អ្នកគាំទ្រនាំគ្នា អុជទៀន កាន់ទុក្ខវិញាណក្ខន Liam នៅមុខសណ្ធាគារកន្លែងកើតហេតុ

កាលពីព្រឹកមិញ ដំណឹងមរណភាពរបស់ Liam Payne ដែលជាសមាជិកក្រុម One Direction បានធ្វើឲ្យពិភពលោកមានការភ្ញាក់ផ្អើលជាខ្លាំង ដោយមូលហេតុនៃការស្លាប់ ត្រូវបានគេស៊ើបដឹងថា តារាចម្រៀងប្រុសរូបនេះ បានហក់ចុះពីយ៉របន្ទប់សណ្ធាគារ ជាន់ទី៣ ស្លាប់ដោយខ្លួនឯង។

មិនតែប៉ុណ្ណោះ ប៉ូលីសបានចូលឆែកបន្ទប់ Liam ឃើញពពេញទៅដោយ ថ្នាំញៀន ដែលទើបតែមានការប្រើប្រាស់ហើយថ្មីៗ និង សភាពបន្ទប់រញ៉េរញ៉ៃ ដោយមានសម្ភារៈមួយចំនួនត្រូវបានបំផ្លាញផងដែរ។ យ៉ាងណាមិញ Liam ត្រូវបានគេដឹងថា ស្នាក់នៅជាមួយមិត្តស្រី នៅសណ្ធាគារមួយកន្លែងនៃប្រទេស Argentina ហើយពួកគេគ្រោងនឹងត្រឡប់ទៅ Florida វិញ តែជាអកុសល ក៏ត្រូវបានអស់ជីវិតមុនទៅហើយ។

ចំណែកឯ អ្នកគាំទ្រវិញ បានបង្ហាញនូវសេចក្ដីសោកសៅជាខ្លាំង មានក្រុមអ្នកគាំទ្រដែលរស់នៅប្រទេស Argentina ក៏បាននាំគ្នាទៅកន្លែងកើតហេតុ នៅមុខសណ្ធាគារ ពួកគេបាននាំគ្នា ទៅអុជទៀន ដាក់ផ្កាស្រស់ ដើម្បីបង្ហាញពីការកាន់ទុក្ខ បួងសួងសូមឲ្យវិញាណក្ខនរបស់ Liam បានទៅកាន់សុគតិភព៕