ជីវិតកម្សាន្ដ

ថ្ងៃសម្ភាសន៍! ស្រីនោ សុំកម្លាំងចិត្ត និងការជូនពរពីអ្នកគាំទ្រនៅកម្ពុជា

បានផុស

៣ years មុន

នៅ

ថ្ងៃអង្គារ ១៧ តុលា ២០២៣

ដោយ

បវរកញ្ញាតំណាងកម្ពុជាដែលជាម្ចាស់មកុដ Miss Grand Cambodia 2023 កញ្ញា ភឹម ស្រីនោ បច្ចុប្បន្នកំពុងតែបង្ហាញវត្តមានដើម្បីប្រកួតលើឆាក អន្តរជាតិនាទឹកដីប្រទេសវៀតណាម ខណៈនាងបានស្នើសុំឲ្យមានការផ្តល់កម្លាំងចិត្តពីមហាជន អ្នកគាំទ្រ និងប្រជាជនកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញមុខស្នើសុំកម្លាំងចិត្តពីសំណាក់បវរកញ្ញាកម្ពុជា ភឹម ស្រីនោ នេះគឺធ្វើឡើងស្របពេលដល់ថ្ងៃត្រូវចូលសម្ភាសន៍ និងត្រៀមខ្លួនចូលប្រកួតនៅក្នុងវគ្គផ្ដាច់ព្រ័ត្រដណ្ដើមមកុដ។ បវរកញ្ញា ភឹម ស្រីនោ បានលើកឡើងថា “សុំសារជូនពរ និងផ្តល់កម្លាំងចិត្តមួយមក ពុកម៉ែបងប្អូន ថ្ងៃនេះគឺ ជាថ្ងៃសម្ភាសន៍របស់នាងខ្ញុំ រង់ចាំទស្សនាទាំងអស់គ្នាណា”។

ពិតណាស់ មុនការចេញដំណើរទៅប្រកួតនៅលើឆាកអន្តរជាតិកញ្ញាឯករបស់កម្ពុជា ភឹម ស្រីនោ បានខិតខំហ្វឹកហាត់ដោយយកចិត្តទុកដាក់ និងស្ទាត់ជំនាញដើម្បីតំណាងឲ្យកម្ពុជាចូលរួមប្រកួតលើឆាកអន្តរជាតិ Miss Grand International នៅទឹកដីនៃប្រទេសវៀតណាម។

ជាក់ស្តែង សម្រាប់ការចេញទៅប្រកួតរបស់ ភឹម ស្រីនោ នេះនឹងនាំយកប្រទេសកម្ពុជា ទង់ជាតិរបស់កម្ពុជា វប្បធម៌ និងអរិយធម៌ដ៏ស្រស់ផូរផង់របស់កម្ពុជាទៅបង្ហាញនៅលើឆាកអន្តរជាតិផងដែរ។ ជាការកត់សម្គាល់ មុនពេលចេញទៅប្រកួត ស្រីនោ បានត្រៀមខ្លួនរួចជាស្រេចពោរពេញដោយភាពជឿជាក់ ក្លាហានក្នុងនាមបវរកញ្ញា ដែលតំណាងកម្ពុជា ចូលរួមប្រកួតលើឆាកអន្តរជាតិឆ្នាំនេះ។

ដោយឡែករឿងរ៉ាវដែលអ្នកតាមដានវិស័យបវរកញ្ញាចាប់អារម្មណ៍មុននេះ គឺបន្ទាប់ពីផ្ទុះការវែកញែក និងការរិះគន់យ៉ាងខ្លាំងៗទៅម្ចាស់មកុដ Miss Grand Cambodia២០២៣ កញ្ញា ភឹម ស្រីនោ ដែលតំណាងឲ្យប្រទេសកម្ពុជាចេញទៅប្រកួតលើឆាកអន្តរជាតិនាប្រទេសវៀតណាមជុំវិញរឿងលើកយកបទចម្រៀងថៃច្រៀងនៅលើឆាក Miss Grand International ។

ប៉ុន្តែភ្លាមៗនោះ អ្នកគ្រប់គ្រងស្ថាប័ន Miss Grand Cambodia អ្នកនាង អ៊ឹម សុគន្ធា បានចេញមុខបកស្រាយ ការពារ កញ្ញា ភឹម ស្រីនោ និងបញ្ជាក់ពីមូលហេតុពាក់ព័ន្ធបញ្ហាខាងលើនេះទៅកាន់មហាជនផងដែរ ៕

អត្ថបទ៖ ចាន់រ៉ា