ជីវិតកម្សាន្ដ

តារាប្រុសចាស់វស្សា Nirut ទម្លាយមូលហេតុមិនចូលនិវត្តន៍ ទោះមានវ័យជ្រេស្មើលោកតា

បានផុស

៣ years មុន

នៅ

ថ្ងៃព្រហស្បតិ៍ ៣០ មីនា ២០២៣

ដោយ

ត្បិតថាមានវ័យជ្រេហើយក្ដី ប៉ុន្តែតារាប្រុសសម្ដែងជើងចាស់លោក Nirut Sirijanya មិនទាន់គិតចង់ចូលនិវត្តន៍ពីពិភពសិល្បៈនូវឡើយទេ ដោយថា ទាល់តែលែងមានអ្នកណាឈប់ជួលលោកឲ្យសម្ដែងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងព្រឹត្តិការណ៍មួយអ្នកសារព័ត៌មានបានសួរសុខទុក្ខលោក ហើយក៏ឈានដល់ការជជីកសួរពីអាជីពសម្ដែងបច្ចុប្បន្ននេះលោក Nirut Sirijanya បានឆ្លើយថា ក្នុងអំឡុងពេលនេះ លោកនៅតែមានកម្លាំងដើម្បីបន្តធ្វើការនៅក្នុងឧស្សាហកម្មកម្សាន្តដដែល។ លោកបន្ថែមទៀតថា “ខ្ញុំមិនទាន់គិតពីការចូលនិវត្តន៍នៅឡើយទេ ទោះបីជាខ្ញុំមានអាជីវកម្មផ្ទាល់ខ្លួនត្រូវធ្វើក៏ដោយ។ ប៉ុន្តែនឹងឈប់សម្ដែងតែពេលគ្មានអ្នកណាជួលខ្ញុំប៉ុណ្ណោះ ហើយបើគ្មានអ្នកណាជួលឲ្យសម្ដែង ខ្ញុំនឹងត្រឡប់ទៅផ្ទះវិញ ថែសួននៅខេត្តចាន់ថាបុរី”។

ជាមួយគ្នានោះដែរ ក្រុមអ្នកសារព័ត៌មានក៏បានសួរពីវិធីថែទាំសុខភាពឲ្យនៅតែរឹងមាំ ខណៈឃើញតារាចាស់វស្សារូបនេះនៅតែមានសុខភាពល្អនៅពេលដែលលោកជិតឈានចូលអាយុវ័យ ៨០ ឆ្នាំហើយ។ លោក Nirut ឆ្លើយមិនបង្អង់យូរថា មិនមានអាថ៌កំបាំងអ្វីពិសេសទេ គ្រាន់តែដាក់វិន័យក្នុងការហាត់ប្រាណជាប្រចាំថ្ងៃប៉ុណ្ណោះ។

តួប្រុសដែលគេនិយមឃើញលោកសម្ដែងជាតួឪពុកឬលោកតា បានចាប់អាជីពមួយនេះក្នុងឧស្សាហកម្មជាច្រើនទសវត្សរ៍មកហើយ។ លោកបានឈ្នះពានរង្វាន់រាប់មិនអស់ ក្រោយចំណាយពេលពេញមួយជីវិតក្នុងអាជីពសម្ដែង តារាសម្ដែងវ័យចំណាស់ Nirut នៅតែមានស្នាដៃជូនដល់ជូនអ្នកគាំទ្រ និងតែងបង្ហាញមុខតាមកញ្ចក់ទូរទស្សន៍ជានិច្ចកាល មិនដែលអាកខានមុខម្ដងណាឡើយ៕