តួអាសអាភាស Shu Qi ប្រារព្ធ​ខួប​អាពាហ៍ពិពាហ៍ ៨ ឆ្នាំ​ជាមួយស្វាមីយ៉ាងផ្អែមល្ហែម

តារា​សម្ដែង​តៃវ៉ាន់ Shu Qi បាន​ស្លៀក​សម្លៀក​បំពាក់​កូនក្រមុំ​ប្រពៃណី​ចិន​សម្រាប់​ការ​ប្រារព្ធ​ពិធី​គម្រប់ ៨ ឆ្នាំ​នៃ​អាពាហ៍ពិពាហ៍​ជាមួយ​នឹង​តារា​សម្ដែង​ហុងកុង Stephen Fung។​ តារាស្រីរូបនេះបានចែករំលែករូបថតជាមួយស្វាមីនៅលើគណនី Instagram របស់នាងកាលពីថ្ងៃព្រហស្បតិ៍ អមដោយចំណងជើងថា “អរគុណសម្រាប់ការអត់ធ្មត់ជាមួយខ្ញុំ និងសម្រាប់ការឈរក្បែរខ្ញុំពេញមួយឆ្នាំមកនេះ។”

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះថែមទៀតដែរ នាង​បាន​បន្ថែម​ថា​ “​អរគុណ​សម្រាប់​ការ​រៀបចំ​ថ្ងៃ​នេះ​។ នៅមានច្រើនទៀតដែលខ្ញុំចង់បង្ហាញ ខ្ញុំ​ស្រលាញ់​អ្នក”។

ដោយឡែកសារព័ត៌មាន Next Apple ក៏បានដែររាយការណ៍ថា ការប្រារព្ធពិធីនេះត្រូវបានគ្រោងទុកដោយស្វាមីរបស់​នាងសឹងតែទាំងអស់ ចំណែក Shu Qi គ្រាន់តែរកឃើញការរៀបចំរបស់ស្វាមីនៅពេលមកដល់កន្លែងសណ្ឋាគារតែប៉ុណ្ណោះ។ លើសពីនេះ Fung បាន​បន្ត​ការ​អញ្ជើញ​ទៅ​កាន់​មិត្តភ័ក្តិ​របស់​គាត់​និងមិត្ត Shu Qi រួម​ទាំង​តារា​សម្ដែង​តៃវ៉ាន់ Ruby Lin តារា​ចម្រៀង Jam Hsiao និង​តារា​ម៉ូដែល Kelly Lin។

អ្វីដែលជាទីចាប់អារម្មណ៍ខ្លាំងនោះគឺ ទឹកមុខរបស់អតីតតួអាសអាភាស Shu Qi បាននិយាយថា នាងពិតជារំភើបណាស់ដែលឃើញនំខេកដែលមានរូបប្តីរបស់នាង និងសត្វចិញ្ចឹមរបស់ពួកគេ។ ជាពិសេស គូស្នេហ៍​មួយ​គូ​នេះ​ក៏​បាន​សម្តែង​បទ​ចម្រៀង​នៅ​ក្នុង​ពិធី​នោះ​ដែរ ដោយ​លោក Fung លេង​ហ្គីតា និង​ធ្វើ​ឲ្យភរិយា​របស់​គាត់​មាន​ភាព​កក់ក្ដៅ។

ក្នុង​អំឡុង​ពេល​នៃ​ការ​ប្រារព្ធ​ពិធី Fung បាន​រៀបរាប់​ពី​ការ​ជួប​គ្នា​លើក​ដំបូង​របស់​គាត់​ជាមួយ Shu Qi ក្នុង​ឆ្នាំ ១៩៩៨ ដោយ​បាន​ចែក​រំលែក​ថា ភរិយារបស់លោកពិតជាមានសម្រស់ស្រស់ស្អាតខ្លាំង។ ថ្វីបើអ្នកទាំងពីររៀបការអស់រយៈពេលជាយូរណាស់មកហើយ ប៉ុន្តែក្ដីស្រលាញ់របស់តារាសម្ដែងទាំងពីររូបនេះនៅតែផ្អែមល្ហែមខ្លាំង មិនខុសបីការជួបគ្នាលើកដមបូងនោះទេ។

