នៅដើមឆ្នាំ២០២៣នេះ តារាសម្ដែង ​ហា្វន ពីងពីង (Fan Bingbing) បានត្រឡប់ចូលពិភពកម្សាន្តវិញ បន្ទាប់ពីរឿងអាស្រូវគេចពន្ធធ្វើឱ្យប៉ះពាល់ដល់អាជីពសិល្បៈអស់រយៈពេល ៥ឆ្នាំកន្លងមក។ ស្របពេលដែលលេចមុខជាអន្តរជាតិនៅឯមហោស្រពភាពយន្ត ទីក្រុងប៊ែកឡាំង ប្រទសអាល្លឺម៉ង់ និងនៅក្នុងកម្មវិធី Paris Fashion Week ប្រទេសបារាំង តារាស្រីវ័យ ៤១ឆ្នាំរូបនេះ ​បានបើកចិត្តទម្លាយភាពឈឺចាប់ដែលនាងជួបប្រទះ អំឡុងពេលហាមឃាត់ ​មិនឱ្យមានមុខនៅក្នុងពិភពកម្សាន្តចិន។

នៅក្នុងសន្និសីទសារព័ត៌មាននៃមហោស្រពភាពយន្ត រាជិនីសម្រស់ចិនរូបនេះ បាន​ចែក​រំលែក​ថា ប៉ុន្មាន​ឆ្នាំ​កន្លង​មកនេះ នាង​បាន​ជួប​រឿង​ឈឺចាប់ និងរងភាពអាម៉ាស់ជាច្រើន។ នាង​បាត់​បង់​ទំនុកចិត្ត​ពី​ទស្សនិកជន ដោយ​មិន​អាច​សម្ដែង​បានរហូតដល់ ​៥​ឆ្នាំ​។ ពេលនោះជីវិតរបស់នាងហាក់ជាប់គាំងមួយកន្លែងអ៊ីចឹង។

ថ្វីត្បិតក្នុង​អំឡុង​ពេលនោះ​ ហ្វាន ពីងពីង ទទួលបាន​ធ្វើ​ការងារ​ផ្សេង​ៗ​ដើម្បីរកចំណូល ប៉ុន្តែនាង​នៅ​តែ​ទន្ទឹង​រង់ចាំ​ឱកាស​វិល​ត្រឡប់​មកសិល្បៈ​វិញ។ ពីងពីង ​​លាតត្រដាង​ទាំងទឹកភ្នែករលីងរលោងថា ការ​មិន​អនុញ្ញាត​ឲ្យ​នាងសម្ដែង​ក្នុង​ភាពយន្ត​អស់ពេលជាច្រើនឆ្នាំមកនេះ ​ពិត​ជាបម្រាមដ៏​ឃោរឃៅសម្រាប់នាង។

យ៉ាងណាមិញ ក្រោយជួបព្យុះភ្លៀង ពេលនេះ ហ្វាន ពីងពីង បានវិលចូលវិស័យសិល្បៈពេញសិទ្ធិឡើងវិញ ដោយនាងបានចូលរួមសម្ដែងទាំងភាពយន្តចិន និងកូរ៉េ ព្រមទាំងបង្ហាញខ្លួនលើឆាកអន្តរជាតិលំដាប់ពិភពលោកទៀតផង៕

ប្រែសម្រួល៖ សន្យា

ចុចអាន៖ ហ្វាន ពីងពីង បង្ហាញមុខម្តងទៀត នៅឯមហោស្រពភាពយន្តទីក្រុងប៊ែកឡាំង

ចុចអាន៖ Fan Bingbing ទម្លាយការពិត ក្រោយបាត់ខ្លួនពីវិស័យសិល្បៈជាង ៥ ឆ្នាំ