ទស្សនិកជនសរសើរស្វាមី ម៉ារីម៉ា ពូកែថ្នាក់ថ្នមប្រពន្ធ និងមើលថែកូនៗ សក្តិសមជាមេគ្រួសារ

លោក Dingdong Dantes ស្វាមីរបស់អតីតតួ ម៉ារីម៉ា (Marian Rivera) មិនត្រឹមតែមានរូបរាងស្រស់សង្ហា ព្រមទាំងមានទេពកោសល្យសិល្បៈប៉ុណ្ណោះទេ លោកថែមទាំងជាប្ដីល្អ និងឪពុកល្អចំពោះប្រពន្ធកូនទៀតផង ព្រោះតារាសម្តែងរូបនេះ ពូកែយកចិត្តទុកដាក់ និងមើលថែគ្រួសារបានល្អបំផុត។

តាមរយៈការបង្ហោះរបស់ ម៉ារីម៉ា នៅលើផេកផ្ទាល់ខ្លួន គ្រួសាររបស់នាងពិតជាមានភាពផ្អែមល្ហែមនឹងគ្នាខ្លាំង មិនថាឪពុកម្ដាយចំពោះកូនៗ ឬស្វាមីចំពោះភរិយាឡើយ ពោលគឺ Dingdong Dantes បានបង្ហាញការ​យក​ចិត្ត​ទុក​ដាក់​លើភរិយា និងកូនទាំងពីរខ្លាំងណាស់។

តាមពិតទៅ រូបភាពបែបនេះ ​ទស្សនិកមិនមែនទើបតែឃើញលើកទីមួយនោះទេ ព្រោះកន្លងមកស្វាមី ម៉ារីម៉ា ក៏តែងតែបង្ហាញភាពផ្អែមល្ហែម និងការយកចិត្តទុកចំពោះគ្រួសារផងដែរ ទាំងនៅលើបណ្ដាញសង្គម និងនៅក្រៅឆាក ហើយអ្នកស្គាល់ពួកគេស្និទ្ធ សុទ្ធតែដឹងរឿងនេះច្បាស់។

ថ្វីត្បិតតែមានការងារមមាញឹកយ៉ាងណាក្តី Dingdong Dantes ក៏មិនភ្លេចជួយបង្រៀន និងមើលថែកូនទាំងពីរជាមួយភរិយាដែរ ពួកគេតែងតែចំណាយ​ពេល​ទំនេរ​តាមដាន​ការ​លូត​លាស់​របស់​កូនៗជានិច្ច។ បន្ថែមពីលើនោះ តារាសម្ដែងវ័យ ៤២ឆ្នាំរូបនេះ តែងទុកអទិភាពភរិយាជាទីមួយ ដោយលោកធ្លាប់ចែករំលែកថា លោកព្រមធ្វើគ្រប់យ៉ាងដើម្បីថែទាំប្រពន្ធ និងអាចសូម្បី​លះបង់​អាជីព​សិល្បៈសម្រាប់​គ្រួសារ​តូចរបស់លោក​។

ដោយសារទង្វើដ៏កក់ក្ដៅទាំងនេះហើយ ទើប Dingdong Dantes ទទួលបានពាក្យសរសើរពីទស្សនិកជនគ្រប់មជ្ឈដ្ឋាន ​ជាពិសេស​ភាព​ជា​ឪពុក​របស់លោក ​ពិតជាសក្តិសមឱ្យមហាជនយកត្រាប់តាម៕

ប្រែសម្រួល៖ សន្យា

ចុចអាន៖ តួនាង ម៉ារីម៉ា ប្រកាសក្ដែងៗនឹងធ្វើរឿងនេះ ទោះបីលំបាកចំពោះស្ត្រី

ចុចអាន៖ ស្វាមី ម៉ារីម៉ា មានប្រវត្តិមិនធម្មតា មុនក្លាយជាតារាល្បីលំដាប់ប្រទេស