សូមជម្រាបជូនថា​ ​Shu Qi អាយុ ៥០ ឆ្នាំ បានចាប់ផ្តើមអាជីពរបស់នាងនៅក្នុងឧស្សាហកម្មកម្សាន្តកាលពីក្មេង ដោយដំបូងឡើយបានបង្ហាញខ្លួននៅក្នុងខ្សែភាពយន្តអាសអាភាស។ នាងទទួលបានការទទួលស្គាល់ពីអ្នកដឹកនាំរឿងល្បីៗនៅហុងកុង និងតៃវ៉ាន់នៅពាក់កណ្តាលទសវត្សរ៍ឆ្នាំ ១៩៩០ ហើយទទួលបានភាពល្បីល្បាញជាមួយនឹងតួនាទីឈានមុខគេក្នុងខ្សែភាពយន្តដូចជា “Viva Erotica” ក្នុងឆ្នាំ ១៩៩៦​ និង “Bishonen” ក្នុងឆ្នាំ ១៩៩៨ ។ ការទទួលស្គាល់ជាអន្តរជាតិរបស់នាងត្រូវបានពង្រឹងដោយតួនាទីរបស់នាងនៅក្នុងរឿង “The Transporter” និង “So Close” ក្នុងឆ្នាំ ២០០២ “Three Times” ក្នុងឆ្នាំ២០០៥ “My Wife Is a Gangster 3” ក្នុងឆ្នាំ ២០០៦ និង “Love” ក្នុងឆ្នាំ ២០១២។

នៅឆ្នាំ ២០២៣ នាងបានបម្រើការជាចៅក្រមនៅក្នុងប្រភេទចម្បងនៅមហោស្រពភាពយន្តអន្តរជាតិទីក្រុង Venice នេះរួមជាមួយនឹងភារកិច្ចគណៈវិនិច្ឆ័យពីមុនរបស់នាងនៅមហោស្រពភាពយន្តទីក្រុងប៊ែកឡាំងក្នុងឆ្នាំ ២០០៨ និងមហោស្រពភាពយន្តទីក្រុង Cannes ក្នុងឆ្នាំ ២០០៩ ធ្វើឲ្យនាងក្លាយជាសិល្បករស្រីទី ៣ នៃជនជាតិចិនដែលបានវិនិច្ឆ័យនៅឯមហោស្រពភាពយន្តអឺរ៉ុបធំៗចំនួនបី បន្ទាប់ពីតារាសម្តែង Gong Li និង Maggie Cheung ។

ទន្ទឹមនឹងអាជីពសម្តែងរបស់គាត់ Fung អាយុ ៥០ឆ្នាំ ក៏សកម្មជាតារាចម្រៀង អ្នកនិពន្ធ និងអ្នកដឹកនាំរឿងផងដែរ។ អ្នក​ទាំង​ពីរ​បាន​ផ្លាស់​ប្តូរ​ពី​មិត្ត​នឹង​គ្នា​អស់​រយៈ​ពេល​២០​ឆ្នាំ​មក​ជា​គូស្នេហ៍ ហើយ​នៅ​ទី​បំផុត​ជា​ប្តី​ប្រពន្ធ៕

អត្ថបទ៖ សាង ស្រីល័ក្ខ

ចុចអាន៖តារាចិន​ប្រុស-ស្រី ប៉ុន្មានរូប ក្រោយសម្ដែងភាពយន្តចប់ភ្លាម តម្លៃ​ខ្លួនក្នុងពាណិជ្ជកម្ម​កើន​ឡើង​ខ្លាំង​