​បេក្ខជនចូលរួមលេងកម្មវិធី Squid Game រិះគន់ Netflix ថា គ្មានមនុស្សធម៌ និងអយុត្តិធម៌ខ្លាំង

ក្រោយពេលខ្សែភាពយន្តរឿង Squid Game របស់ Netflix បានផ្ទុះល្បីកាលពីចុងឆ្នាំ២០២១ ផលិតករ ក៏ដូចជាកម្មវិធីទូរទស្សន៍អន្តរជាតិជាច្រើនបានព្យាយាមថតកម្មវិធីលេងហ្គេម Squid Game ឡើងវិញ ជាមួយនឹងមនុស្សពិត។

ជាមួយគ្នាដែរ Netflix បានផលិតកកម្មវិធីប្រកួត Squid Game បែបពិតៗ ដោយបេក្ខជនចូលរួមមានចំនួន ៤៥៦នាក់ ដើម្បីផ្ដល់ទឹកប្រាក់ ៤.៥៦លានដុល្លារអាមេរិកដល់អ្នកដែលឈ្នះ ហើយហ្គេមនីមួយៗស្រដៀងគ្នានឹងហ្គេមក្នុងខ្សែភាពយន្តដែរ។

យ៉ាងណាមិញ អំឡុងដំណើរការប្រកួតពិត បេក្ខជនមួយចំនួនបានចេញមកបកអាក្រាតថា ការថតរបស់ Netflix ​ពិតជាអមនុស្សធម៌ខ្លាំង និងជាកម្មវិធីពុករលួយ គ្មានភាពយុត្តិធម៌សម្រាប់បេក្ខជនធម្មតា ព្រោះអ្នកដែលអាចឈានទៅកាន់វគ្គបន្ទាប់ សុទ្ធសឹងជាបេក្ខដែលមានប្រជាប្រិយនៅលើបណ្ដាញសង្គម។

បេក្ខនារីម្នាក់សុំមិនបញ្ចេញឈ្មោះ បាននិយាយថា មុនពេលថតកម្មវិធីនៅម៉ោង៩ នាងត្រូវក្រោកតាំងពីម៉ោង ៣:៣០ ទៀបភ្លឺ ខណៈសម្លៀកបំពាក់ផ្ដល់ភាពកក់ក្ដៅដល់រាងកាយ ក៏ពុំមានស្លៀកពាក់ដែរ។ លើសពីនេះ បេក្ខនារីម្នាក់ទៀត ទម្លាយថា ហ្គេម “Red Light Green Light” (ភ្លើងក្រហម ភ្លើងបៃតង) មានរយៈពេលដល់ទៅ ២៦នាទីក្នុងមួយជុំ ដែលវាលើសពីម៉ោងកំណត់ចំនួន២នាទីឯណោះ។

ប្រភពពី Rolling Stone បានឱ្យដឹងថា យ៉ាងហោចណាស់មានបេក្ខជនចំនួន ១០នាក់បានដួលសន្លប់ ក្នុងអំឡុងថ្ងៃដំបូងនៃការថត ព្រោះពួកគេត្រូវឈរយូរម៉ោង បូករួមនឹងអាកាសធាតុត្រជាក់ផង។

បន្ថែមពីលើការចោទប្រកាន់ពីទង្វើអមនុស្សធម៌ចំពោះបេក្ខជន ក្រុមហ៊ុន Netflix ក៏រងពាក្យរិះគន់ចំពោះភាពលម្អៀងផងដែរ ដោយបេក្ខជនមួយចំនួនអះអាងថា វេទិកាស្ទ្រីមនេះបានជ្រើសរើសបេក្ខជន-នារី ដែលមានឥទ្ធិពលស្រាប់នៅសង្គមអនឡាញ មុនពេលផ្ដល់ឱកាសឱ្យពួកគេឈានទៅកាន់វគ្គបន្ទាប់៕

ប្រែសម្រួល៖ សន្យា

ចុចអាន៖ តួឯកប្រុស “Squid Game” ពីអ្នករត់តុកាហ្វេ ក្លាយជាកំពូលតារាស៊ីថ្លៃខ្ពស់ជាងគេរបស់កូរ៉េខាងត្បូង