតកម្មហ្គា​ឡាក់ស៊ី ណាវាត្រា បានរៀបចំពិធីស្វាគមន៍វត្តមានកំពូលតារាចម្រៀង ឧកញ៉ា ខេមរៈ សិរីមន្ត មកគ្រួសារហ្គាឡាក់ស៊ី ណាវាត្រា អមដោយពិធីជួបជុំសំណេះសំណាលបុគ្គលិកពិសារអាហារសាមគ្គីប្រចាំឆ្នាំ ដែលមានវត្តមាន​អញ្ជើញចូលរួម​ពីសំណាក់ថ្នាក់ដឹកនាំ និងបុគ្គលិកក្រុមហ៊ុនប្រមាណជាង១ពាន់នាក់ នៅភោជនីយដ្ឋានទន្លេបាសាក់២។

ក្នុងឱកាសដ៏វិសេសវិសាលនោះ អ្នកឧកញ៉ា ឡេង ណាវាត្រា បានបង្ហាញនូវមោទកភាព និងអារម្មណ៍រំភើប​សប្បាយ​រីករាយ ចំពោះការវិវត្ត និងប្រែក្លាយមុខមាត់របស់ផលិតកម្មហ្គាឡាក់ស៊ី ណាវាត្រា ដែលបានចាប់ផ្តើមពីចំណុចសូន្យ និងបានរីកធំធាត់ទទួលបានភាពជោគជ័យ ការគាំទ្រល្បីល្បាញយ៉ាងរន្ទឺនាពេលបច្ចុប្បន្ន ក្នុងវិស័យផលិតកម្មកំសាន្ត និងដែលក្នុងឱកាសថ្ងៃនេះ មានកិត្តិយសអាចស្វាគមន៍វត្តមានកំពូលតារាចម្រៀង ខេមរៈ សិរីមន្ត មកកាន់មហាគ្រួសារ​ហ្គាឡាក់ស៊ី ណាវាត្រា។

វត្តមានកំពូលតារាចម្រៀង ឧកញ៉ា ខេមរៈ សិរីមន្ត នេះនឹងជាសក្ខីភាពថ្មីមួយទៀតបង្ហាញពីភាពជោគជ័យប្រកប​ដោយចក្ខុវិស័យរបស់ផលិតកម្ម និងជាពិសេសត្រូវបង្ហាញយ៉ាងច្បាស់តាមរយៈវត្តមានកំពូលតារាចម្រៀង​ជាច្រើនរូបប្រចាំប្រទេសកម្ពុជាដែលស្ថិតនៅក្រោមដំបូលផលិតកម្មជាមួយគ្នា រួមមានដូចជាឧកញ៉ា ព្រាប សុវត្ថិ, កញ្ញា តន់ ច័ន្ទសីម៉ា, លោក ខេម, អ្នកភ្លេងឆ្នើម និងនិពន្ធវ័យក្មេងមានទេពកោសល្យជាច្រើនទៀត។

អ្នកឧកញ៉ាក៏បានចូលរួមជាអធិបតីក្នុងពិធីជួបជុំសំណេះសំណាលបុគ្គលិកពិសារអាហារសាមគ្គីប្រចាំឆ្នាំ ដែលមានវត្តមាន​ចូលរួមពីថ្នាក់ដឹកនាំ និងបុគ្គលិកក្រុមហ៊ុនពីទូទាំងប្រទេសផងដែរ។ ក្នុងឱកាសនោះ អ្នកឧកញ៉ា ឡេង ណាវាត្រា អគ្គនាយកក្រុមហ៊ុន និងតំណាងថ្នាក់ដឹកនាំក្រុមហ៊ុនទាំងអស់បានថ្លែងអំណរគុណ ចំពោះបុគ្គលិក​ទាំងអស់គ្នា ដែលតែងបានបំពេញភារកិច្ចការងារ និងតួនាទីរបស់ខ្លួនយ៉ាងសកម្ម ដែលជាកត្តារុញច្រាននាំឱ្យក្រុម​ហ៊ុនយក្សមួយនេះអាចរីកចម្រើនបានតាំងពីចំណុចសូន្យ រហូតមកដល់សព្វថ្ងៃនេះ។

អ្នកឧកញ៉ាក៏បានលើកឡើងអំពីស្មារតីទំនួលខុសត្រូវខ្ពស់របស់អ្នកឧកញ៉ាផ្ទាល់ និងថ្នាក់ដឹកនាំក្រុមហ៊ុនគ្រប់ៗរូប ចំពោះជោគវាសនា និងជីវភាពបងប្អូនបុគ្គលិកក្រុមហ៊ុនរាប់ពាន់នាក់ និងក្រុមគ្រួសារទាំងអស់គ្នាផងដែរ។ អ្នកឧកញ៉ា ឡេង ណាវាត្រា បានធ្វើការវាយតម្លៃខ្ពស់ចំពោះអតីតភាព និងសមត្ថភាពរបស់បុគ្គលិកគ្រប់ៗរូប និងថ្លែងអំណរគុណ​ចំពោះបុគ្គលិកទាំងអស់ដែលតែងនៅខិតខំតស៊ូ បន្តធំធាត់រួមគ្នាជាមួយគ្នា តាំងពីក្រុមហ៊ុននៅចាប់ផ្តើមដំបូងជាមួយ​បាតដៃទទេរ រហូតក្លាយខ្លួនជាក្រុមហ៊ុនយក្សនៅកម្ពុជាដូចសព្វថ្ងៃនេះ។

សូមបញ្ជាក់ថា ក្រុមហ៊ុនហ្គាឡាក់ស៊ី ណាវាត្រា គ្រុប ត្រូវបានបង្កើតឡើងតាំងពីឆ្នាំ ២០១៧  ដែលគិតមកដល់ពេលនេះ មានអាយុទើបតែជិត៦ឆ្នាំប៉ុណ្ណោះហើយមានទស្សនៈវិស័យ ហើយក្រោមចក្ខុវិស័យដឹកនាំរបស់អ្នកឧកញ៉ា ក្រុមហ៊ុនមាន​បេសកកម្មចម្បងចូលរួមជាមួយរាជរដ្ឋាភិបាលកម្ពុជា បង្កើនការអភិវឌ្ឍសេដ្ឋកិច្ចជាតិ ជំរុញការប្រើប្រាស់ផលិតផលជាតិ បង្កើតឱកាសការងារជាមួយប្រាក់ចំណូលខ្ពស់ និងជាពិសេសគឺការផ្តល់ឱកាសវិនិយោគក្នុងតម្លៃសមរម្យ ការ​កម្សាន្តប្រកប​ដោយភាពទាក់ទាញ ជូនដល់បងប្អូនប្រជាពលរដ្ឋខ្មែរទាំងអស់គ្នា ។

សូមស្ដាប់បទចម្រៀងដំបូង របស់ ខេមរះ សិរីមន្ត ដែលទើបនឹងចេញនៅ ផលិតកម្មកាឡាក់ស៊ីទាំងអស់គ្នា៖