លោក ឆាយ បូរ៉ា ផ្ដល់ការបញ្ចាំងភាពយន្ត ដើម្បីកិច្ចការសប្បុរសធម៌

ខ្មែរភាពយន្តខ្មែររឿង “ឃ្លាតទៅ សែនឆ្ងាយ” នឹងចាក់បញ្ចាំងរយៈ ២ថ្ងៃ នៅ ថ្ងៃទី២៧-២៨ ខែកក្កដា ឆ្នាំ២០២៤ នេះ ដោយថវិការដែលទទួលបានពីការលក់សំបុត្រ គឺជាការចូលរួមចំណែកវិភាគទានក្នុងការចូលរួមចំណែកជួយគាំទ្រក្នុងសកម្មភាពមនុស្សធម៌របស់ ក្លិបយុវជនកាកបាទក្រហមកម្ពុជា នៃសាកលវិទ្យាល័យជាតិគ្រប់គ្រង។

លោក ឆាយ បូរ៉ា ផលិតករភាពយន្ត មានប្រសាសន៍ប្រាប់ “កម្ពុជាថ្មី” នៅថ្ងៃទី២៦ ខែកក្កដា ឆ្នាំ២០២៤ នេះថា កាលមុនលោកធ្លាប់បញ្ចាំងរឿង អ៊ំចន មេដោះ ដែរ បាន ៤ ពេល យកលុយដាក់ កាកក្របាទក្រហមសាលា ដោយក្មេងៗកាកក្របាទក្រហមសាលាត្រូវការលុយយកទៅជួយកន្លែង សាលារៀនខ្វះខាត នៅកន្លែងណាមួយដែលពួកគាត់បានស្គាល់។

លោក ឆាយ បូរ៉ា មានប្រសាសន៍បន្ថែមថា៖ “ហើយលើកទី២ នេះ ពួកគាត់ស្នើ សុំយកខ្សែភាពយន្តរឿង “ឃ្លាតទៅសែនឆ្ងាយ” ព្រោះក្មេងៗស្រករក្រោយអត់ទាន់បានមើល ព្រោះរឿងហ្នឹងជាង ១០ឆ្នាំហើយ។ ការលក់សំបុត្រហ្នឹង សម្រាប់និស្សិតក្នុងសាលា​ ហើយអ្នកក្រៅក៏អាចទិញសំបុត្រចូលទស្សនាបានដែរ”។

ផលិតករ ផលិតកម្ម ដើមត្នោត រូបនេះ បានឱ្យដឹងបន្ថែមថា កាលប៉ុន្មានខែមុន លោកបានបញ្ចាំងភាពយន្តនៅខេត្តបាត់ដំបង គឺរឿង “អ៊ំចនម៉ែដោះ” ហើយគេក៏មានគម្រោងស្នើសុំលោកបញ្ចាំងរឿង “ឃ្លាតទៅសែនឆ្ងាយ” រឿង “៣,៥ ដុល្លារ” រឿង “លោកគ្រូប្រពន្ធល្អ” ជាដើម ដើម្បីធ្វើកម្មវិធីសប្បុរសធម៌បន្ត។

លោក ឆាយ បូ រ៉ា បញ្ជាក់ថា៖ “ការបញ្ចាំងភាពយន្តក្នុងឱកាសនេះ មិនផ្ដោតលើការប្រមូលថវិកាមកផលិតករវិញទេ គឺផ្ដល់អាទិភាពដល់ក្រុមយុវជន ដើម្បីចាត់ចែងធ្វើសកម្មភាពសប្បុរសធម៌ ក៏ដូចជាបានចែករំលែករឿងប្រវត្តិសាស្ត្រមួយនេះឱ្យកូនខ្មែរមើលឱ្យបានច្រើនគ្នា និងជាប្រយោជន៍ដល់សង្គមផង តាមរយៈលក់សំបុត្រ ឬទទួលថវិកាបរិច្ចាគដើម្បីសប្បុរសធម៌”។

គួររម្លឹកថា “ឃ្លាតទៅសែនឆ្ងាយ” ជាខ្សែភាពយន្តប្រវត្តិពិត នៃអ្នកម្តាយ ក្នុងរបបវាលពិឃាត ជាស្នាដៃដំបូងបំផុតរបស់ លោក ឆាយ បូរ៉ា ផលិតក្នុងឆ្នាំ២០១០ ធ្លាប់ត្រូវបាន​ជ្រើសរើស​ជាភាពយន្តកម្ពុជា សម្រាប់ជាប់ពាន​រង្វាន់​អូស្ការ (Top8 Shortlist) ​ជាភាពយន្តភាសា​បរទេស​ល្អ​បំផុត​ ដើម្បីយកទៅប្រកួត​កម្មវិធី​ប្រគល់​ពាន​រង្វាន់ Academy Awards លើក​ទី៨៥ កាលពីអំឡុងឆ្នាំ២០១៣។ ខ្សែភាពយន្តនេះបានទទួលពានរង្វាន់ចំនួន ៧ សម្រាប់ថ្នាក់ជាតិ និងពានរង្វាន់ចំនួន ៩ សម្រាប់ថ្នាក់អន្តរជាតិ។

គួរបញ្ជាក់ថា ខ្សែភាពយន្ត រឿង ឃ្លាតទៅសែនឆ្ងាយ នឹងបញ្ចាំង នៅសាកលវិទ្យាល័យជាតិគ្រប់គ្រង នៅចុងសប្ដាហ៍នេះ វេលាម៉ោង ០៩:០០ ព្រឹក និង ១៤:០០ រសៀល តម្លៃសំបុត្រ ៦ ០០០ រៀល ( 1.5$ )។ ទីតាំងលក់សំបុត្រ នៅ ១. ដេប៉ាដឺម៉ងឆ្នាំសិក្សាមូលដ្ឋាន ២. ក្លិបយុវជកាកបាទក្រហមកម្ពុជា សជគ ៣. ទីតាំងសាល B ផ្ទាល់ពេលចាក់បញ្ចាំង៕

អត្ថបទ៖ ច័ន្ទ វីរៈ

–