ផលិតករខ្មែរមួយរូប ប្រកាសលក់រថយន្តផ្ទាល់ខ្លួន យកប្រាក់ផលិតកុនរឿងថ្មី

ផលិតករខ្មែរដ៏ល្បីឈ្មោះមួយរូប លោក ហ៊ុយ យ៉ាឡេង សកម្មខាងការផលិតខ្សែភាពយន្ត បែបរន្ធត់ ព្រឺព្រួច កាលពីពេលថ្មីៗនេះ បានប្រកាសលក់រថយន្តផ្ទាល់ខ្លួន ដើម្បីយកប្រាក់ផលិតកុនរឿងថ្មី មានចំណងជើងថា «ភ្នំខ្មោច ៧ យប់ ៧ ថ្ងៃ» ដែលជាស្នាដៃនិពន្ធ និងដឹកនាំថ្មី របស់លោក នៅដើមឆ្នាំ ២០២៤ នេះ។

លោក ហ៊ុយ យ៉ាឡេង បានលើកឡើងតាមរយៈបណ្តាញសង្គមហ្វេសប៊ុកផ្ទាល់ខ្លួនដោយសរសេររៀបរាប់យ៉ាងដូច្នេះថា «ទ្រពសម្បត្តិចុងក្រោយ ជីវិតបើមិនបានផលិតភាពយន្តស្មើនឹងស្លាប់ ប្រកាសលក់ឡានយកលុយថតភាពយន្ត បងប្អូនដែលបោះតង់ជួបខ្មោចជួយខមិនប្រាប់ផង ពេលនេះខ្ញុំកំពុងសរសេររឿង​ ភ្នំខ្មោច ៧ យប់ ៧ ថ្ងៃ កាដូឆ្នាំថ្មី គ្មានអ្វីក្រៅពីចង់ផលិតភាពយន្តជូនបងប្អូនទស្សនាឡើយ ខ្ញុំនឹងខិតខំបង្ហាញឱ្យអស់នូវក្បាច់គុណលងថ្មីៗ ២០២៤ ជូនបងប្អូនមិនឱ្យខកចិត្តឡើយ»។

យ៉ាងណាមិញ ផលិតករភាពយន្តខ្មែរ លោក ហ៊ុយ យ៉ាឡេង ក៏បានប្រាប់ឱ្យកម្ពុជាថ្មីដឹងដែរថា មូលហេតុដែលលោក សម្រេចចិត្តប្រកាសលក់រថយន្តជាទ្រព្យសម្បត្តិចុងក្រោយនោះ ដោយសារលោកមានឈាមជ័រជាអ្នកសិល្បៈស្រាប់។

ផលិតកររូបនេះ បន្តថា លោកពិតជាមានឆន្ទៈ និងចំណង់ចំណូលចិត្តយ៉ាងខ្លាំងក្នុងការផលិតភាពយន្តថ្មី ទោះកន្លងមកការផលិតកុនរបស់លោកមិនសូវចំណេញបានប្រាក់ខ្លះក៏ដោយ។ លោកបន្ថែមថា គោលបំណងធំចម្បងរបស់លោកក្នុងការផលិតភាពយន្តនេះ គឺធ្វើយ៉ាងណាឱ្យភាពយន្តខ្មែរអាចចូលរួមប្រកួតប្រជែងជាមួយភាពយន្តបរទេសបាននៅថ្ងៃខាងមុខ ទើបលោកនៅតែបន្តការផលិតភាពនេះឡើង។

ផលិតករ លោក ហ៊ុយ យ៉ាឡេង បញ្ជាក់ទៀតថា «ពួកយើងអាចស្គាល់ប្រទេសកូរ៉េ និងប្រទេសជប៉ុន បាន ក៏ដោយសារតែភាពយន្ត ឬ រឿងកុន ទាំងនេះដែរ ម្ល៉ោះហើយ ទើបខ្ញុំនៅតែបន្តធ្វើភាពយន្តខ្មែរ ដោយសង្ឃឹមថា ថ្ងៃណាមួយភាពយន្តខ្មែរយើង នឹងរីកចម្រើនស្មើមុខស្មើមាត់ និងមានការទទួលស្គាល់ពីគុណភាព ដូចបណ្ដាប្រទេសផ្សេងទៀតនៅលើសកលលោក យើងនោះដែរ»។

ជាចុងក្រោយ លោក ហ៊ុយ យ៉ាឡេង បានស្នើដល់មហាជន និងដៃគូសហការ ទាំងអស់ សូមមេត្តាជួយគាំទ្រវិស័យភាពយន្តខ្មែរ តាមរយៈការសហការផលិតជាថវិកា ទើបវិស័យភាពយន្តខ្មែរ អាចរីកចម្រើនជឿនលឿន ស្មើមុខស្មើមាត់ ជាមួយភាពយន្តបរទេសបានយ៉ាងពិតប្រាកដ។

សូមជម្រាប​ថា គម្រោងផលិតភាពយន្តរឿង ភ្នំខ្មោច ៧ យប់ ៧ ថ្ងៃនេះ គឺជាស្នាដៃនិពន្ធទី ១៨ របស់ លោក ហ៊ុយ យ៉ាឡេង ដែលកន្លងមក ផលិតកររូបនេះ បានផលិតភាពយន្តជាច្រើនប្រភេទសុទ្ធតែមានការគាំទ្រខ្លាំងពីទស្សនិកជន ក្នុងនោះមានដូចជា រឿងដើមចេកជ្វា រឿងកូវីដ-១៩ រឿងវិកលចរិត រឿងធ្មប់ រឿងដើម្បីកូន និងរឿងទារុណកម្មខ្មោចជាដើម…៕

អត្ថបទ ៖ សួស សិត