ជីវិតកម្សាន្ដ

ម្ចាស់មកុដ Miss Grand 2023 ប្ដេជ្ញានាំភាពអស្ចារ្យរបស់កម្ពុជា ទៅកាន់ឆាកអន្តរជាតិ

បានផុស

៣ years មុន

នៅ

ថ្ងៃព្រហស្បតិ៍ ២៤ សីហា ២០២៣

ដោយ

ថ្វីត្បិតមានមតិរិះគន់មួយចំនួនសម្ដែងការមិនពេញចិត្តលទ្ធផលដែលនាងទទួលបានជ័យជំនះក្ដី តែកញ្ញា ភឹម ស្រីនោ ម្ចាស់មកុដ Miss Grand Cambodia 2023 បានប្រកាសប្ដេជ្ញានឹងខំប្រឹងឲ្យអស់ពីសមត្ថភាពក្នុងការតំណាងឲ្យកម្ពុជាប្រកួតលើឆាកអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា ភឹម ស្រីនោ បន្ទាប់ពីទទួលជ័យជំនះនេះ នាង ត្រូវបំពេញកាតព្វកិច្ចដ៏សំខាន់មួយនាពេលខាងមុខនេះ គឺក្លាយខ្លួនជាបវរកញ្ញាតំណាងឲ្យប្រទេសកម្ពុជាទៅចូលរួមលើឆាកអន្តរជាតិក្នុងកម្មវិធី Miss Grand International 2023 ដែលប្រារព្ធឡើងនៅប្រទេសវៀតណាម ខណៈការប្រកួតនឹងចាប់ផ្ដើមនៅខែតុលា ឆ្នាំ ២០២៣ ខាងមុខនេះ។

ម្ចាស់មកុដ ភឹម ស្រីនោ បានបញ្ជាក់ថា «ខ្ញុំសូមអរគុណដល់អ្នកមានគុណរបស់ខ្ញុំទាំងពីរដែលបានចិញ្ចឹមបីបាច់ថែរក្សាខ្ញុំ បង្រៀនខ្ញុំឲ្យក្លាយជាមនុស្សរឹងមាំ មានការតស៊ូតាំងពីតូចមក ទោះបីជាលោកទាំងពីរលំបាកយ៉ាងណា ក៏លោកទាំងពីរតែងតែប្រាប់ឲ្យកូនក្លាយជាមនុស្សល្អនៅក្នុងសង្គម»។ នាង បន្តថា «នាងខ្ញុំ ក៏សូមអរគុណចំពោះក្ដីស្រលាញ់របស់ប្រជាជនខ្មែរ និងអ្នកគាំទ្រ ដែលតែងតែផ្ដល់នូវកម្លាំងចិត្ត និងការចូលចិត្តមកលើរូបនាងខ្ញុំ»។

ភឹម ស្រីនោ បញ្ជាក់ថា «សូមសន្យាថា នាងខ្ញុំ នឹងខិតខំប្រឹងប្រែងឲ្យអស់ពីសមត្ថភាព ដើម្បីនាំប្រទេសកម្ពុជាដ៏ល្អមួយនេះទៅកាន់ឆាកអន្តរជាតិ នៃ Miss Grand International 2023 នាងខ្ញុំ សង្ឃឹមថា ពុកម៉ែបងប្អូននៅតែបន្តការគាំទ្រមកដល់រូបនាងខ្ញុំផងណា៎! នាងខ្ញុំ ពិតជាត្រូវការអ្នកទាំងអស់គ្នា ដើម្បីរួមដំណើរមួយនេះជាមួយនឹងនាងខ្ញុំណាស់»។

ក្នុងការទទួលជោគជ័យនេះដែរ កញ្ញា ភឹម ស្រីនោ ក៏បានសម្ដែងការរំភើបខ្លាំង បន្ទាប់ពីក្ដីស្រមៃរបស់នាង ត្រូវបានសម្រេចដូចបំណងក្នុងវិស័យបវរកញ្ញាដែលបានលះបង់ពេលវេលាជាច្រើនមកហើយនោះ។ ជាការពិតណាស ភឹម ស្រីនោ គឺជាក្មេងស្រីម្នាក់ ដែលតែងតែដើរតាមក្ដីស្រមៃរហូតក្លាយជាម្ចាស់មកុដ Miss Grand Cambodia 2023៕

អត្ថបទ ៖ ចាន់រ៉ា