តួកាច Benz ទម្លាយថា នាងធ្លាប់វាយរឹកដាក់អ្នកគាំទ្រ ពេលកេរ្តិ៍ឈ្មោះល្បីល្បាញខ្លាំងកាលវ័យជំទង់

តារាសម្ដែងរៀមច្បងនាង Benz Phonchita ប្រាប់​ពី​បទ​ពិសោធន៍ដ៏គួរឲ្យសោកស្ដាយមួយ ដែលនាងធ្លាប់ធ្វើដាក់អ្នកគាំទ្រកាលនៅវ័យជំទង់ពេញដោយកេរ្តិ៍ឈ្មោះល្បីល្បាញខ្លាំង។ ក្នុងពេលនោះ នាងបានធ្វើពុតជាមិនឮគេហៅ ពេលដើរទៅផ្សារជាមួយម្ដាយ រហូតដល់ម្ដាយប្រាប់មកវិញ ធ្វើឲ្យនាងចងចាំមួយជីវិត។

ថ្វីបើតារាស្រីឆ្នាស់ឆ្នើមក្នុងភាពយន្តថៃ​ Benz Pornchita សម្ដែងបានរឿងតិចជាងមិត្តរួមអាជីពក្នុងជំនាន់ជាមួយគ្នាក្ដី ប៉ុន្តែភាពល្បីល្បាញមិនរីងស្ងួត ដែលនាងដើរតួដណ្ដើមស្វាមីគេ នៅតែដក់ជាប់ក្នុងដួងចិត្តទស្សនិកជនជាច្រើន។ ជាពិសេសនាប៉ុន្មានថ្ងៃមុននេះ តារា​សម្ដែង​ស្រី​ Benz បានទម្លាយប្រាប់ពីអារម្មណ៍ពិត​តាម​រយៈ YouTube: Klaoshow នៃបទពិសោធន៍​ជីវិត​របស់​នាង នៅ​ថ្ងៃ​ដ៏​ជោគជ័យ​មួយកាលគ្រានោះ។

រយៈពេលនៃការសន្ទនា Benz បើក​ចំហ​ថា កាល​គាត់​អាយុ​២១-២២​ឆ្នាំ គាត់​ជាមនុស្សឆោតល្ងង់ខ្លាំងណាស់ មានពេលមួយដែលគាត់​ទៅ​ផ្សារជាមួយម្ដាយ គាត់បានបង្កើតកំហុសឆ្គងធំខ្លាំង រហូតដល់ចងចាំវាមួយជីវិត។ កាលណោះអ្នកគាំទ្របានស្រែកហៅ Benz ប៉ុន្តែនាងបានធ្វើពុតជាអត់ឮ ហើយមិនងាកក្រោយមើលសូម្បីតែបន្តិចណាឡើយ។ ពេល​អ្នកម្ដាយ​ឃើញ​ដូច្នេះ​ គាត់បានព្រមានថា រវាង​មាន​អ្នក​ស្រលាញ់ និង​អ្នក​ស្អប់ ត្រូវរៀនបែងចែកឲ្យច្បាស់។

លើសពីនេះទៀត តារាស្រីឆ្នើមរូបនេះបាននិយាយបញ្ចាក់ទៀតថា “នៅពេលដែល Benz មានប្រជាប្រិយភាពបំផុត គ្រប់ទីកន្លែងដែលខ្ញុំបានទៅ មនុស្សបានស្វាគមន៍ខ្ញុំ។ អ្នកម៉ាក់តែងតែប្រាប់ខ្ញុំថា តែកាលណាយើងល្បីខ្លាំង វាគង់មានថ្ងៃមួយដែលយើងរលត់បានដូចគ្នា។ អ្នកម៉ាក់បានមានប្រសាសន៍បន្ថែមទៀតថា នៅពេលដែលគេហៅកូន មានន័យថា ពួកគេស្រលាញ់កូនគាំទ្រកូនហើយ”។

ម្តាយរបស់ Benz គាត់បានបង្រៀនកូនទៀតថា “គ្រាន់​តែ​ងាក​មក​ញញឹម​ មិនពិបាក​ទេ ញញឹមតែបន្តិចប៉ុណ្តោះនោះមហាជននឹងស្រឡាញ់កូនពេញមួយជីវិតរបស់គាត់។ ប៉ុន្តែបើកូនជ្រើសមិនងាកក្រោយ ពួកគាត់នឹងស្អប់កូនអស់មួយជីវិត។ ជ្រើសរើសអ្វីដែលត្រូវយក ហើយគិតថាជារឿងត្រឹមត្រូវបំផុតសម្រាប់ជីវិតរបស់យើង”។

យ៉ាងណាមិញ តារាសម្ដែងនិយមតួឆ្នាស់ Benz បានបញ្ចាក់ក្នុងបទសម្ភាសន៍ជាចុងក្រោយថា នេះជាមេរៀនមួយគួរចងចាំ មិនថានាងឬតារាប្រុស្រីស្រករក្រោយ គួរតែ​យកគំរូតាមនិងរៀនសូទ្រ។ បើចងឲ្យកេរ្តិ៍ឈ្មោះល្បីល្បាញយូរអង្វែង យើងត្រូវរៀនដាក់ខ្លួន ហើយស្រលាញ់មនុស្សដែលគេគាំទ្រយើងពិត៕

អត្ថបទ៖ សាង ស្រីល័ក្ខ

ចុចអាន៖តាមពិតតួកាច Benz កាត់សក់លេងស្ទីលថ្មីដោយសារចង់រម្លឹក២៤ឆ្នាំមុន ដែលនាងដើរតួដណ្ដើមស្វាមីគេ