ម៉េង កែវពេជ្ជតា ៖ ទឹកភ្នែកនៃភាពរំជួលចិត្ត​បានហូរចេញពីកែវភ្នែក​ខ្ញុំស្ទើរតែទប់មិនឈ្នះ​

ភ្នំពេញ ៖ តារាចម្រៀងសំនៀងផ្អែមអ្នកនាង ម៉េង កែវពេជ្ជតា បានសម្តែងអារម្មណ៍ដ៏រំភើបនិងរំជួលក្នុងចិត្តខ្លាំង​បន្ទាប់ពីសម្តេចតេជោ​ ហ៊ុន​ សែន​ នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញឡើងផ្តល់នូបផ្កា​ដល់កូនស្រី​របស់ខ្លួនឈ្មោះម៉េង​ ពេជ្ជតាសង្វាពេជ្រ​ ហៅអូនផ្អែមដោយផ្ទាល់ដៃនាពិធីអាហារសាមគ្គីអបអរសាទរទិវាវប្បធម៌ ​៣​ មីនា​។

ថ្លែងចេញពីអារម្មណ៍ដ៏រំភើបអ្នកនាង ម៉េង កែវពេជ្ជ តា បានរៀបរាប់ខ្លឹមសារបង្ហាញពីអារម្មណ៍ពិតថាយប់មិញម៉ោងជិត​២ភ្លឺទៅហើយ​ ខ្ញុំនៅគេងមិនលក់ទៀត​ក្នុងអារម្មណ៍ចេះតែស្រម៉ៃឃើញអំពីទិដ្ឋភាពដ៏ភ្ញាក់ផ្អើលមិននឹកស្មាន​ដល់មួយ​ដែលកើតឡើង​ចំពោះមុខខ្ញុំជាមួយកូនស្រី​ និងមនុស្សជាង៤០០០នាក់ទៀត ។ រាត្រីថ្ងៃព្រហស្បតិ៍ទី​០២​ ខខែមីនា​ឆ្នាំ២០២៣ ​គឺជាថ្ងៃប្រវត្តិសាស្ត្រ​ដ៏ល្អពិសេសមួយទៀតរបស់ខ្ញុំនិងគ្រួសារជាពិសេសសម្រាប់​កូនផ្អែមព្រោះជាខែកំណើត​របស់នាង។

អ្នកនាង ម៉េង កែវពេជ្ជតា បានបន្តដូច្នេះ« មិនដឹងថាត្រូវបរិយាយឬបញ្ចេញកាយវិការ​បែបណាទៀតទេ ដើម្បីឱ្យនឹង​សេចក្តីរំភើប​ដែលពោរពេញ ដោយ​មោទកភាព​ និងសែនមហាអស្ចារ្យមួយនេះ​។ បទចម្រៀង​ ចាប៉ីផ្អែម​ ដដែលច្រៀង​ដោយនាងខ្ញុំម៉េង​ កែវពេជ្ជតា​ អមដោយសម្លេងចាប៉ីពីកូនស្រី​ ម៉េង​ ពេជ្ជតាសង្វាពេជ្រ​ ហៅអូនផ្អែម​ក្នុងពិធីពិសារ​បាយសាមគ្គីអបអរសាទរទិវាវប្បធម៌​ ៣​ មីនា​ ដែលរៀបចំដោយ​ក្រសួងវប្បធម៌​ និងវិចិត្រសិល្បៈត្រូវបាន​សម្តេចអគ្គមហា​សេនាប​តីតេជោ​ ហ៊ុន​ សែន​ នាយករដ្ឋមន្ត្រីនៃព្រះរាជាណាចក្រកម្ពុជាដ៏ខ្ពង់ខ្ពស់អញ្ជើញឡើងមកជូនផ្កាដល់អូនផ្អែម ដោយផ្ទាល់ដៃ ព្រះអើយកូនស្រីដ៏មានសំណាងខ្ពស់របស់ម៉ែភ្លាមៗ​ទឹកភ្នែកនៃភាពរំជួលចិត្តបានហូរចេញពីកែវ​ភ្នែកខ្ញុំស្ទើរតែទប់មិនឈ្នះ​អ្នកណាយល់អារម្មណ៍នេះខ្លះ​ ? ។

តារាចម្រៀង ម៉េង កែវពេជ្ជតា លើកឡើងទៀតថា ខ្ញុំរកតែលុតជង្គង់ម្តងៗនៅចំពោះមុខលោកទៅហើយទៅតាមចិត្តដែល​គោរព​និងសេចក្តីត្រេកអរឥតឧបមា​របស់ខ្ញុំ​ ប៉ុន្តែទាស់តែសំពត់របស់ខ្ញុំតឹងពេកដែលខ្ញុំពុំអាច​បានត្រឹមតែបន្ទន់ជង្គង់​លំអោនខ្លួន​និងក្បាលដើម្បីជាកិច្ចតបឆ្លើយចំពោះទឹកចិត្តដ៏មេត្តាករុណាដ៏ខ្ពង់ ខ្ពស់និងមហិមារបស់សម្តេចពុក​សម្តេចម៉ែមកកាន់កូ ននិងចៅៗ។ ថាខ្ញុំទៅគេងមិនលក់​ ឯកូនស្រីផ្អែមវិញ ក៏ដូចគ្នាគាត់ប្រាប់ខ្ញុំថា​ គាត់មានអារម្មណ៍កក់​ក្តៅ​ខ្លាំងណាស់​ ហើយហាក់ដូចជាមានថាមពលពិសសអ្វី មួយមកផ្តល់ឱ្យគាត់កាន់តែមានជំនឿចិត្តនៅពេល​ដែលលោក​តា​អញ្ជើញឡើងមកហុចផ្កាហើយអង្អែលក្បាល​ព្រមជាមួយនឹងប្រសាសន៍សរសើរដ៏ពីរោះនិងមានតម្លៃថា​”​ពូកែណាស់ចៅ​ខំរៀនបន្តទៀតណាចៅណា៎”៕

អត្ថបទ៖ ចាន់រ៉ា