ជីវិតកម្សាន្ដ

មិនអាចចូលដល់ Top តែ លីវ ជីលី បានយកឈ្នះដួងចិត្តអ្នកគាំទ្រនៅកម្ពុជា

បានផុស

៣ years មុន

នៅ

ថ្ងៃសៅរ៍ ១៥ កក្កដា ២០២៣

ដោយ

ប្រាកដណាស់មហាជន និងអ្នកគាំទ្រ បានបង្ហាញការចូលរួមសោកស្ដាយគ្រប់គ្នា ខណៈបវរកញ្ញាកម្ពុជា កញ្ញា លីវ ជីលី ពុំអាចចូលទៅដល់ក្នុង Top កំពូលណាមួយ នៃការប្រកួតលើឆាកអន្តរជាតិ Miss Supranational 2023 នៅប្រទេសប៉ូឡូញ។

បើទោះបីជាយ៉ាងនេះក៏ពិតមែន សម្រាប់កញ្ញា លីវ ជីលី នៅតែរក្សាបានការគាំទ្រ និងលើកទឹកចិត្តខ្លាំងពីសំណាក់ប្រជាជនកម្ពុជា ដែលនាងបាននាំយកឈុតតំណាងជាតិទៅបង្ហាញនៅលើឆាកអន្តរជាតិ ដើម្បីឲ្យពិភពលោកបានស្គាល់កាន់តែច្បាស់នូវអរិយធម៌ វប្បធម៌ដូនតាបានបន្សល់ទុក។

ដោយឡែកសម្រាប់អ្នកគាំទ្រមួយចំនួនទៀតនៅតែបន្តការលើកទឹកចិត្ត និងយល់ឃើញថា កញ្ញា ជីលី នៅតែជា Miss តំណាងឲ្យកម្ពុជា ដែលល្អផ្ដាច់ ទោះបីមិនអាចចូលទៅក្នុង Top ណាមួយក៏ពិតមែន។ ម្យ៉ាងទៀតអ្វីដែលរំភើបនោះ លីវ ជីលី ជាបវរកញ្ញាតំណាងកម្ពុជាអាចយកឈ្នះចិត្តអ្នកគាំទ្រជាច្រើនដែលបានសរសើរពីឆន្ទៈខំប្រឹងធ្វើបានយ៉ាងល្អនៅលើឆាកអន្តរជាតិយប់មិញ។

នៅលើផេក International Beauty Queen បានលើកឡើងថា «កញ្ញា ជីលី ទេវី ពិតជាធ្វើបានល្អខ្លាំងណាស់ លើឆាក Miss Supranational កាលពីយប់មិញ នេះទាំងការដើរ ភាពជឿជាក់ សម្រស់ដ៏ស្រស់ស្អាត ជាពិសេសគឺ evening gown ដ៏ស្រស់ស្អាត និងមានភាពប្រណីតបំផុត។ យើងនៅតែមានមោទនភាពចំពោះកញ្ញាដែលធ្វើបានល្អហើយក្នុងការតំណាងជាតិយើង»។

ប្រភពដដែលក៏បានបន្ថែមដោយការសោកស្ដាយដែរថា «ចូលរួមសោកស្ដាយកម្ពុជា ជីលី ខកខានមិនអាចចូលទៅដល់វគ្គ Top24 ឡើយ ប៉ុន្តែតាមដែលយើងសង្កេតមើលឃើញទាំងអស់គ្នា កញ្ញា បានខំប្រឹងអស់ពីសមត្ថភាពហើយ»។ ចំណែកអ្នកគាំទ្របានលើកឡើងដែរថា «អ្នកធ្វើបានល្អគ្រប់ជ្រុងជ្រោយ គឺស្ទើរតែគ្មានចន្លោះខ្វះខាតអ្វីទាំងអស់ អ្នកបានខិតខំប្រឹងប្រែងលះបង់ទាំងកម្លាំងកាយកម្លាំងចិត្ត ដើម្បីតំណាងឲ្យប្រទេសកម្ពុជានៅលើឆាកអន្តរជាតិ អ្នកពិតជាអស្ចារ្យ អ្នកធ្វើបានល្អគ្រប់បែបបទទាំងអស់»។

ប្រភពបន្តទៀតថា «អ្នកគឺបានខិតខំប្រឹងប្រែង និងតស៊ូយ៉ាងខ្លាំងក្លាហើយ អ្នកក៏បានសាងកេរ្តិ៍ឈ្មោះបានសាងភាពលេចធ្លោជូនប្រទេសកម្ពុជារួចហើយ ទោះបីជាអ្នកមិនបានចូលទៅដល់ Topកំពូលណាមួយក៏ដោយ ប៉ុន្តែអ្នកបានឈ្នះនៅក្នុងដួងចិត្តប្រជាជនកម្ពុជាទាំងអស់ មិនតែប៉ុណ្ណោះអ្នកបានធ្វើឲ្យពិភពលោកបានឃើញថា អ្នកតំណាងឲ្យកម្ពុជា ហើយប្រជាជនកម្ពុជានៅតែស្រលាញ់អ្នក ស្រឡាញ់គ្មានថ្ងៃប្រែ»៕

អត្ថបទ ៖ ចាន់រ៉ា