ម៉េង កែវពេជ្ជតា ស្នើទប់ស្កាត់នូវទង្វេីរិះគន់គ្មានការចេះដឹង ដោយការបំផ្លាញជាតិឯង​

តារាចម្រៀងល្បីឈ្មោះអ្នកនាង ម៉េង កែវពេជ្ជតា បានចេញមុខស្នើឲ្យចូលរួមទប់ស្កាត់នូវទង្វេីរិះគន់គ្មានការចេះដឹង និងពេញដោយការបំផ្លាញជាតិឯង​បន្ទាប់ពីមានអ្នករិះគន់មកលើអ្នកនាង និងកូនស្រី ជុំវិញការស្លៀកពាក់សម្លៀកបំពាក់ប្រពៃណីខ្មែរថតបទចម្រៀងផ្សព្វផ្សាយទៅកាន់ពិភពលោក។

កំពូលតារាចម្រៀង ម៉េង កែវពេជ្ជតា បានចាត់ទុកទង្វើនោះជាគំរូមិនល្អសម្រាប់សង្គម និងគ្មានផលចំណេញដល់វិស័យទេសចណ៍ស្រុកយេីងទេ​។ អ្នកនាង ម៉េង កែវពេជ្ជតា បានរៀបរាប់ថា ម៉ែកូនខ្ញុំថតចម្រៀងបទខ្មែររៀបរាប់ពីភាពអស្ចារ្យនៃប្រាង្គប្រាសាទអង្គរវត្ត​ រួមទាំងមានការបង្ហាញ​ពីឧបករណ៍ចាបុីដងវែងរបស់ខ្មែរផង​ ដេីម្បីផ្សព្វផ្សាយទៅកាន់ពិភពលោកឲ្យចូលលេងស្រុកយេីង​។

អ្នកនាង ម៉េង កែវពេជ្ជតា បន្តថា អ្នកនាងបានចំណាយទាំងកម្លាំងកាយ និងចិត្តយ៉ាងសម្រិតសម្រាំង​ តែបែរជាមានអ្នកទេីសថា អ្នកនាងភ្នែកចិន និងប្រាប់ឲ្យឈប់ស្លៀកពាក់សម្លៀកបំពាក់ប្រពៃណីខ្មែរទៅវិញ។ ត្រង់ចំណុចនេះ អ្នកនាងចោទសួរទៅវិញថា បើបែបនេះតើឲ្យអ្នកនាងស្លៀកអ្វី​?

ទន្ទឹមនេះ អ្នកនាងក៏បានលើកឡើងពីសំណួរមួយចំនួនទៅកាន់អ្នករិះគន់ដែរថា “ស្មានថាការស្លៀកឈុតបុរាណហ្នឹងងាយបានស្លៀក​ ឬក៏ស្លៀកងាយឬ​? ស្មានថាការថតបទចម្រៀង ឬផលិតវីដេអូមួយៗវាងាយណាស់ឬ​? ស្មានថាការថត បទចម្រៀងដែលមានឧបករណ៍ភ្លេងតូចធំ​ ខ្លីវែង​នេះ វាងាយស្រួលដឹកជញ្ជូនណាស់ឬ​?”

តារាចម្រៀងជើងចាស់រូបនេះ សង្កត់ធ្ងន់ទៀតថា “តើការបញ្ចេញមតិបែបនេះ ចំណេញដល់វិស័យទេសចណ៍ស្រុកដែរទេ​ ? បេីសិនជាមានជនបរទេសណាម្នាក់គាត់ស្លៀកពាក់សម្លៀកបំពាក់បុរាណខ្មែរ​ ហេីយត្រូវមានបំរាមបែបនេះបែបនោះ ជឿទេថាគេនឹងឈប់មកលេងឈប់មកទស្សនា​ និងឈប់មកស្រុកខ្មែរ​មិនបាន”។

បន្ថែមពីនេះ អ្នកនាង ម៉េង កែវពេជ្ជតា អំពាវនាវឱ្យសាធារណជនពិសេសអ្នកគាំទ្រជួយទប់ស្កាត់នូវទង្វេីនេះ និងអះអាងថា អ្នកនាងមានតែកម្លាំងចិត្តធ្វើអ្វីដេីម្បីតែសិល្បៈ​ ដេីម្បីប្រទេស​ ដេីម្បីទស្សនិកជន តែអ្នកនាងគ្មានកម្លាំងទទួលយកសម្ពាធអារម្មណ៍បែបនេះនោះទេ។

គួរជម្រាបថា “ចាប៉ីផ្អែម” ជាបទចម្រៀងថ្មីរបស់អ្នកនាង ម៉េង កែវពេជ្ជតា ដែលពោរពេញដោយអត្ថន័យ និងបានផ្តិតយកទីតាំងប្រាសាទអង្គរ រួមបញ្ចូលសំឡេងចាប៉ីដងវែង ដេញផ្ទាល់ដោយកូនស្រីរបស់អ្នកនាង គឺកុមារី ម៉េងពេជ្ជតា សង្វាពេជ្រ ក្នុងន័យលើកស្ទួយតម្លៃវប្បធម៌ជាតិ៕ អត្ថបទ៖ ចាន់រ៉ា