ជីវិតកម្សាន្ដ

លោក គួច ខេវិន លើកទឹកចិត្តលោកគ្រូ អេ ភូថង បន្តលើកស្ទួយគុនខ្មែរឲ្យខ្ពស់ត្រដែត ល្បីរន្ទឺ

បានផុស

១៨ វិនាទី មុន

នៅ

ថ្ងៃពុធ ២៤ កក្កដា ២០២៤

ដោយ

អ្នកដឹកនាំផលិតកម្មវិធីកម្សាន្តលោក គួច ខេវិន បានចេញមុខលើកទឹកចិត្តដល់លោកគ្រូ អេ ភូថង និងភរិយាលោកស្រី សាំង សុម៉ាលី និងកូនស្រី អេយ៉ា នុត ឲ្យបន្ដសកម្មភាពលើកស្ទួយវិស័យគុនខ្មែរឲ្យខ្ពស់ត្រដែតល្បីរន្ទឺ ជួយបណ្ដុះគ្រាប់ពូជគុនខ្មែរឲ្យដុះដាលរីកលូតលាស់ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គួច ខេវិន បានក៏បានស្នើដល់ប្រធានសហព័ន្ធគុនខ្មែរគួរតែបន្ធូរបន្ថយនូវអ្វីដែលជាកំហុសអចេតនានា ឬកំហឹងមួយគ្រារបស់លោកគ្រូ អេ ភូថង និងភរិយា លោកស្រី សាំង សុម៉ាលី ព្រមទាំងកូនស្រី អេ យ៉ានុត
ព្រោះពួកគាត់ហ្នឹងហើយដែលជាសសរទ្រូងរបស់គុណខ្មែរ ។

លោក គួច ខេវិន បានរៀបរាប់ថា «គុណមួយសំពៅ កំហុសប៉ុនចង្វា ចូលទៅរលាយគុណអស់” បើនឹកគិតពិចារណាទៅដល់សុភាសិតខ្មែរមួយឃ្លានេះ រូបខ្ញុំនឹងអ្នកផងទាំងឡាយ ពិតជាខ្លោចចិត្តអាណិតលោកគ្រូប្រដាល់ អេ ភូថង ,ភរិយា និងកូនស្រី ព្រមទាំងសិស្សគុនផ្សេងទៀត ដែលត្រូវបញ្ឈរជើង ៦ខែ មិនឲ្យទៅក្បែរសង្វៀនដោយសារតែការតវ៉ាទៅនឹងអ្វីដែលពួកគាត់នឹងអ្នកទស្សនាកីឡាវាយតប់នេះយល់ឃើញថា អយុត្តិធម៌»។

លោកបន្តថា «ក្នុងនាមជាកូនខ្មែរជាអ្នកគាំទ្រគុនខ្មែរដែលទើបតែមានគេស្គាល់ដោយសារការថែរក្សា ការពារ លើកស្ទួយ ដោយពូជអំបូរអ្នកក្បាច់គុន តួយ៉ាង ដូចជា ពូជអ្នកប្រដាល់ អេ ភូថង នេះជាដើម ដែលលះលង់ប្រឹងប្រែងលើកជ្រោងបង្វឹក បង្ហាត់ កូនខ្មែរស្រឡាញ់គុនខ្មែរឲ្យរឹងមាំ ល្បីល្បាញរហូតឆាកអន្តរជាតិទទួលស្គាល់ និងជួយឲ្យអ្នកពាក់ក្រវាត់.ក បានហ៊ោកញ្ជ្រៀវ រងាវអើតចំពុះទទៈ ស្លាបទាំងពុំបានបណ្តុះសូម្បី តែអ្នកបោសជូតសង្វៀនម្នាក់»។

ផលិតកររូបនេះបញ្ជាក់ទៀតថា “ខ្ញុំបានស្គាល់ អេ ភូថង តាំងតែពីនៅជាកីឡាករក្រីក្រ រហូតឥឡូវក្លាយទៅជាតាគ្រូប្រដាល់ដែលស្ទើរ តែដាច់ពេលម្តងៗក៏គាត់នៅតែប្រកាន់នឹងលើកតម្កើងអាជីពនេះ ជាឪពុក ជាគ្រូបើកាលណាមើលឃើញនូវអ្វីដែលហួសហេតុពេកកើតមានចំពោះកូន ចំពោះសិស្សរបស់ខ្លួន តើឈឺចាប់ក្នុងចិត្តយ៉ាងណា បើសិនជាអ្នកវិញតើមានអារម្មណ៍បែបណាដែរ?”

លោក គួច ខេវិន និយាយទៀត ថា អ្នកប្រដាល់ បែកញើស ហូរឈាម ហ្វឹហាត់ ទាត់ធាក់ មិនមានចំណេះស្មើកុង្សី មន្ត្រីក្រវាត់.ក នោះទេគួរតែបន្ធូរបន្ថយនូវអ្វីដែលជាកំហុសអចេតនា ឬកំហឹងមួយគ្រារបស់គ្នា ព្រោះពួកគេហ្នឹងហើយដែលជាសសរទ្រូងគុណខ្មែរ មិនមែនមន្ត្រីក្រវាត់.ក ទៅហូរឈាមបែកច្រមុះដេកសន្លប់ជំនួសឯណា?

បន្ថែមពីនេះលោក គួច ខេវិន លើកឡើងដែរថា ទោះមានអ្វីដែលមិនសប្បាយចិត្តមានសម្ពាធយ៉ាងណា ក្នុងនាមជាអ្នកគោរពស្រឡាញ់ត្រកូលទាយាទគុនខ្មែរ ខ្ញុំសូមលើកទឹកចិត្តលោកគ្រូ អេ ភូថង , អ្នកគ្រូ សាំងសុម៉ាលី ក្មួយ អេ យ៉ានុត សូមបន្តលើកស្ទួយគុនខ្មែរឲ្យខ្ពស់ត្រដែតល្បី រន្ទឺជួយបណ្តុះគ្រាប់ពូជគុនខ្មែរឲ្យដុះដាលរីកលូតលាស់ប្រកបដោយមនសិការជាតិពិតៗតទៅទៀត៕

អត្ថបទ៖ ចាន់រ៉ា