ជីវិតកម្សាន្ដ

Liam Payne មានជីវិតកំសត់ជាងគេ ចាប់តាំងពីបង្កើតក្រុម One Direction រហូតថ្ងៃបាត់បង់ជីវិត

បានផុស

២ ខែ មុន

នៅ

ថ្ងៃព្រហស្បតិ៍ ១៧ តុលា ២០២៤

ដោយ

យោងទៅតាមប្រព័ន្ធផ្សព្វផ្សាយអន្តរជាតិជាច្រើនបានរាយការណ៍ក្នុងពេលដំណាលគ្នាអំពីករណីរបស់តារាចម្រៀងប្រុស Liam Payne អតីតសមាជិកក្រុម One Direction បានទទួលមរណភាពក្នុងអាយុ ៣១ឆ្នាំ ដោយសារការធ្លាក់ពីលើយ៉រសណ្ឋាគារនៅប្រទេសអាហ្សង់ទីន។ តាមសេចក្តីរាយការណ៍ពីសមត្ថកិច្ចបានឲ្យដឹងថា ការធ្លាក់បណ្តាលឲ្យតារាចម្រៀងប្រុសរងរបួសធ្ងន់ និងស្លាប់នៅនឹងកន្លែងកើតហេតុតែម្ដង។

យ៉ាងណាក៏ដោយ បន្ទាប់ពីកើតហេតុដល់ថ្នាក់បាត់បងជីវិតលើតារាប្រុសរូបនេះភ្លាម ទស្សនិកជនជាច្រើនមានការសោកស្ដាយជាពន់ពេកនូវតារាចម្រៀងប្រុសអង់គ្លេសដ៏មានទេពកោសល្យ និងពេញដោយសមត្ថភាព។ ជាពិសេសទាក់ទិននឹងជីវិតដ៏កំសត់កាលពីកុមារភាព។

Liam Payne កើតក្នុងឆ្នាំ ១៩៩៣ ប៉ុន្តែជាអកុសលលោកបានកើតមុនបីសប្តាហ៍ ហើយទទួលរងបញ្ហាសុខភាពជាច្រើននៅពេលទារក។ គាត់បានចំណាយពេល ៤ ឆ្នាំដំបូងនៃជីវិតនៅក្នុង និងក្រៅមន្ទីរពេទ្យ ដោយត្រូវការការធ្វើតេស្តជាប្រចាំ។ ទីបំផុត គ្រូពេទ្យបានសម្គាល់ឃើញក្រលៀនមួយរបស់គាត់មានស្លាកស្នាម និងមិនដំណើរការ។ ដើម្បីជួយទប់ទល់នឹងការឈឺចាប់ Liam ត្រូវការការចាក់ចំនួន ៣២ នៅលើដៃរបស់គាត់ជារៀងរាល់ថ្ងៃ។ ក្នុងឆ្នាំ ២០១២ Liam បានរកឃើញថា ក្រលៀនរបស់គាត់បានដំណើរការពេញលេញម្តងទៀតដូចគេឯងដែរ។

តារាចម្រៀង និងអ្នកនិពន្ធបទចម្រៀងជនជាតិអង់គ្លេសដ៏ល្បីល្បាញ និងជាតារាចម្រៀងសំខាន់នៃក្រុមរូបនេះធ្លាប់ប្រលងក្នុងកម្មវិធី The X Factor ដល់ទៅ២ដងឯណោះទម្រាំបានក្លាយជាសមាជិក One Direction។ លើកទី១ ក្នុងឆ្នាំក្នុងឆ្នាំ ២០០៨ ក្នុងអាយុ១៤ ឆ្នាំ គាត់ត្រូវចៅក្រមដាក់ពិន្ទុថានៅកេ្មងពេក ហើយស្នើឲ្យមកប្រកួត២ឆ្នាំក្រោយ។ ក្នុងឆ្នាំ ២០១០ ទើបលោកបានប្រកួតប្រជែងម្ដងទៀតក្នុងរដូវកាលទី៧ ក្នុងនាមជាក្រុម One Direction ដោយជាប់ចំណាត់ថ្នាក់ទី៣ ហើយបានបន្តចុះកិច្ចព្រមព្រៀងជាមួយក្រុមហ៊ុន Syco Music របស់ Simon Cowell និងបានចេញអាល់ប៊ុមដែលលក់ដាច់បំផុតចំនួន៥ នៅចន្លោះឆ្នាំ ២០១១ និង ២០១៥ ។ បន្ទាប់ពីនោះមក ពួកគេបានចេញបទចម្រៀង និង MV ជាបន្តបន្ទាប់ ដែលចាត់ទុកថាជាបទល្បីនៅក្នុងឧស្សាហកម្មតន្ត្រីពិភពលោក ដូចជា What Makes You Beautiful, One Thing, Drag Me Down, Steal My Girl។

