ម្ចាស់បទ My Heart Will Go On ទំនងមិនអាចបន្តអាជីពចម្រៀងទៀតទេ

តារាចម្រៀងជើងចាស់ Celine Dion ម្ចាស់បទ “My Heart Will Go On” កំពុងប្រឈមបញ្ហាសុខភាពធ្ងន់ធ្ងរ ដែលអាចនាំឱ្យនាងមិនត្រឡប់មកឆាកតន្ត្រីវិញបាន ក្រោយគ្រូពេទ្យរកឃើញជំងឺសរសៃប្រសាទដ៏កម្រមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗនេះតារាចម្រៀងជនជាតិកាណាដា Celine Dion បានប្រកាសលុបចោលការប្រគំតន្ត្រីទាំងអស់របស់ខ្លួន ដោយពន្យាពេលរហូតដល់ខែមេសា ឆ្នាំ២០២៤ បន្ទាប់ពីវេជ្ជបណ្ឌិតធ្វើរោគវិនិច្ឆ័យថា នាងមានជំងឺសរសៃប្រសាទដ៏កម្រ (stiff-person syndrome ) ដែលបណ្តាលឱ្យមានការស្ពឹកស្រពន់រាងកាយ។

ដោយសារបញ្ហាសុខភាពតម្រូវឱ្យសម្រាកព្យាបាលជាប់លាប់ និងតាមដានយ៉ាងទៀងទាត់ តារាស្រីវ័យ ៥៥ឆ្នាំរូបនេះ ត្រូវខកខានការងារជាច្រើនមិនថា ការប្រគំតន្ត្រីទេសចរណ៍ ដំណើរកម្សាន្តផ្ទាល់ខ្លួន រួមទាំងកិច្ចការសំខាន់ៗមួយចំនួនទៀត។

ទោះយ៉ាងណា Celine Dion បានប្រាប់ទស្សនាវដ្ដី PEOPLE ថា នាងកំពុងតស៊ូនឹងជំងឺខ្លួនឯងយ៉ាងខ្លាំង ដើម្បីធ្វើយ៉ាងណាអាចត្រឡប់ទៅច្រៀងវិញបាន ព្រោះនាងពិតជាស្រឡាញ់សិល្បៈតន្ត្រី និងចង់សម្តែងជូនទស្សនិកជនរបស់នាង។

ពេលនេះស្ថានភាពជំងឺរបស់ម្ចាស់បទ “My Heart Will Go On” នៅមិនទាន់អាចអះអាងបានឡើយថា តើនឹងជាសះស្បើយនៅពេលណា ខណៈក្រុមគ្រូពេទ្យកំពុងបន្តតាមដាន និងខិតខំព្យាបាលផងដែរ៕

ប្រែសម្រួល៖ សន្យា

ចុចអាន៖ តារាចម្រៀងជើងចាស់ Celine Dion លក់ផ្ទះតម្លៃ ៣០ លានដុល្លារ

ចុចអាន៖ ការប្រគំតន្ត្រី Born Pink នៅជប៉ុនថ្ងៃស្អែក នឹងគ្មានវត្តមាន Jisoo ទេ