ជីវិតកម្សាន្ដ

ឆ្លងកាត់ឧបសគ្គច្រើន កញ្ញា ម៉ៃយ៉ា នៅតែបន្តខំប្រឹង ដើម្បីឈោងចាប់ក្ដីស្រមៃលើឆាកអន្តរជាតិ

បានផុស

៣ ខែ មុន

នៅ

ថ្ងៃអង្គារ ១៤ មីនា ២០២៣

ដោយ

ដូចដែលមហាជនបានដឹងហើយថា ម្ចាស់មកុដ MQC 2023 (Miss Queen Cambodia2023 ) កញ្ញា ម៉ៃយ៉ា ថ្មីៗនេះ នាងទើបតែទទួលបានជយលាភីក្នុងកម្មវិធីប្រកួតសម្រស់បវរកញ្ញាភេទទី ៣ ខាងលើ។ ព្រមគ្នា នៃការឈ្នះមកុដនេះដែរ កញ្ញា ម៉ៃយ៉ា ក៏ទទួលបានការចូលរួមអបអរសាទរ និង មួយចំនួនទៀតផ្ទុះការរិះគន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈមតិរិះគន់ពីសំណាក់អ្នកគាំទ្រខ្លះបាននិយាយថា ម៉ៃយ៉ា មិនសក្ដិសមទទួលបានតំណែងធំនេះទេ ព្រោះគេយល់ឃើញថា នាងនៅមានចំណុចខ្វះខាតដូចជា ស្ទើរកម្ពស់ មិនសូវស្អាត ឬមិនសូវចេះភាសាជាដើម។ ជាការពិត បើកត់សម្គាល់ចំពោះម្ចាស់មកុដបវរកញ្ញាភេទទី ៣ កញ្ញា ម៉ៃយ៉ា ប្រហែលជាស្ទើរកម្រិតភាសានិយាយអង់គ្លេស ក្រោយនាងឆ្លើយសំណួរវគ្គចុងក្រោយជាភាសាខ្មែរ។

ឆ្លើយតបការរិះគន់មួយចំនួនរបស់អ្នកគាំទ្រ បវរកញ្ញា ម៉ៃយ៉ា បាននិយាយថា នាងមិនខឹងចំពោះអ្នកមួយចំនួនដែលមិនពេញចិត្តចំពោះតំណែងរបស់នាងទេ តែនេះជាអ្វីដែលនាងខិតខំប្រឹងប្រែង ក្រោមការតាមដានគ្រប់ជំហានរបស់គណៈកម្មការ។ នាងបញ្ជាក់ថា រយៈពេល ៣ ឆ្នាំ កន្លងមកនេះ ពេលនេះក្ដីស្រមៃរបស់នាងបានក្លាយជាការពិតហើយ ក្នុងការប្រឡង Miss Queen Cambodia 2023។

ម៉ៃយ៉ា បន្តទៀតថា នាងបានខំប្រឹងតស៊ូជាមួយការងារថ្មីៗដែលជាវិញ្ញាសាគេដាក់ឲ្យដោយប្រើពេលវេលាពីរខែទើបមានឱកាសឈ្នះបែបនេះ។ នាងថា ជ័យជំនះកើតចេញពីការខិតខំ ហើយក៏មានអត្តចរិតល្អ តួនាទីការងារបំពេញឲ្យល្អ នោះជាអ្វីដែលចង់បាន។ ដូច្នេះនាងនឹងព្យាយាមពង្រឹងសមត្ថភាពខ្លួនឯងឲ្យបានល្អបន្តទៀត ដើម្បីឱកាសចូលទៅកាន់ការងារលំដាប់ពិភពលោក ព្រោះនោះជាអ្វីដែលនាងបានប៉ងយូរមកហើយ ដោយសារចង់ប្រើសំឡេង និងសមត្ថភាពកូនខ្មែរឲ្យពិភពលោកបានឃើញ ដើម្បីមុខមាត់ជាតិយើង នេះជាទិសដៅដែលនាងចង់បានបន្ថែមទៀត។

បន្ថែមពីនេះដែរ កញ្ញា ម៉ៃយ៉ា ក៏បានផ្ដាំផ្ញើដល់អ្នកចង់ប្រឡងវិស័យបវរកញ្ញាដូចនាង ត្រូវតែតស៊ូ ហើយជម្នះគ្រប់ឧបសគ្គ គ្មានភាពជោគជ័យណាបានមកដោយស្រួលនោះឡើយ។ រីឯការនិយាយភាសា គឺនាងថាអាចប្រើប្រាស់ភាសាអង់គ្លេស និងចិន ហើយកំពុងដាក់ផែនការរៀនភាសាថៃ ដើម្បីទុកប្រើប្រាស់ពេលប្រឡងលើឆាកអន្តរជាតិនៅឆ្នាំ ២០២៤ ខាងមុខ៕

អត្ថបទ ៖ ចាន់រ៉ា