ទោះយ៉ាងណាក៏ដោយ ជារឿងសោកស្ដាយបំផុតសម្រាប់អ្នកគាំទ្រពួកគេនៅឆ្នាំ ២០១៦ ក្រុមនេះបានរំសាយ ហើយសមាជិកម្នាក់ៗបានសម្រេចធ្វើដំណើរជាតន្រ្តីតែម្នាក់ឯងក្នុងគម្រោងផ្សេងៗគ្នា រួមទាំងអាជីពជាតារាចម្រៀងទោលផងដែរ។ នៅក្នុងបទសម្ភាសន៍តាមទូរទស្សន៍កាលឆ្នាំ ២០១៩ Liam Pay បានចែករំលែកថា គាត់បានធ្លាក់ក្នុងវិបត្តិធ្ងន់ធ្ងរពីឆ្នាំ ២០១០ ដល់ឆ្នាំ ២០១៥ ដោយសារតែគាត់មិនមានជីវិតផ្ទាល់ខ្លួន ហើយស្ថិតនៅក្រោមសម្ពាធខ្លាំងពេកក្នុងការស្វែងរកកិត្តិនាមដូចតារាចម្រៀងផ្សេងទៀត។

ទាក់ទងនឹងជីវិតផ្ទាល់ខ្លួនតារាចម្រៀងវ័យ៣១ឆ្នាំធ្លាប់មានទំនាក់ទំនងដ៏ស្រស់ស្អាត ប៉ុន្តែបែរជាជួបរឿងនូវសោកសៅជាមួយ Cheryl Cole ។ ស្នេហារវាង Cheryl Cole និងអតីតសមាជិក One Direction ធ្លាប់ត្រូវបានចាត់ទុកថាជារឿងនិទានពិតៗ។ Liam Payne គឺជាអ្នកគាំទ្រម្នាក់ដែលស្រលាញ់ Cheryl Cole តាំងពីគាត់នៅក្មេងម្ល៉េះ។ អ្នកទាំងពីរបានជួបគ្នាដំបូងនៅ The X Factor ក្នុងឆ្នាំ២០០៨។ នៅពេលនោះ Cheryl គឺជាភរិយារបស់តារាបាល់ទាត់ Ashley Cole ។

នៅកំឡុងពេល ៧ឆ្នាំក្រោយមក ពួកគេបានជួបជុំគ្នាម្តងទៀតនៅ The X Factor ដដែល។ Liam កាលណោះគាត់មានអាយុ ២១ ឆ្នាំ ដែលជាសមាជិកក្រុមចម្រៀងល្បី One Direction ហើយ Cheryl Cole បានលែងលះគ្នាពីរដង ជាមួយអតីតស្វាមី ។ នៅពេលដែលនាងបានជួប Liam ម្តងទៀត Cheryl ស្ថិតក្នុងដំណាក់កាលនៃការធ្លាក់ទឹកចិត្ត ដោយសារតែអាពាហ៍ពិពាហ៍លើកទីពីររបស់នាងជាមួយអ្នកជំនួញជនជាតិបារាំង Fernandez-Versini បានបែកបាក់គ្នាដោយសារតែរស់នៅមិនចុះសម្រុង។

នៅដើមខែមករាឆ្នាំ ២០១៦ Liam Payne បានប្រកាសទំនាក់ទំនងរបស់ពួកគេដោយបង្ហោះរូបសាក់នៃផ្កាកុលាបចំនួនបីនៅលើដៃរបស់គាត់។ នេះក៏ជាស្នាមសាក់នៅលើគូទរបស់ Cheryl Cole ផងដែរ។ មួយខែក្រោយមក អ្នកទាំងពីរបានបង្ហាញខ្លួនជាសាធារណៈជាមួយគ្នានៅក្នុងកម្មវិធីកម្សាន្តជាច្រើន។ Instagram របស់ Liam ពោរពេញទៅដោយរូបភាពផ្អែមល្ហែមជាមួយមិត្តស្រី

បន្ទាប់ពីបែកគ្នាពី One Direction, Liam Payne បានបង្កើតអាជីពទោលដ៏ជោគជ័យមិនធ្លាប់មាន ដោយអាចរកប្រាក់ចំណូលពីអាជីពសិល្បៈរបស់ខ្លួនបានប្រហែល ៧០លានដុល្លារ។ ជីវិតរបស់តារាចម្រៀងប្រុសរូបនេះកាន់តែមានសុភមង្គលនៅពេល Cheryl Cole សម្រាលបានកូនប្រុសដំបូងក្នុងខែកុម្ភៈ ឆ្នាំ ២០១៧។ ប៉ុន្តែជីវិតដ៏មានក្ដីសុខនេះមិនបានយូរឡើយ បន្ទាប់ពីភរិយាសម្រាលកូនរួច គេស្រាប់តែលេចឮនូវពាក្យចចាមអារ៉ាមអំពីការបែកគ្នារបស់ទាំងពីរភ្លាមៗ ហើយនៅខែកក្កដា ឆ្នាំ២០១៨ គូស្នេហ៍មួយគូនេះ បានប្រកាសជាផ្លូវការអំពីការបែកគ្នារបស់ពួកគេ។

យ៉ាងណាមិញ នៅថ្ងៃទី១៦ ខែតុលា ឆ្នាំ២០២៤នេះ តារាចម្រៀងប្រុស Liam Payne ត្រូវគេប្រទះឃើញស្លាប់នៅខាងក្រៅសណ្ឋាគារក្នុងទីក្រុង Buenos Aires ប្រទេសអាហ្សង់ទីន បន្ទាប់ពីធ្លាក់ពីលើឡៅតឿបន្ទប់ជាន់ទី៣។ ប៉ូលិសថែមទាំងបញ្ចាក់ទៀតថា មុនពេលធ្លាក់ស្លាប់លោកកំពុងតែស្ថិតនៅក្រោមឥទ្ធិពលនៃគ្រឿងញៀន និងគ្រឿងស្រវឹងយ៉ាងជោគជាំ៕